އޮންލައިންކޮށް އެއްގަމު އުޅަނދުގެ އަހަރީ ފީ ދައްކާ ފަރާތްތަކަށް ސްޓިކަރ ދޫކުރާގޮތަށް މީރާއިން އަލުން ހަމަޖައްސައިފިއެވެ.
ކޯވިޑް19އާ ގުޅިގެން އޮންލައިންކޮށް އެއްގަމު އުޅަނދުގެ އަހަރީ ފީ ދައްކާ ފަރާތްތަކަށް ފީ ދެއްކުމުން ސްޓިކަރ ދޫކުރުން މީރާއިން ވަނީ މެދުކަނޑާލާފައެވެ. ނަމަވެސް މިމަހުގެ 13 ވަނަ ދުވަހުން ފެށިގެން އޮންލައިންކޮށް ފީ ދައްކާ ފަރާތްތަކަށް އަލުން އަހަރީ ފީ ސްޓިކަރ ދޫކުރާނެކަމަށް މީރާއިން ބުނެއެވެ.
ސްޓިކަރ ދޫކުރުން ވަގުތީގޮތުން މީރާއިން މެދުކަނޑާލާފައިވަނީ ގިނަ އަދަދެއްގެ މީހުން މީރާގެ އޮފީހަށް އައުން މަދުކުރުމަށާއި، އޮންލައިންކޮށް ޙިދުމަތްތައް ލިބޭނެ އިންތިޒާމް ހަމަޖެއްސުމުގެ ގޮތުންނެވެ. މީރާއިން ބުނީ މިމަހުގެ 13 އިން ފެށިގެން ސްޓިކަރ ދޫކުރަން ފެށި ނަމަވެސް ސްޓިކަރގެ ބަދަލުގައި އޮންލައިން ރަސީދު ބޭނުންކުރެވޭނެކަމަށެވެ.
ކޯވިޑް19އާ ގުޅިގެން މީރާގެ އޮފީހަށް ޙިދުމަތް ހޯދަން އަންނަ މީހުންގެ ނިސްބަތް ބަދުކުރުމަށްޓަކައި އެ އިދާރާއިން ފޯރުކޮށްދޭ ހުރިހާ ފީތަކާއި ޓެކުހެއް އޮންލައިންކޮށް ދެއްކޭނެ އިންތިޒާމް ވަނީ ހަމަޖައްސާފައެވެ. އަދި އޮންލައިންކޮށް ލިބެންހުރި ޙިދުމަތްތައް އޮންލައިންކޮށް ހޯދުމަށާއި މީރާގެ އޮފީހަށް ކޮންމެހެން އަންނަން ޖެހިއްޖެ ހާލަތެއްގައި މެނުވީ ނައުމަށް އެ އިދާރާއިން ވަނީ ކަސްޓަމަރުންގެ އަރިހުގައި އެދިފައެވެ.