ރައީސުލްޖުމްހޫރިއްޔާގެ އަރިހަށް އެމެރިކާގެ ސެކްރެޓަރީ އޮފް ސްޓޭޓް އިހުތިރާމްގެ ޒިޔާރަތެއް ކުރައްވައިފި
ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ އަރިހަށް އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ އިހުތިރާމްގެ ޒިޔާރަތެއް ކުރައްވައިފިއެވެ.
މި ބައްދަލުކުރެއްވުން އޮތީ މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ.
ރައީސުލްޖުމްހޫރިއްޔާ އިބްރާޙިމް މުޙަމަދު ޞާލިޙް ވަނީ މައިކް ޕޮމްޕެއޯ އާއި ބައްދަލު ކުރައްވައި މަރުހަބާ ވިދާޅުވެފައެވެ. އަދި ދެ ބޭފުޅުންގެ ބައްދަލުވުމުގައި ވަނީ ރާއްޖެއާއި އެމެރިކާއާއި ދެމެދު އޮތް ޚާރިޖީ ގުޅުން އިތުރަށް ބަދަހިކުރެވޭނެ ގޮތްތަކާއި ގުޅޭގޮތުން މަޝްވަރާކުރައްވާފައެވެ.
މައިކް ޕޮމްޕެއޯއާއިއެކު ބޭއްވެވި ބައްދަލުކުރެއްވުމުގައި ރަޢީސް އިބްރާޙިމް މުޙައްމަދު ޞާލިޙުގެ އިތުރުން، ފޮރިން މިނިސްޓަރ އަބްދުﷲ ޝާހިދު ވަނީ ބައިވެރިވެވަޑައިގެންފައެވެ.
މައިކް ޕޮމްޕެއޯ ރައީސުލްޖުމްހޫރިއްޔާގެ އަރިހަށް ކުރެއްވި ޒިޔާރަތުގެ ތެރެއިން، ރައީސް އޮންނަ މެހުމާނުން ސޮއިކުރައްވާ ފޮތުގައި ސޮއިކުރައްވާފައެވެ.
ސެކްރެޓަރީ އޮފް ސްޓޭޓް މައިކް ޕޮމްޕެއޯ ރާއްޖެއަށް ކުރައްވާ މިދަތުރުފުޅު ނިންމަވާލެއްވުމަށޤފަހު ފުރާވަޑައިގެންނެވުމަށް ހަމަޖެހިފައި ވަނީ މިއަދު ހަވީރުއެވެ.