ރާއްޖޭގައި އޮންލައިންކޮށް ހިދުމަތް ފޯރުކޮށްދޭ ވިޔަފާރިތައް ވެބްސައިޓެއްގައި ފެންނަގޮތް ހަދައި، އެ ވިޔަފާރިތަކަށް އެހީތެރިކަން ފޯރުކޮށްދިނުމުގެ މަސައްކަތް ބިޒްނަސް ސެންޓަރ ކޯޕަރޭޝަން، ބީސީސީން ފަށައިފިއެވެ.
ބިޒްނަސް ސެންޓަރ ކޯޕަރޭޝަނުން ވިދާޅުވީ، އެ ކޯޕަރޭޝަނާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ޔޫ.އެން.ޑީ.ޕީ މޯލްޑިވްސް ގުޅިގެން ކޯވިޑް-19ގެ ހާލަތުގައި ކުދި އޮންލައިން ވިޔަފާރިތަކަށް އަމާޒުކޮށްގެން އެފަދަ ވިޔަފާރިތަކަށް ފަހި މާހައުލެއް ގާއިމުކޮށްދިނުމުގެ މަސައްކަތް ކުރަމުންދާކަމަށެވެ. އެގޮތުން އަޒަރުބައިޖާންގެ މިނިސްޓްރީ އޮފް ޓްރާންސްޕޯޓް، ކޮމިއުނިކޭޝަންސް އެންޑް ހައި ޓެކްނޮލޮޖީ އާއި ޔޫ.އެން.ޑީ.ޕީ އަޒަރުބައިޖާންއާއެކު ޕާޓްނަޝިޕެއްގެ ދަށުން އޮންލައިންކޮށް ހިދުމަތް ފޯރުކޮށްދޭ ވިޔަފާރިތަކަށް އަމާޒުކޮށްގެން 'ލިސްޓިންގ ވެބްސައިޓެއް' އުފެއްދުމުގެ މަސައްކަތް ކުރަމުންދާކަމަށެވެ.
މި ވެބްސައިޓްގެ ޒަރިއްޔާއިން އެފަދަ ވިޔަފާރިތަކަށް ވެބްސައިޓްގައި ހިލޭ ލިސްޓް ކުރުމުގެ ފުރުސަތު ލިބިގެންދާނެއެވެ. އެގޮތުން ތައުލީމާއި، ސިއްހަތާއި، މުނިފޫހިފިލުވުމާއި، ކެއިންބުއިމުގެ ހިދުމަތްތަކާއި އަދި މިނޫންވެސް ހިދުމަތްތައް ހިމެނޭނެކަމަށް ބީސީސީން ބުނެއެވެ.
އާންމު ވިޔަފާރީގެ މާހައުލުގައި އުޅޭއިރު، ގަނެ ވިއްކުމާއި، އިޖްތިމާއީ ގައިދުރުކަން ބެހެއްޓުމާއި ވިޔަފާރީގެ މުޢާމަލާތްތައް ހިންގާއިރު ސަމާލުކަން ދޭންޖެހޭ ކަންކަމާއި ގުޅޭގޮތުން އަގުހުރި މަޢުލޫމާތު ފޯރުކޮށްދިނުމަކީވެސް މި ވެބްސައިޓްގެ އެއް މަޤްސަދެވެ. އަދި ޑިޖިޓަލް ވިޔަފާރިއެއް ފަށައިގަތުމާއި، ގޭގައި ތިބެގެން ވިޔަފާރިއެއް ހިންގަން ކުރަންޖެހޭ މަސައްކަތުގެ އިރުޝާދުތަކާއި މައުލޫމާތުތައް މި ވެބްސައިޓްގެ ޒަރިއްޔާއިން ފޯރުކޮށްދޭނެކަމަށް ބީސީސީން ބުނެއެވެ.
ވެބްސައިޓް ލޯންޗް ކުރުމަށް ހަމަޖެހިފައިވަނީ ސެޕްޓެމްބަރުމަހުގެ ތެރޭގައެވެ. ވެބްސައިޓުގައި ލިސްޓު ކުރަން ބޭނުންވާ އޮންލައިން ވިޔަފާރިތަކަށް މިހާރު ވަނީ ރަޖިސްޓްރީވުމުގެ ފުރުސަތު ހުޅުވާލާފައެވެ. އަދި ވެބްސައިޓް ލޯންޗުކުރުމަށްފަހު ވެބްސައިޓް މެދުވެރިކޮށްވެސް އެފަދަ ވިޔަފާރިތަކަށް ރަޖިސްޓަރ ކުރެވޭނެއެވެ. ފުރަތަމަ ބެޗްގައި ރެޖިސްޓަރކުރުމުގެ ސުންގަޑިއަކީ 3 ސެޕްޓެމްބަރުކަމަށް ބީސީސީން ބުނެއެވެ.