ދިރިއުޅުމުގެ ޙާލަތަށް މާކްސްދޭ މިންގަނޑު ހާމަނުކުރީ އިންސާފުވެރިކަމަށް ހުރަސްއެޅޭނެތީ - ފްލެޓް ކޮމިޓީ

ހިޔާ ފްލެޓްތަކުގެދިރިއުޅުމުގެ ޙާލަތަށް މާކްސްދޭ މިންގަނޑު ކުރިން ޢާންމުނުކުރީ އިންސާފުވެރިކަމާއެކު ޕޮއިންޓް ދިނުމަށް ހުރަސްއެޅޭނެތީކަމަށް ފްލެޓް ކޮމިޓީއިން ހާމަކޮށްފިއެވެ. ދިރިއުޅުމުގެ ޙާލަތަށް ޕޮއިންޓް ދިންގޮތުގެ ތަފްސީލް ފްލެޓް ކޮމިޓީން މިހާރުވަނީ ޢާއްމުކޮށްފައެވެ.

ހުޅުމާލޭގެ 2ވަނަ ފިޔަވަހި ހިއްކައި، އެތަނުގައި މިހާރު ކުރިއަށް ގެންދާ ބޯހިޔާވެހިކަމުގެ އެންމެބޮޑު މަޝްރޫއަކީ "ހިޔާ" ހައުސިންގ މަޝްރޫޢުގެ މަސައްކަތެވެ. 25ބުރީގެ 16 ޓަވަރުވަނީ އަޅާފާއެވެ. މި ޕްރޮޖެކްޓްގައި ދޭ ފްލެޓްތައް 12 ދާއިރާއަކުން ދިނުމަށްވަނީ ކަނޑައަޅާފައެވެ. ހިޔާ ހައުސިންގ ޔުނިޓްތައް ލިބުނު މީހުންގެ ލިސްސްޓްތައް ފުރަތަމަ އިޢުލާންކޮށްފައިވަނީ 2018ވަނަ އަހަރުގެ އިންތިޚާބާ ދިމާކޮށްފައެވެ.

ފްލެޓް ދޫކުރިގޮތުގައި އޮޅުވާލުންތައް ހުރިކަމަށްބުނެ މި ސަރުކާރުންވަނީ ޕްލެޓްތަކުގެ މައްސަލަބަލާ ކޮމިޓީ އެކުލަވާލައި، ފްލެޓްތަކަށް މާކްސް ދީފައިވާ ގޮތް އަލުން ރިވިއުކުރަންފަށާފައެވެ. 12 ކެޓަގަރީގެ ތެރެއިން މިހާތަނަށް 7 ކެޓަގަރީއަކުން މާކްސްދީފައިވާ ގޮތުގެ ވަގުތީ ލިސްޓުވަނީ ހާމަކޮށްފައެވެ.

ވަގުތީ ލިސްޓް އިޢުލާންކޮށްފައިވާ ކެޓަގަރީތައް

• ޑޮކްޓަރުންނާއި ނަރުހުންނަށް ޚާއްސަ ކެޓަގަރީ / އެޗް.4 (233 ހައުސިންގ ޔުނިޓް)
• (ދިރިއުޅުމުގެ ޙާލަތަށް 15 ޕޮއިންޓް / ޖުމުލަ ޕޮއިންޓް 30)
• ޓީޗަރުންނަށް ޚާއްސަ ކެޓަގަރީ / އެޗް.5 ( 523 ހައުސިންގ ޔުނިޓް)
• (ދިރިއުޅުމުގެ ޙާލަތަށް 15 ޕޮއިންޓް / ޖުމުލަ ޕޮއިންޓް 30)
• އެކަނިވެރި މައިންނާއި ބަފައިންނަށް ޚާއްސަ ކެޓަގަރީ / އެޗް.6 (423)
• (ދިރިއުޅުމުގެ ޙާލަތަށް 15 ޕޮއިންޓް / ޖުމުލަ ޕޮއިންޓް 30)
• 18 އަހަރާއި 40އަހަރާއި ދެމެދުގެ ކައިވެނިކޮށްގެން އުޅޭ ފަރަތްތަކަށް ޚާއްސަ ކެޓަގަރީ / އެޗް.7 (805)
• (ދިރިއުޅުމުގެ ޙާލަތަށް 15 ޕޮއިންޓް / ޖުމުލަ ޕޮއިންޓް 30)
• މާލޭ ރައްޔިތުންނަށް ޚާއްސަ ކެޓަގަރީ / އެޗް.8 (1772)
• (ދިރިއުޅުމުގެ ޙާލަތަށް 25 ޕޮއިންޓް / ޖުމުލަ ޕޮއިންޓް 40)
• ދަފްތަރުގައި ރަޖިސްޓްރީކޮށްފައިވާ ފަރާތްތަކަށް ޚާއްސަ ކެޓަގަރީ / އެޗް.9 (1044)
• (ދިރިއުޅުމުގެ ޙާލަތަށް 10 ޕޮއިންޓް / ޖުމުލަ ޕޮއިންޓް 30)
• ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ޚާއްސަ ކެޓަގަރީ / އެޗް.10 (200)
• (ދިރިއުޅުމުގެ ޙާލަތަށް 20 ޕޮއިންޓް / ޖުމުލަ ޕޮއިންޓް 60)

ދިރިއުޅުމުގެ ޙާލަތަށް މާކްސް ދީފައިވާ މިންގަނޑުގައި ހިމެނޭ ކަންކަމުގެ ތެރޭގައި ކޮޓަރިއާއި ކޮޓަރީގައި ނިދާ މީހުންގެ ޢަދަދާއި، ކުއްޔާއި، ވެންޓިލޭޝަނާއި ގޭގައި ފާޚާނާ ހުރި ޢަދަދާއި ދިރިއުޅޭ ކޮޓަރި ނުވަތަގެ ޢިމާރާތްކޮށްފައިވާ ފެންވަރާއި ޙާލަތަށްވަނީ ބަލާފައެވެ.

މި 7 ކެޓަގަރީން ފްލެޓް ދިނުމުގައި ދިރިއުޅުުމުގެ ޙާލަތަށް މާކްސްދީފައިވާގޮތުގެ ތަފްސީލް މިހާރުވަނީ ހާމަކޮށްފައެވެ. ފްލެޓް މައްސަލަބަލާ ކޮމިޓީއިން ވިދާޅުވީ "ދިރިއުޅުމުގެ ޙާލަތު"ބަޔަށް ޕޮއިންޓް ދިނުމަށް އެކުލަވާލި މިންގަނޑުގައި ހިމެނޭ މަޢުލޫމާތަކީ އެ މަޢުލޫމާތު ކުރިން އާއްމުކޮށްފިނަމަ، އެންމެ އިންސާފުވެރިކަމާއިއެކު ޕޮއިންޓް ދިނުމަށް ހުރަސްއެޅޭނެ މަޢުލޫމާތުތަކެއްކަމަށް ކޮމިޓީއިން ދެކޭކަމަށެވެ. ވަގުތީ ލިސްޓް އާއްމުކޮށްފައިވާ 7 ކެޓަގަރީގެ "ދިރިއުޅުމުގެ ޙާލަތު" ބަޔަށް ޕޮއިންޓް ދީފައިވާ މިންގަނޑުގެ ތަފްސީލް މިހާރުވަނީ ގެޒެޓުކޮށްފައެވެ.

ދިރިއުޅުމުގެ ޙާލަތަށް އިންސާފުވެރިކަމާއެކު ޕޮއިންޓްދިނުމަށް، މި ބަޔަށް މާކްސް ދީފައިވަނީ ޝަރުތު ހަމަފާ މީހުން ދިރިއުޅޭ ގެތަކަށް ޒިޔާރަތްކޮށް ޙާލަތު ބެލުމަށްފަހުކަމަށްވެސް ފްލެޓް ކޮމިޓީއިން ވަނީ ވިދާޅުވެފައެވެ. ދިރިއުޅުމުގެ ޙާލަތަށް މާކްސްދޭނެ މިންގަނޑު ކަނޑައަޅާފައިވަނި ފްލެޓްތަކުގެ މައްސަލަ ބަލާ ކޮމިޓީއާއި، ޕްލޭނިންގ މިނިސްޓްރީގެ ފަންނީ ލަފަޔާއިއެކުއެވެ.