ބޭރު ޤައުމުތަކުގައި ހުރި ދިވެހި އެމްބަސީތަކުން ރާއްޖޭގެ ފަތުރުވެރިކަން ޕްރޮމޯޓްކުރުމަށް ގިނަ މަސައްކަތްތަކެއް ކުރަމުންދާކަމަށް ފޮރިން މިނިސްޓްރީން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގުރާމްގައި ވާހަކަދައްކަވަމުން ފޮރިން މިނިސްޓްރީގެ އިންޑިއަން އޯޝަން ރީޖަންގެ ޖޮއިންޓް ސެކްރެޓަރީ މަރިޔަމް މިދްްފާ ނައީމް ވިދާޅުވީ، ރާއްޖެއަށް ފަތުރުވެރިން ގެނައުމުގެ މަސައްކަތް ފޮރިން މިނިސްޓްރީން ކުރަމުންދާކަމަށެވެ. މި މަސައްކަތް ކުރަމުންދަނީ ޓުއަރިޒަމް މިނިސްޓްރީއާއި، އެމްއެމްޕީއާރުސީއާއި ފަތުރުވެރިކަމުގެ ސިނާއަތާއި ގުޅުންހުރި އެހެނިހެން ފަރާތްތަކާއި ގުޅިގެންނެވެ.
މިދްފާ ވިދާޅުވީ، ރާއްޖޭގެ ފަތުރުވެރިކަން ޕްރޮމޯޓްކުރުމަށް ރާއްޖެއިން ބޭރުގައި ހުރި ދިވެހި އެމްބަސީތަކާއި ހައިކޮމިޝަންތަކުގެ ދައުރުވެސް ފުޅާކަމަށެވެ. ބޭރުޤައުމުތަކުގައި ރާއްޖެ ޕްރޮމޯޓްކުރާކަން ފާހަގަކުރައްވައި އޭނާ ވިދާޅުވީ، ރާއްޖެއާއި ގުޅޭ މައުލޫމާތުދިނުމާއި، ފަތުރުވެރިކަމުގައި އަޅާފައިވާ ރައްކާތެރިކަމުގެ ފިޔަވަޅުތައް ބުނެދިނުމާއި، ރާއްޖެއާއިމެދު ފަތުރުވެރިންގެ މެދުގައި ޔަޤީންކަން އިތުރުކުރުމަށް އެމްބަސީތަކުން ވެބިނަރތައް ބާއްވަމުން އަންނަކަމަށެވެ.
"ރާއްޖެއަށް ފަތުރުރިން ގެނައުމުގެ މަސައްކަތް ހާރިޖިއްޔާއިން މިދަނީ ކުރަމުން. މިސާލެއްގޮތުން ދައްނަވާލާނަން އަޅުގަނޑުމެންގެ އެމްބަސީތަކުން، ހައިކޮމިޝަންތަކުން އެބަބާއްވާ ރާއްޖެއާއިގުޅޭ، ރާއްޖޭގެ ޓުއަރިޒަމް އޯޕަނިންއާއިގުޅޭ ވެބިނަރސްތައް. ލަންޑަންގައި، ޖަރމަނީގައި އަދި އިންޑިއާގަވެސް މިވަނީ ވެބިނަރއެއް ބޭއްވިފައި. ރާއްޖޭގައި މިހާރު އެސްޓަބްލިސްކޮށްފައިހުރި ހެލްތް ޕްރޮޓޮކޯލްއާއި، ސޭފް ޓުއަރިޒަމްއެއްކަން އަސްލު އަންގައިދިނުމަށްޓަކައި، ޓްރަސްޓް ބިލްޑް ކުރުމަށްޓަކައި އެކަން ދިވެހިރާއްޖެއިން ބޭރުގައި ޤާއިމްކޮށްފައިހުރި ހުރިހައި ހައިކޮމިޝަންތަކެއްގައި މިދަނީ މަސައްކަތްތައް ކުރަމުން." މިދުފާ ވިދާޅުވިއެވެ.
މިދުފާ ވިދާޅުވީ، މިވަގުތު ރާއްޖެއަށް ބޭނުންވާ އެންމެ މުހިންމު އެއްކަމަކީ ވިޔަފާރީގެ ގުޅުންތައް ވަރުގަދަކުރުންކަމަށެވެ. ވިޔަފާރީގެ ގުޅުންތައް ބަދަހިކޮށްގެން ނޫނީ ރާއްޖޭގެ ކުދި ފަންތިއާއި މެދު ފަންތީގެ ވިޔަފާރިތަކަށް އަލުން ފަށައިނުގަނެވޭނެކަމަށް އޭނާ ވިދާޅުވިއެވެ. އެހެންކަމުން ބޭރުގެ ޤައުމުތަކާއި ވިޔަފާރީގެ ގުޅުންތައް ވަރުގަދަކޮށް ބީޓުބީ ކޮންޓެކްސް އިތުރުކުރުމަށްވެސް އެމްބަސީތަކުން މަސައްކަތްކުރަމުންދާކަމަށް އޭނާ ވިދާޅުވިއެވެ.
"މިހާރު އަޅުގަނޑުމެން މިދަނީ ރާއްޖޭގެ ޓްރޭޑިޝަނަލް ޓްރޭޑް ޕާޓްނަސްއާއިއެއްކޮށް މަސައްކަތްކުރަމުން. ބީޓުބީ ކޮންޓެކްސްތައް އިތުރުކުރުމަށްޓަކައި ކުރެވިދާނެ ކަންތައްތަކަކީ ކޮބައިތޯ ހޮސްޓް ގަވަމަންޓްތަކުންނާއި އަޅުގަނޑުމެންގެ ހައިކޮމިޝަންތައް ނޫނީ އެމްބަސީތައް ހުންނަ ޤައުމުތަކުން ބަލަމުން. ކަންތައްތައް ބަލައިގެން އެކަންކަން އަޅުގަނޑުމެންގެ ރާއްޖޭގެ ކަމާގުޅޭ އިދާރާތަކަށް ފޯރުކޮށްދީ ލިންކުތައް އެސްޓާބްލިޝްކުރީމައި ވިޔަފާރީގެ ގުޅުންތައް ބަދަހިވެގެންދާނީ. އެއިރުން ކުދި ވިޔަފާރިތަކާއި މެދުފަންތީގެ ވިޔަފާރިތައްވެސް އަނެއްކަވެސް ހިނގައިގަންނާނީ. އިޤްތިޟާދަށް ރަނގަޅު އަސަރެއް ފެނިގެންދާނީ." މިދުފާ ވިދާޅުވިއެވެ.
ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކުގައި ދިވެހިރާއްޖޭގެ އެމްބަސީތަކާއި ހައިކޮމިޝަންތައް ހުރެއެވެ. މީގެ ސަބަބުން އެ ޤައުމުތަކުގައި ރާއްޖޭގެ ފަތުރުވެރިކަން ޕްރޮމޯޓްކުރުމަށް އިތުރަށް ފަސޭހަކަމެއް ލިބިގެންދާނެއެވެ.
ރާއްޖޭގެ ބޯޑަރު އަލުން ހުޅުވާލިތާ މަސްދުވަސް ވެފައިވާއިރު، މި ވޭތުވެދިޔަ މަސްދުވަހުގެ ތެރޭގައި ރާއްޖެއަށް ޒިޔާރަތްކޮށްފައި ވަނީ 5177 ފަތުރުވެރިންނެވެ.