މަސައްކަތް ނުނިމިގެން ހަވާލުކުރަން ފެށިފައިނުވާ ކުޅުދުއްފުށީ ރޯހައުސްތަކުގެ މަސައްކަތް މުޅިން ނިންމައި ރޯ ހައުސްތައް ހަވާލުކުރުމުގެ މަސައްކަތް ސަރުކާރުން ފަށައިފިއެވެ.
ރޯ ހައުސްތައް ހަވާލުކުރުމުގެ މަސައްކަތާއި ގުޅޭގޮތުން ޕީއެސްއެމްއަށް މަޢުލޫމާތު ދެއްވަމުން މިނިސްޓްރީ އޮފް ނެޝަނަލް ޕްލޭނިންގ ހައުސިންގ އިންފްރާސްޓްރރަކްޗަރގެ ޑެޕިއުޓީ މިނިސްޓަރ ޚާލިސް ޝަރީފް ވިދާޅުވި ގެތައް ހަވާލުކުރުމުގެ މަސައްކަތުގައި ހައުސިންގ މިނިސްޓްރީގެ ޓީމެއް އެރަށުގައި މިހާރު ހަރަކާތްތެރިވަމުންދާކަމަށެވެ.
ޚާލިސް ވިދާޅުވީ ކުރީ ސަރުކާރުން ގެތައް ހަވާލުކުރިއިރު، ގެއަށް ބޭނުންވާ ޒަރޫރީ އެއްވެސް ޚިދުމަތެއް ދީފައި ނުވާކަމަށެވެ. އެގޮތުން ފެނާއި ކަރަންޓާއި ނަރުދަމާ ކަނެކްޝަންވެސް އަޅާފައިނުވާކަމަށް އޭނާ ވިދާޅުވިއެވެ. އަދި ގެތަކުގެ މަސައްކަތް ނުނިންމާ ދޫކޮށްލާފައިހުރުމުގެ ސަބަބުން ފުރާޅާއި ސީލިންގއަށްވެސް ބޮޑެތި ގެއްލުން ވެފައިވާކަމަށާއި ނަމަވެސް ސަރުކާރުން މިހާރުވަނީ މިގޮތަށް ހުރި މައްސަލަތައް ޙައްލުކޮށް، ގެތަށް އަލުން މަރާމާތުކޮށްފައިކަމަށް އޭނާ ވިދާޅުވިއެވެ.
ހދ. ކުޅުދުއްފުށީގައި ޢިމާރާތްކޮށްފައިވާ 40 ރޯހައުސް ޙަވާލުކުރުމުގެ މަސައްކަތްދަނީ ހިނގަމުން.
— Min.of National Planning, Housing & Infrastructure (@MoNPHImv) December 28, 2020
ކުޅުދުއްފުށީ ކައުންސިލް އިދާރާގައި 27 ޑިސެންބަރުވީ އާދިއްތަ ދުވަހުން ފެށިގެން ކުރިއަށްދާ މިމަސައްކަތުގައި މިހާރުވަނީ 18 ފަރާތަކާ ރޯހައުސް ޙަވާލުކޮށްފައި. pic.twitter.com/wMISGpwSWz
ޚާލިސް ވިދާޅުވީ ގެތަކުގެ ލިސްޓް އޭރު އެކުލަވާލިނަމަވެސް، އެގްރިމަންޓްވެސް ހަދާފައި ނެތްކަމަށެވެ.
ކުޅުދިއްފުށީގައި ހަރަކާތްތެރިވަމުންދާ ޓީމުން ގެތަކުގެ ވެރިންނާއިއެކު އެގްރިމެންޓް ހެދުމުގެ މަސައްކަތް ކުރިއަށްގެންދާއިރު އެގްރިމެންޓް ހެދުމާއި ގެތައް ހަވާލުކުރުމުގެ މަސަކައްކަތް ދެދުވަހެއްގެތެރޭ މުޅިން ނިންމާނެކަމަށް މިނިސްޓްރީން ވިދާޅުވެއެވެ.
ކުރިން ބައެއް ގެތަކުގެ ވެރިންނާއި ތަޅުގަނޑި ހަވާލުކުރި ނަމަވެސް، ގެތަކަށް ފައިސާ ދައްކަން ފަށަންޖެހޭނީ އެގްރިމެންޓް ހަދާ ހިސާބުންކަމަށް ޚާލިސް ވަނީ ވިދާޅުވެއެވެ. ގެތަކަށް ފައިސާ ދެއްކުމާއި ގުޅޭ ކަންކަން ކުރުމަށް ކުޅުދުއްފުށީގައި އެސްޑީއެފްސީގެ ޓީމެއްވެސް ދަނީ މަސައްކަތްކުރަމުންނެވެ.
ކުޅުދުއްފުށީގައި ތަރައްޤީކޮށްފައިވާ 40 ރޯހައުސް ލިބުނު މީހުންގެ ދާއިމީ ލިސްޓް އެކުލަވާލާފައިވަނީ އިންތިޚާބާއި ދިމާކޮށް 2018 ވަނަ އަހަރުއެވެ. ގެތަކަށް ހޮވުނު ބައެއް ފަރާތްތަކާއި، ގޭގެ ތަޅުދަނޑިވެސް އޭރު ހަވާލުކުރިއެވެ. ނަމަވެސް ގެތަކުގައި ކުރަންޖެހޭ ބޮޑެތި މަސައްކަތްތައްކެއް ނުނިމި ހުރުމުގެ ސަބަބުން މިހާތަނަށްވެސް، ރައްޔިތުންނަށް އެ ގެތަކަށް ބަދަލުވެވޭގޮތް ވެފައެއް ނުވެއެވެ.