ޓްރާންސް މޯލްޑިވިއަން އެއަރވޭސް، ޓީއެމްއިން ނަގާފައިވާ 305 މިލިއަން ޑޮލަރު ނުވަތަ 4.7 ބިލިއަން ރުފިޔާގެ ލޯނު ދެއްކުމުގައި އުނދަގޫތައް ކުރިމަތިވެއްޖެއެވެ.
މިއީ ޓީއެމްއޭ ގަތުމަށް އެމެރިކާގެ ބެއިން ކެޕިޓަލްއިން ނެގި ލޯނެކެވެ. ދުނިޔޭގެ މަޝްހޫރު ނިއުސް އެޖެންސީން، ރޮއިޓާސްއިން ބުނީ، ލޯނު ދައްކަން ހުރަސްތައް ކުރިމަތިވީ ކޯވިޑް19ގެ ސަބަބުން ޓޫރިޒަމް ދާއިރާ ހުއްޓި، އާމްދަނީ ލިބޭނެ މަގު ބަންދުވުމުގެ ސަބަބުންކަމަށެވެ.
2017 ގައި ބެއިން އިން ޓީއެމްއޭ ގަތީ 500 މިލިއަން ޑޮލަރު ނުވަތަ 7.7 ބިލިއަން ރުފިޔާއަށް އިތުރު ދެ ކުންފުންޏަކާ ގުޅިގެންނެވެ. ލޯނުގެ ކަންކަން ހަމަޖައްސަން މި އޮގަސްޓްމަހުގެ ނިޔަލަށް ވަގުތު ދިން ކަމަށް ވެސް، ރޮއިޓާސް އިން ވަނީ ބުނެފައެވެ.
ޓީއެމްއޭއަކީ ދުނިޔޭގެ އެންމެ ބޮޑު ސީޕްލޭން އޮޕަރޭޓަރެވެ. މީގެ ކުރިން ދުވާލެއްގެ މައްޗަށް 2000 އަށް ވުރެ ގިނަ ފަތުރުވެރިން ޓީއެމްއޭގެ ސީޕްލޭންތަކުގައި އުފުލިއެވެ. ބޯޑަރު ހުޅުވާލާ ފަތުރުވެރިން އަންނަން ފެށިނަމަވެސް ކުރިއާ އަޅާބަލާއިރު ފަތުރުވެރިން އަންނަ މިންވަރު ވަރަށް ބޮޑަށްވެސް މަދެވެ. މީގެ ސަބަބުން އެ އެއަރލައިންގެ އާމްދަނީއަށް ވަނީ ބޮޑު އަސަރެއްކޮށްފައެވެ. އަދި ޓީއެމްއޭއިން ހަރަދު ކުޑަ ކުރަން މުވައްޒަފުންވެސް ވަނީ މަދުކޮށްފައެވެ.
ކޯވިޑް19އާ ގުޅިގެން ދުނިޔޭގެ އެއާރލައިން އިންޑަސްޓްރީއަށް ބޮޑެތި ގޮންޖެހުންތަކާ ކުރިމަތިލާން ޖެހި، ބައެއް އެއަރލައިންތައް މިހާރު ވަނީ ބަނގުރޫޓުވެސް ވެފައެވެ.