ހަތަރު ޓެކުހަކާއި ފީއެއް ދެއްކުމުގެ ސުންގަޑި މިއަދަށް ހަމަވާނެކަމަށް މޯލްޑިވްސް އިންލެންޑް ރެވެނިއު އޮޓޯރިޓީ، މީރާއިން ހާމަކޮށްފިއެވެ.
މީރާއިން ހާމަކުރި ގޮތުގައި، ސުންގަޑި ހަމަވަނީ 2019 ވަނަ އަހަރުގެ ބީޕީޓީ ބަޔާން ހުށައަޅާ ފައިސާ ދެއްކުމާއި، މިއަހަރުގެ ޖުލައިމަހުގެ ވިތްހޯލްޑިންގ ޓެކްސް އާއި، ޖުލައިމަހުގެ ނަން-ރެސިޑެންޓް ވިތްހޯލްޑިގް ޓެކްސްއާއި، ޖުލައިމަހުގެ އެއަރޕޯޓް ޓެކްސް އެންޑް ފީ ދެއްކުމުގެ ސުންގަޑިކަމަށެވެ.
މީރާއިން ވިދާޅުވީ، މީގެތެރެއިން ވިތްހޯލްޑިންގ ޓެކްސްއާއި އެއަރޕޯޓް ޓެކްސް އަދި ފީ ދެއްކުމުގެ ސުންގަޑިއަކީ ކޮންމެ މަހެއްގެވެސް 15 ވަނަ ދުވަސްކަމަށެވެ. ނަމަވެސް އޮގަސްޓް 15 ވަނަ ދުވަސް ބަންދު ދުވަހަކަށް ވުމުގެ ސަބަބުން އައު ސުންގަޑިއަކީ 16 އޮގަސްޓް ކަމަށް ހަމަޖައްސާފައިވާކަމަށެވެ.
2019 ވަނަ އަހަރުގެ ބީޕީޓީ ބަޔާން ހުށައަޅާ ފައިސާ ދެއްކުމުގެ ސުންގަޑި މިއަދަށް ހަމަވާއިރު މިއީ މީރާއިން މި ޓެކްސް ދެއްކުމަށް ކުރިންއޮތް ސުންގަޑިއަށް އިތުރުކޮށްދިން ސުންގަޑިއެކެވެ. ސުންގަޑި އިތުރުކޮށްދީފައިވަނީ ކޯވިޑް19 އާއިގުޅިގެން ބައެއް ޓެކްސްތައް ދެއްކުމަށް ޓެކްސް ދައްކާ ފަރާތްތަކަށް މީރާއިން ދެމުންއައި ލުއިތަކާއިގުޅިގެންނެވެ.
މީރާއިން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމްވެސް މިހާރު ވަނީ ހަމަޖައްސާފައެވެ. އޮންލައިންކޮށް ޓެކުހާއި ފީތައް ދެއްކޭނެ އިންތިޒާމް ހަމަޖެއްސުމާއި ގުޅިގެން އިޖްތިމާއީ ގައިދުރުކަން އިސްކޮށް މީރާގެ ޙިދުމަތްތައް އޮންލައިންކޮށް ހޯދުމަށް މީރާއިން ވަނީ އިލްތިމާސްކޮށްފައެވެ.