4 ރަށެއްގައި ޕޯސްޓުގެ ޙިދުމަތްދޭނެ އެޖެންޓުން ހޯދުމަށް މޯލްޑިވްސް ޕޯސްޓް ލިމިޓެޑްއިން އިޢުލާންކޮށްފިއެވެ.
މޯލްޑިވްސް ޕޯސްޓުން އެޖެންޓުން ހޯދަނީ އދ. މަންދޫއާއި، ގދ. މަޑަވެލި، ވ. ރަކީދޫ އަދި ށ. ފޯކައިދޫއަށެވެ.
އެޖެންޓުކަމަށް ކުރިމަތިލާ ފަރާތްތަކުގެ މަސްޢޫލިއްޔަތުގެ ތެރޭގައި ހިމެނެނީ ރަށުގެ އެޑްރެސްތަކަށް ރައްދުކުރަންޖެހޭ ސިޓީ، ޕާރުސަލްފަދަ ތަކެތި ރައްދުކުރުމާއި، ސިޓީ، ޕާރުސަލް ޕޯސްޓް ކުރަން ބޭނުންވާ ފަރާތަކަށް އެޚިދުމަތް ދިނުމާއި، ރަށުގައި ޕޯސްޓް ކުރެވޭ ތަކެތީގެ ތެރެއިން ރަށްފިޔަވައި އެހެން ތަންތަނަށް އެޑްރެސް ކުރެވިފައިވާ ތަކެތި ކުންފުނީގެ ހެޑްއޮފީހަށް ފޮނުވުމެވެ. މީގެއިތުރުން ޕޯސްޓް ކާރގޯގެ ގޮތުގައި ލިބޭ އަދި ފޮނުވާ މުދަލާއި ޙަވާލުވެ، ރައްދުކޮށްދިނުމާއި، ސްޓޭމްޕް ވިއްކުމުގެ އިތުރުން ޕޯސްޓުން ފޯރުވައިދޭ އެހެނިހެން ޚިދުމަތްތައް ފޯރުކޮށްދިނުމެވެ.
އެޖެންޓުންގެ ގޮތުގައި ކުރިމަތިލާ ފަރާތަކީ ވިޔަފާރިކުރާ ނުވަތަ ވިޔަފާރިކުރުމުގެ ހުއްދަ އޮތް ފަރާތެއްކަމުގައި ވާންޖެހޭނެއެވެ. ނުވަތަ ރަށުގައި ހަރަކާތްތެރިވާ ކްލަބް، ޖަމްޢިއްޔާ ކައުންސިލް ފަދަ އިދާރާއެއް ކަމުގައިވުމާއި، ބޭންކް އެކައުންޓެއް އޮންނަ ފަރާތެއްކަމުގައި ވާންޖެހޭނެއެވެ. އަދި ރަށު ކައުންސިލްތަކުން ކުރިމަތިލާފައިވާނަމަ ކައުންސިލްތަކަށް އިސްކަންދޭނެކަމަށް ޕޯސްޓުން ބުނެއެވެ.
ޕޯސްޓް އޮފީހުން ބުނީ އެޖެންޓުކަމަށް ކުރިމަތިލާއިރު ކައުންސިލް އިދާރާއެއްނަމަ ރަސްމީ ލެޓަރހެޑްގައި ހުށައަޅަންޖެހޭނެކަމަށެވެ. އަދި ވިޔަފާރިކުރާ ފަރާތެއްނަމަ ވިޔަފާރި ހުއްދަ ކޮޕީ އާއި ވެރިފަރާތުގެ އައި.ޑީ.ކާޑް ކޮޕީ ހުށައަޅަންޖެހޭއިރު ކްލަބް، ޖަމުޢިއްޔާ އަދި ކުންފުންޏެއްނަމަ ހުށައަޅަންޖެހޭނީ ރަޖިސްޓްރީ ކޮޕީ އަދި ވެރިފަރާތުގެ އައި.ޑީ.ކާޑް ކޮޕީއެވެ.
އެޖެންޓުކަމަށް ކުރިމަތިލުމުގެ އެންމެ ފަހު ތާރީހަކީ 7 ސެޕްޓެމްބަރެވެ. މިކަމަށް ކުރިމަތިލާ ފަރާތްތަކަށް އެޖެންސީ އުޖޫރައެއްގެ ގޮތުގައި މަހަކު 300 ރުފިޔާ އަދި ޙިދުމަތުގެ ކޮމިޝަނެއް ލިބޭނެކަމަށް މޯލްޑިވްސް ޕޯސްޓް ލިމިޑެޓްއިން ބުނެއެވެ.