އައިލެންޑް އެވީއެޝަންގެ މާލީ ހާލަތު ދުވަހެއް ދުވަހަކަށް ރަނގަޅުވަމުން އަންނަކަމަށް އެ ކުންފުނީގެ މެނޭޖިންގ ޑިރެކްޓަރ މުޙައްމަދު މިހާދު ވިދާޅުވެއްޖެއެވެ.
ކޯވިޑް19ގެ ސަބަބުން މުޅި ދުނިޔޭގެ އޭވިއޭޝަން ސިނާއަތަށް ވަނީ ފޫބައްދަން އުނދަގޫ ގެއްލުންތަކަކާއި ކުރިމަތިލާންޖެހިފައެވެ. ރާއްޖޭގެ ޤައުމީ އެއަރލައިން މޯލްޑިވިއަންއަށްވެސް ވަނީ ކޯވިޑް ސަބަބުން ގެއްލުންތަކާއި ކުރިމަތިލާންޖެހިފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މޯލްޑިވިއަން ހިންގާ ކުންފުނި އައިލެންޑް އޭވިއޭޝަން ސަރވިސަސްގެ މެނޭޖިން ޑިރެކްޓަރ މުޙައްމަދު މިހާދު ވިދާޅުވީ، ކޯވިޑް19ގެ ހާލަތުގައި މޯލްޑިވިއަންއިން އަސާސީ މުހިންމު ޙިދުމަތްތަކެއް ރައްޔިތުންނަށް ފޯރުކޮށްދީފައިވާކަމަށެވެ. އޭގެތެރޭގައި ރާއްޖެއިން ބޭރުން ކާބޯތަކެއްޗާއި ބޭސް ގެނެސްފައިވާކަން އޭނާ ފާހަގަކުރެއްވިއެވެ.
މިހާދު ވިދާޅުވީ، މި ހާލަތުގައިވެސް އައިލެންޑް އޭވިއޭޝަނުން ދެމުންދިޔަ ޙިދުމަތްތައް ނުހުއްޓި ކުރިއަށްދިޔައީ ސަރުކާރުގެ އެހީތެރިކަމާއިއެކުކަމަށެވެ. ނަމަވެސް މިހާރު އެތެރޭގެ އުދުހުންތަކާއި ބައިނަލްއަޤްވާމީ ބައެއް މަންޒިލްތަކަށް ދަތުރުތައް ފެށިފައިވުމުގެ ސަބަބުން އެ ކުންފުނީގެ މާލީ ހާލަތު މަޑުމަޑުން ރަނގަޅުވަމުން އަންނަކަމަށް އޭނާ ވިދާޅުވިއެވެ. އަދި މިއަހަރުގެ 3 ވަނަ ކުއާޓަރުގައި ހިންގުން ދެކޮޅު ޖެއްސި އެ ކުންފުންޏަކީ ފައިދާވާ ކުންފުންޏަކަށް ވާނެކަމަށް އުންމީދުކުރާކަމަށް އޭނާ ވިދާޅުވިއެވެ.
"ކޯވިޑްތެރޭގައި ސަރުކާރުން އެހީތެރިކަން ފޯރުކޮށްދީފައިވަނީ. ސަރުކާރަށް ބަރޯސާވެފައިއޮންނަ ވަރު މިހާރު ކުޑަވަމުން ދަނީ. ހިންގުން އަދިވެސް މިދަނީ ގެއްލުމުގައި. ބަޖެޓުގައިވެސް ބައެއް ކުންފުނިތަކަށް ދިމާވެފައިވާ ގެއްލުންތައް ފޫބެއްދުމަށް ފައިސާ ހިމަނާފައިވަނީ. އެގޮތުން އަޅުގަނޑުމެންނަށްވެސް މިއަދާއި ހަމައަށްވެސް މިދަނީ ސަރުކާރުގެ އެހީތެރިކަމާއިއެކު ކުރިއަށް ގެންދަމުން. އަޅުގަނޑު ދެކޭގޮތުގައި މިއަހަރުގެ 3 ވަނަ ކުއާޓަރުގެ ތެރޭގައި ހިންގުމުގެ ގޮތުން ދެކޮޅު ޖެއްސި ކޮންމެވެސް ވަރެއްގެ ފައިދާއެއް ކުރާނެ." މިހާދު ވިދާޅުވިއެވެ.
މިހާދު ވިދާޅުވީ، އައިލެންޑް އޭވިއޭޝަންއަކީ އަމިއްލަ ފައިމައްޗަށް ތެދުވެފައިވާ އަދި ފައިދާވާ ކުންފުންޏަކަށް ހެދުމަށްޓަކައި ގިނަ ކަންކަން ކުރުމަށް ހަމަޖެހިފައިވާކަމަށެވެ. އެގޮތުން އެންމެ މުހިންމު އެއްކަމަކީ ޙިދުމަތް ފުޅާކުރުންކަން އޭނާ ފާހަގަކުރެއްވިއެވެ. މީގެއިތުރުން އަންނަމަހު މާފަރު އިންޓަނޭޝަނަލް އެއަރޕޯޓުން މުމްބާއީއަށް ސީދާ ދަތުރުތައް ފެށުމުން އެ ސަރަހައްދަށް ސީޕްލޭންގެ ޙިދުމަތް ފުޅާކުރުމަކީވެސް ކުންފުނީގެ ހާލަތު ރަނގަޅުކުރުމަށް އަޅަން ވިސްނާފައިވާ މުހިންމު ފިޔަވަޅެއްކަމަށް މިހާދު ވިދާޅުވިއެވެ.
"ޗައިނާ ބޯޑަރު ހުޅުވިއްޖިއްޔާ އަޅުގަނޑުމެންނަށް އޭގެ މަންފާ ކުރާނެ. ދެން އޭގެ އިތުރުން އަޅުގަނޑުމެންގެ އެތެރޭގެ އުދުހުންތައްވެސް އިތުރަށް އެފިޝިއަންޓްކޮށް ރަނގަޅަށް ކުރެވޭނެގޮތްތައް ބަލަމުން މިހާރު މިދަނީ. ދެން ހަމަ އެއާއިއެކު އަޅުގަނޑުމެންނަށް އަލަށް މާފަރުން މިކުރެވޭ ދަތުރުތަކުން ސީޕްލޭން އޮޕަރޭޝަންސް ފުޅާކުރެވޭނެ. އެއީވެސް އަޅުގަނޑުމެންނަށް ކުންފުނީގެ ހާލަތު ރަނގަޅުކުރުމަށް އެޅޭނެ ވަރަށް މުހިންމު ފިޔަވަޅެއް." މިހާދު ވިދާޅުވިއެވެ.
ކޯވިޑް19 އަށްފަހު މޯލްޑިވިއަނުން މިހާރު ވަނީ އެތެރޭގެ އުދުހުންތައް އަލުން ފަށާފައެވެ. އަދި ބައިނަލްއަޤްވާމީ 3 މަންޒިލަކަށްވެސް މިހާރު އެ އެއަރލައިނުން އަންނަނީ ދަތުރުކުރަމުންނެވެ. އެއީ ބަނގްލަދޭއާއި އިންޑިއާގެ ކޮޗިން އަދި ޓްރިވެންޑްރަމްއެވެ.