ރަމަޟާންމަހުގެ ފުރަތަމަ ހަފްތާގައި 727 ކޮންޓެއިނަރުގެ ޕެރިޝަބަލް މުދާ މޯލްޑިވްސް ޕޯޓްސް ލިމިޑެޓް، އެމްޕީއެލްއިން ކްލިއަރކޮށްފިއެވެ.
އެމްޕީއެލްގެ ތަފާސް ހިސާބުތައް ދައްކާގޮތުން މިދިޔަ ހަފްތާގެ ތެރޭގައި ކްލިއަރކުރި 727 ކޮންޓެއިނަރގެ ތެރޭގައި ހިމެނެނީ 20 ފޫޓުގެ 367 ކޮންޓެއިނަރާއި، 40 ފޫޓުގެ 360 ކޮންޓެއިނަރެވެ.
ކްރިއަރކުރި ކޮންޓެއިނަރުތަކުގައި ހިމެނީ ކެއިންބުއިމަށް ބޭނުންކުރާ އެކި ބާވަތްތަކުގެ މުދަލެވެ. މީގެތެރޭގައި މޭވާއާއި ތަރުކާރީގެ ގިނަ ބާވަތްތައް ހިމެނެއެވެ. މީގެތެރޭގައި 18786 ބަސްތާގެ ފިޔާ، 26520 ކޭސް ބިހާއި 8 ބަސްތާ އަލުވި ހިމެނޭކަމަށް އެމްޕީއެލްގެ ތަފާސް ހިސާބުތައް ދައްކައެވެ. މީގެއިތުރުން މޭވާއާއި ތަރުކާރީގެ ބާވަތްތަކުގެ ތެރޭގައި ހިމެނޭ ކެބެޖް، ލުނބޯ، އަނބު، ފަޅޯ، އަލަނާސި، ބަރަބޯ، ޓޮމާޓޯ ފަދަ ބާވަތްތައް ހިމެނެއެވެ.
އެމްޕީއެލްއިން ބުނީ ކޯވިޑް19 އަށްފަހު މިހާރު ރާއްޖެ އަންނަ މުދަލުގެ އަދަދު އިތުރުވަމުން އަންނަކަމަށެވެ. އެގޮތުން މިއަހަރުގެ މިހާތަނަށް ލޮކްޑައުންގެ ކުރި ދުވަސްވަރާއި އަޅާބަލާއިރު ރާއްޖެ ގެންނަ މުދަލުގެ އަދަދު %80 އިތުރުވެފައިވާކަމަށް އެމްޕީއެލްއިން ބުނެއެވެ. މިހާރު ރާއްޖެ އަންނަ މުދަލުގެ ބޮޑުބަޔަކީ ކެއިންބުއިމަށް ބޭނުންކުރާ ބާވަތްތަކެވެ. އަދި ރޯދަމަހާއި ދިމާކޮށް މިތަކެތި ހަލާކުނުވެ އަވަހަށް ނެރެވޭނެ އިންތިޒާމް ހަމަޖައްސަމުން އަންނަކަމަށް އެމްޕީއެލްއިން ބުނެއެވެ.