ކޯވިޑް-19އަށް ޕޮޒިޓިވްވެފައިވާ މީހުންނާއި މިބައްޔާ ގުޅިގެން އައިސޮލޭޝަންގައި ތިބޭ މީހުން ވޯޓުލާނީ ޢާންމުންނަށް ވޯޓުލުމަށް ހުޅުވާލާފައިވާ ރަސްމީގަޑި ނިމުމުންކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ކުރިއަށް އޮތް އިންތިޚާބުގައި ވޯޓުލުން ކުރިއަށްދާނީ ހެނދުނު 7:00އިން ހަވީރު 5:00އާ ހަމައަށެވެ.
ޕީއެސްއެމް ނިއުސްއިން ގެނެސްދޭ ވޯޓަށް ތައްޔާރު ޕޮރޮގްރާމްގައި ވާހަކަފުޅު ދައްކަވަމުން އިލެކްޝަންސް ކޮމިޝަންގެ އެކްޓިންގ ސެކްރެޓަރީ ޖެނެރަލް ޙަސަން ޒަކަރިއްޔާ ވިދާޅުވީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަަތްކުރާ ކޮމިޓީތަކުގެ އިންތިޚާބުގައި ކޯވީޑް-19އަށް ޕޮޒިޓިވްވެފައިވާ މީހުންނާއި ކަރަންޓީންގައިި ތިބޭ މީހުންނަށްވެސް ވޯޓުލުމުގެ ފުރުޞަތު އިލެކްޝަންސް ކޮމިޝަނުން ފަހިކޮށްދޭނެކަަމަށެވެ.
ޙަސަން ވިދާޅުވީ އެމީހުންނަށް ވޯޓުލުމުގެ ޚާއްޞަ އުސޫލެއް އެކުލަވާލާފައިވާކަމަށާ، އެގޮތުން ކޯވިޑް-19އަށް ޕޮޒިޓިވް މީހުންނާއި ކަރަންޓީނުގައި ތިބޭމީހުން ވޯޓުލުމަށް ވޯޓުލާ މަރުކަޒަށް ގެންދާނީ އިލެކްޝަންސް ކޮމިޝަންގެ ފަރާތުން ނޫންކަމށެވެ. އެމީހުން ވޯޓުލާ މަރުކަޒަށް ގެންދިއުމަށް ޚައްޞަ ޓާސްކްފޯހެއް އޮންނާނެކަމަށް ޙަސަން ވިދާޅުވިއެވެ.
"ރަށެއްގައި ނަމަ ހެލްތު މިނިސްޓްރީގެ ފަރާތުން ކައުންސިލްތަކާއި ގުޅިގެން އޮންނާނެ ޓާސްކް ފޯހެއް އެކުލަވާލާފައި. އެޓާސްކު ފޯހުގެ ބެލުމުގެ ދަށުން އިލެކްޝަންސް ކޮމިޝަނުން ކަނޑައަޅާ ގަޑިއެއްގައި އިލެކްޝަންސް ކޮމިޝަނުން ކަނޑައަޅާ، އުސޫލެއްގެ ތެރެއިން ވޯޓުލާން އައުމުގެ ފުރުޞަތު ފަހިކޮށްދޭނެ." ޙަސަން ޒަކަރިއްޔާ ވިދާޅުވިއެވެ.
ޙަސަން ވިދާޅުވީ، މާލެ ސަރަހައްދުން އަތޮޅުތަކުގެ ރަށަކަށް ގޮސް ވޯޓުލާން ބޭނުންވާ މީހުންނަށްވެސް ވޯޓް ލެވޭނެކަމަށާ، ނަމަވެސް އެމީހަކީވެސް ކަރަންޓީން ވާން ޖެހޭނެ ބައެއްކަމަށެވެ. ޙަސަން ވިދާޅުވީ ކޯވިޑް-19އަށް ޕޮޒިޓިވް މީހުންނާއި، ކަރަންޓީންގައި ތިބޭމީހުން ވޯޓުލާނީ، ކޯވިޑް-19އަށް ޕޮޒިޓިވް ނޫން މީހުންނާއި ކަރަންޓިން ގައި ނެތް މީހުން ވޯޓުލައި ނިމުމުންކަމަށެވެ.
"މިހާލަތުގައި ވޯތްލުން ކުރިއަށްދާއިރު ގިނަ ބައެއްގެ މަސްލަހަތު ޙިމާޔަތްކުރަން އަޅުގަނޑުމެން ފުރަތަމަ މިބަލަނީ. ރައްކާތެރިކަމަށް އިސްކަން ދޭން ޖެހޭ. އެހެންވީމަ އާންމު ރައްޔިތުން ވޯޓުލާ ގަޑީގައި ޕޮޒިޓިވް މީހުން ވޯޓުލާކަށް އަޅުގަނޑުމެން ނުގެންނަން. ކޮމިޝަނުން އިޢުލާންކޮށްފައި އޮންނާނީ ވޯޓްލުން އޮންނާނީ ހެނދުނު 7:00އިން ހަވީރު 5:00އަށް. އެހެންވީމަ ޕޮޒިޓިވް މީހުންނާއި ކަރަންޓިނުގައި ތިބޭ މީހުން ވޯޓުލާން ގެންނާނީ ހަވީރު 5:00އިން އިރުއޮއްސި 6:00އަށް. އެހެންވީމަ ޢާންމު މީހުން ވޯޓްލާ ނިމުމުން މަރުކަޒުގައި އޭގެ ނުރައްކާ ކުޑަވާނެގޮތަށް ވީހާވެސް މަދު ބަޔަކު ތިބެގެން ވޯޓުލުން ކުރިއަށްދާނީ." ޙަސަން ޒަކަރިއްޔާ ވިދާޅުވިއެވެ.
އިލެކްޝަންސް ކޮމިޝަނުން ވިދާޅުވީ، ޕޮޒިޓިވް މީހުންނާއި ކަރަންޓިންގައި ތިބޭ މީހުންނަށް ވޯޓުލުމަށް އެހީތެރިއަކު ބޭނުންވާނެކަމަށެވެ. އެގޮތުން އެމީހުން ވޯޓުލާނީ އެހީތެރިއެއްގެ އެހީގައިކަމަށާ، ސަބަބަކީ ވޯޓު ގުނަންތިބޭ އިލެކްޝަންސް ކޮމިޝަންގެ އޮފިޝަލުންގެ ރައްކާތެރިކަމަށްޓަައިކަމަށްވެސް ޙަސަން ވިދާޅުވިއެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އޮންނާނީ މިމަހުގެ 10ގައެވެ. މި އިންތިޚާބުގައި 273،128 މީހުންނަށް ވޯޓު ލުމުގެ ޙައްގު ލިބިގެންވެއެވެ.