ލ.ފޮނަދޫ މަގު ހެދުމުގެ ޕްރޮޖެކްޓްގެ މަސައްކަތް އަންނަ މަހުގެ ނިޔަލަށް މުޅިން ނިންމާލެވޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ވިދާޅުވެއްޖެއެވެ.
މަގުތައް ޒާމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން ލ.ފޮނަދޫގެ މަގު ހެދުމުގެ މަޝްރޫޢުގެ މަސައްކަތް ފަށާފައިވަނީ މިދިޔަ އަހަރުގެ ޖޫންމަހުގެ ތެރޭގައިއެވެ. ފުނަދޫ މަގުތައް ތަރައްޤީކުރަނީ ތާރުއަޅައިގެން ޒަމާނީ ފެންވަރަށެެވެ.
ޕްރޮޖެކްޓްގެ މަޢުލޫމާތު ދެއްވަމުން އެމްޓީސީސީން ވިދާޅުވީ ފޮނަދޫ މަގުހެދުމުގެ މަޝްރުޢޫގެ އެންމެ ފަހުގެ މަސައްކަތްތައް މިހާރު ފަށައިގެން ކުރިއަށްދާކަމަށެވެ. އެގޮތުން މިމަހުގެ 24 ވަނަ ދުވަހުވަނީ މަގުތަކުގައި ތާރުއެޅުމުގެ މަސައްކަތް ފަށާފައެވެ.
ތާރުއަޅައިގެން ފޮނަދޫގެ 12 މަގެއް ޒަމާނީ ފެންވަރަށް ތަރައްޤީކުރުމަށް ވަނީ ހަމަޖެހިފައެވެ. އެއީ 3.5ކިލޯމީޓަރުގެ މަގުގެ ސަރަޙައްދެވެ. މިހާތަނަށް މުޅި މަޝްރޫޢުގެ 72 އިންސައްތަ މަސައްކަތްވަނީ ނިމިފައެވެ.
ރަށުގައި ފެންބޮޑުވާ މައްސަލަ ޙައްލުކުރުމަށް، މި މަޝްރޫޢުގެ މަސައްކަތް ނިމޭއިރު އެރަށުގައި ސްޓޯމް ވޯޓަރ ސިސްޓަރމެއް ބެހެއްޓުމަށްވެސްވަނީ ހަމަޖެހިފައެވެ. އެމްޓީސީން ވިދާޅުވީ ފުނަދޫގެ މަގުތަކުގައި ތާރު އަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތް އަންނަ މަހުގެ 31 ވަނަ ދުވަހަށް ނިންމާނެކަމަށެވެ.
ފުނަދޫ މަގުހެދުމުގެ މަޝްރޫޢުއަކީ ސަރުކާރުން 25.5 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ.