ކުރިއަށްއޮތް ދުވަސްތަކުގައި ޑޮލަރު ލިކުއިޑިޓީ ހިފެހެއްޓުމަށް ޑޮލަރު ދޫކުރާނީ އެންމެ މުހިއްމު ކަންކަމަށް އިސްކަންދީގެންކަމަށް ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ ޓިމޮތީ ސޯޔަރ ވިދާޅުވެއްޖެއެވެ.
ބީއެމްއެލްއިން އޮންލައިންކޮށް ބޭއްވި މިއަހަރުގެ އަހަރީ އާންމު ޖަލްސާގައި ވާހަކަދައްވަމުން ސީއީއޯ ސޯޔާ ވިދާޅުވީ، ކުރިއަށްއޮތް ދުވަސްތަކުގައި ޑޮލަރުގެ ދަތިކަން ހައްލުކުރުމަށް އުނދަގޫ ނިންމުންތަކެއް އެ ބޭންކަށް ނިންމަންޖެހޭނެކަމަށެވެ. އެގޮތުން ކޮންމެހެން ޑޮލަރު ދޫކުރަންޖެހޭ ދާއިރާތައް ކަނޑައަޅަން އެ ބޭންކަށް ޖެހޭނެކަމަށް އޭނާ ވިދާޅުވިއެވެ. އަދި ކުރިއަށްއޮތް ދުވަސްތަކުގައި ޑޮލަރު ދޫކުރާނީ އެންމެ މުހިއްމު ކަންކަމަށްކަަން ފާހަގަކުރައްވައި ސޯޔާ ވިދާޅުވީ ރާއްޖެއަށް މުދާ ގެނައުމަށް ބޭނުންވާ ކަންކަމަށާއި މުހިއްމު ޓީޓީތަކަށް ޑޮލަރު ދިނުމަށް އިސްކަންދޭނެ ކަމަށެވެ.
2019 ވަނަ އަހަރު ބީއެމްއެލްއަށް މާލީގޮތުން ރަނގަޅު އާމްދަނީއެއް ލިބުނުނަމަވެސް ކޯވިޑް19އާ ގުޅިގެން މިއަހަރު އެ ބޭންކަށް ވަނީ ދަތިތަކާއި ކުރިމަތިލާންޖެހިފައެވެ. ޓިމް ވިދާޅުވީ، މި އުނދަގޫ ދަނޑިވަޅުގައިވެސް ދިވެހި ރައްޔިތުންނަށް އެހީތެރިކަން ފޯރުކޮށްދިނުމަށް ބީއެމްއެލް ދެމިއޮންނާނެކަމަށެވެ.
ފިނޭންސް މިނިސްޓްރީ މެދުވެރިކޮށް ޔޫރަޕިއަން އިންވެސްޓްމެންޓް ބޭންކުން 20 މިލިއަން ޔޫރޯގެ ފެސިލިޓީއެއް ބީއެމްއެލްއަށް ވަނީ ހަމަޖެހިފައިކަމަށް ޓިމް ވިދާޅުވިއެވެ. އަދި އިންޓަރނޭޝަނަލް ފައިނޭންސް ކޯޕަރޭޝަންއިން ބީއެމްއެލްއަށް 50 މިލިއަން ޑޮލަރާ ހަމައަށް ލޯނު ދޫކުރުމަށް ހަމަޖެހިފައިވާކަންވެސް މި ޖަލްސާގައި ޓިމް ވަނީ ވިދާޅުވެފައެވެ. އަދި އެ ލޯނު ދޫކުރާނީ ރިސޯޓްތަކަށާއި ކުދި އަދި މެދު ފަންތީގެ ވިޔަފާރިތަކަށް އެހީވުމަށްކަމަށް ބީއެމްއެލްއިން ބުނެއެވެ.
ކޯވިޑް19 އާއި ގުޅިގެން އިޤްތިޞާދީގޮތުން ލިބިފައިވާ ހީނަރުކަން ކުޑަކުރުމަށް އެހީތެރިވުމުގެ ގޮތުން ބީއެމްއެލްއިން މިހާތަނަށް ވަނީ 502.7 މިލިއަން ރުފިޔާގެ ލޯނުވެސް ވިޔަފާރިތަކަށް ދޫކޮށްފައެވެ.