ދައުލަތުގެ އާމްދަނީއަށްވުރެ ޙަރަދުތައް 7 ބިލިއަން ރުފިޔާއަށްވުރެ އިތުރުވެއްޖެއެވެ.
ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތަކަށް ބަލާއިރު އޮގަސްޓް މަހުގެ 20 ވަނަ ދުވަހުގެ ނިޔަލަށް ދައުލަތުގެ އާމްދަނީއަށްވުރެ ޙަރަދުތައް ވަނީ 7.6 ބިލިއަން ރުފިޔާ އިތުރުވެފައެވެ.
ފިނޭންސް މިނިސްޓްރީން އާއްމުކުރާ ފިޒްކަލް ޑިވެލޮޕްމަންޓް ރިޕޯޓަކީ ދައުލަތުގެ އާމްދަނީ އާއި ހަރަދުކުރެވުނު މިންވަރު ހާމަކުރުމަށް އާންމުކުރާ ރިޕޯޓެކެވެ. ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ވީކްލީ ފިޒްކަލް ޑިވެލޮޕްމަންޓް ތަފާސް ހިސާބުތަކަށް ބަލާއިރު، 1 ޖަނަވަރީ އިން އޮގަސްޓް 20 ގެ ނިޔަލަށް ދައުލަތުން ޙަރަދުކޮށްފައިވަނީ 15.8 ބިލިއަން ރުފިޔާއެވެ. އަދި މި މުއްދަތުގައި ދައުލަތަށް ލިބިފައިވާ ޖުމްލަ އާމްދަނީއަކީ 8.2 ބިލިއަން ރުފިޔާއެވެ.
ތަފާސް ހިސާބުތައް ދައްކާގޮތުން މި މުއްދަތުގައި އެންމެ ބޮޑު ޙަރަދެއްކޮށްފައިވަނީ ރިކަރަންޓް ޙަރަދުތަކަށެވެ. އެއީ ޙަރަދުކުރި މިންވަރުން ބަލާނަމަ 68 އިންސައްތައެވެ. އަދި އަނެއް 32 އިންސައްތަ ޙަރަދުކޮށްފައިވަނީ ކެޕިޓަލް ޙަރަދުތަކަށެވެ. ރިކަރަންޓް ޙަރަދުތަކުގެ ތެރެއިން އެންމެ ބޮޑު އަދަދެއް ޙަރަދުކޮށްފައިވަނީ މުވައްޒަފުންގެ މުސާރައާއި، އެލަވެންސްތަކާއި، ޕެންޝަންއަށެވެ.
މިމަހުގެ 20 ވަނަ ދުވަހުގެ ނިޔަލަށް ދައުލަތަށް ލިބިފައިވާ އާމްދަނީގެ 8 ބިލިއަން ރުފިޔާގައި އުޅޭއިރު، މީގެތެރޭގައި އާމްދަނީއާއި ހިލޭ އެހީގެ ގޮތުގައި ލިބިފައިވާ އާމްދަނީ ހިމެނެއެވެ. ހިލޭ އެހީގެ ގޮތުގައި މި މުއްދަތުގައި 33.1 މިލިއަން ރުފިޔާ ވަނީ ލިބިފައެވެ.
އާމްދަނީގެ ގޮތުގައި އެންމެ ބޮޑު އަދަދެއް ދައުލަތަށް ލިބިފައިވަނީ ޓެކްސްގެ ގޮތުގައެވެ. އާމްދަނީގެ 82 އިންސައްތަ ލިބިފައިވަނީ ޓެކްސްގެ ގޮތުގައެވެ. ޓެކްސްގެ ގޮތުގައި ލިބުނު އާމްދަނީގެ އެންމެ ބޮޑުބައެއް ހިއްސާކުރަނީ ޖީއެސްޓީއެވެ. އެއީ ޖުމްލަ 2.9 ބިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ ބީޕީޓީއިންނެވެ. އެއީ 2.2 ބިލިއަން ރުފިޔާއެވެ. މީގެއިތުރުންވެސް ޓީޖީއެސްޓީ، އިންޕޯޓް ޑިއުޓީ ގްރީން ޓެކްސް، އިންކަމް ޓެކްސްއިންވެސް ދައުލަތައް ވަނީ އާމްދަނީ ލިބިފައެވެ.