ކޯވިޑް19އާ ގުޅިގެން ތޮއްޑޫގެ ދަނޑުވެރިކަން ދަށްވެފައިވާކަމަށް އެރަށު ކައުންސިލުން ހާމަކޮށްފިއެވެ.
ދަނޑު ހެއްދުމަކީ އާމްދަނީ ހޯދުމަށް ތޮއްޑޫގެ ގިނަ އަދަދެއްގެ ރައްޔިތުން ކުރަމުން އަންނަ މަސައްކަތެކެވެ. އަދި މިއީ ބޮޑު އާމްދަނީއެއްވެސް ތޮއްޑޫގެ ރަށްޔިތުންނަށް ލިބެމުން އަންނަ މަސައްކަތެކެވެ.
ޕީއެސްއެމް ނިއުސްއަށް މައުލޫމާތުދެއްވަމުން ތޮއްޑޫ ކައުންސިލުން ވިދާޅުވީ، ކުރިއާއި އަޅާބަލާއިރު ތޮއްޑޫގެ ދަނޑުވެރިކަން މިހާރު 20 އިންސައްތަ ދަށްވެފައިވާކަމަށެވެ.
ދަނޑުވެރިކަމުން ތޮއްޑޫއަށް ލިބޭ އާމްދަނީ ދަށްވެފައިވާއިރު ކުރިއާ އަޅާބަލާއިރު މާލެއަށް ތަކެތި ގެންނަން ކުރާ ދަތުރުތައްވެސް ވަނީ މަދުވެފައެވެ. ތޮއްޑޫގެ ދަނޑުވެރިން އުފައްދާ ތަކެތި ހުކުރު ދުވަސް ފިޔަވައި ކޮންމެ ދުވަހަކު މާލެއަށް ގެނެއެވެ. ނަމަވެސް މިހާރު މިތަކެތި ގެންނަނީ ހަފްތާއަކު 3 ދުވަހުއެވެ. މީގެސަބަބުން ބައެއް ތަކެތި ހަލާކުވެގެން އުކާލަންޖެހި ދަނޑުވެރިކަމަށް އަސަރުކޮށްފައިވާކަމަށް ކައުންސިލުން ވިދާޅުވެއެވެ.
ތޮއްޑޫގައި އެންމެ ގިނައިން ހައްދާ ދަނޑުވެރިކަމުގެ ބާވަތްތަކުގެ ތެރޭގައި ފަޅޯ އަދި ކަރާ ހިމެނެއެވެ. ކައުންސިލުން ވިދާޅުވީ، މި 2 ބާވަތްވެސް ހައްދާ މިންވަރު ކުރިއާ އަޅާބަލާއިރު ދަށްވެފައިވާކަމަށެވެ. ކަރައާއި ފަޅޮލުގެ އިތުރުން ބަރަބޯ، ކިޔުކަންބާ، ތޮރާ ފަދަ ބާވަތްތައްވެސް ތޮއްޑޫގައި އަންނަނީ ހައްދަމުންނެވެ.
ކޯވިޑް19އާ ގުޅިގެން މިއަހަރުގެ ރަމަޟާންމަހުވެސް ދަނޑުވެރިކަމުން ތޮއްޑޫއަށް ލިބުނު އާމްދަނީ ދަށްވެފައިވާކަމަށް ކައުންސިލުން މީގެ ކުރިން ވަނީ ބުނެފައެވެ. އެއިރު ކައުންސިލުން ބުނެފައިވަނީ ދަނޑުވެރިކަމުން ތޮއްޑޫއަށް ލިބުނު އާމްދަނީ ދަށްވެފައިވަނީ ނުއަގުގައި ތަކެތި ވިއްކަން ޖެހުމުގެ ސަބަބުންކަމަށެވެ.