ކޮވިޑް-19 ޖެހޭ މީހުންގެ ޒިންމާތަކާއި އެމީހުން ޢަމަލުކުރަންޖެހޭ އުސޫލު ހެލްތް ޕްރޮޓެކްޝަން އެޖެންސީ، އެޗްޕީއޭއިން ޢާއްމުކޮށްފިއެވެ.
މި އޫސޫލަކީ ކޯވިޑް-19ޖެހޭ މީހުން އަޅަންޖެހޭ ރައްކާތެރިކަމުގެ ފިޔަވަޅާއި އެމީހުންގެ ފަރާތުން އެހެން މީހުންގެ ގަޔަށް ބަލި ފެތުރުން ކޮންޓްރޯލްކުރުމަށް އަޅަންޖެހޭ ފިޔަވަޅުތައް ބަޔާންކޮށް ހަދާފައިވާ އުސޫލެކެވެ.
ފެސިލިޓީއަށް ގެންދިއުމުގައި އިސްކަންދޭންޖެހޭ ކަންކަން:
- އުމުރުން ދުވަސްވީ މީހުން (60 އަހަރުން މަތީގެ މީހުން)
- ހަކުރު ބަލި، ހިތުގެ ބަލި، ކިޑްނީ ބަލި ފަދަ ކޯވިޑް19ޖެހުމުން ނުރައްކާވެދާނެފަދަ ބަލިތަކަށް ފަރުވާ ހޯދަމުންދާ މީހުން
- އުމުރުން ދުވަސްވީ މީހުންނާއި، ބޮޑެތި ބަލިތަކަށް ފަރުވާ ހޯދާ މީހުންނާއިއެކު ދިރިއުޅޭ މީހުން
މި އުސޫލުގައި ވާގޮތުން ގޭގައި ހުއްޓައި ކޯވިޑް-19 ޖެހުނުކަން އެނގިއްޖެނަމަ ވަކި ކޮޓަރިއެއްގައި ނުވަތަ ވަކި ކޮޓަރިއެއް ނެތްނަމަ މާސްކު އަޅައި އެހެންމީހުންނާއި ވީހާވެސް ބޮޑަށް ގައިދުރުކަން ބަހައްޓަންޖެހެއެވެ. އަދި އެންމެން އެއްކޮށް އުޅޭ ތަނެއްނަމަ ފެސިލިޓީއަކަށް ގެންދަންދެން ގޭގައި އުޅޭ އެންމެން މާސްކު އަޅަންޖެހެއެވެ.
ގެއިން ބޭރުގައި ހުއްޓާ ބަލި ޖެހުނުކަން އެނގިއްޖެނަމަ ސަރޖިކަލް މާސްކް އަޅައި، އަވަހަށް ގެއަށްގޮސް އެކަހެރިވުމަށާއި އެހެން މީހަކު އިންނަ ދުއްވާ އުޅަނދަކަށް ނޭރުމަށްވެސް މި އުސޫލުގައިވެއެވެ.
ޕޮޒިޓިވްވާ މީހުން އަމަލުކުރަންޖެހޭ އުސޫލް:
- އައިސޮލޭޝަން ފެސިލިޓީއަށް ދިޔުމަށްޓަކައި ތިމާގެ ތަކެތި ތައްޔާރުކުރުން. މިގޮތުން އަންނައުނާއި ތިމާގެ ޒަރޫރީ ބޭނުންތަކަށް ކޮންމެހެން ގެންދަންޖެހޭ ޓޮއިލެޓްރީސް އަދި ބޭސްފަދަ ތަކެތި ޕެކްކޮށް ތައްޔާރުކޮށްފައި ބަހައްޓުން.
- ގޭގައި ދިރިއުޅޭ އެހެން މީހުންނާއި އެމީހާގެ ރައްކާތެރިކަމަށްޓަކައި، ފެސިލިޓީއަށް ގެންދިއުމަށް ބަލާ އައުމުން އިންކާރުނުކޮށް ދިއުން
- ދިރިއުޅޭ ތަނުގެ ސާފުތާހިރުކަމާއި އަމިއްލަ ސާފުތާހިރުކަން ދަމަހެއްޓުން
- ކޮޓަރިން ނިކުންނަން ޖެހިއްޖެ ހާލަތުގައި ނުވަތަ އެހެން މީހަކު ކޮޓަރިއަށް ވަންނަންޖެހޭ ހާލަތުގައި ފައްސިވެފައިވާ މީހާއާއި ގޭގެ އެހެން މެމްބަރުން މާސްކް އެޅުން
- ގޭގައި ދިރިއުޅޭ އެހެންމީހުންނާ މަދުވެގެން 3 ފޫޓު ގައިދުރުމިން ބަހައްޓަންޖެހޭނެ. ޚާއްޞަގޮތެއްގައި ގޭގައި ދިރިއުޅޭ 60 އަހަރުން މަތީގެ މީހުންނާއި ދާއިމީ ބައްޔަށް ބޭސްފަރުވާކުރާ މީހުންނާ ވީވަރަކުން އެއްތަންނުވުން
- "ޙާލުބެލުން ޕޯޓަލް" ގައި ރަޖިސްޓްރީވުން. ތަމޯމީޓަރެއް ބޭނުންކޮށްގެން ދުވާލަކު އެއްފަހަރު ހުން ބަލައި ޕޯޓަލް މެދުވެރިކޮށް އެމީހެއްގެ ޞިއްޙީ ޙާލަތު ކޮންމެ ދުވަހަކުވެސް ހިއްސާކުރުން
- ކެއްސާ ކިނބިހި އަޅާނަމަ ޓިޝޫއަކުން ނުވަތަ އުޅަނބޮށީގެ އެތެރެފަރާތުން އަނގައާއި ނޭފަތް ނިވާކުރުން. އަދި ބޭނުންކުރި ޓިޝޫ ރައްކާތެރިކަމާއެކު މަތި ޖެހި ޑަސްބިނަކަށްލުން
ޕޮސިޓިވްވި މީހަކު ދިރިއުޅޭ ގެއެއްގެ މީހެއްގެގައިން އަލާމާތެއް ފެނިއްޖެނަމަ ވީހާވެސް އަވަހަށް އެކަން އެޗްޕީއޭއަށް އެންގުމަށްވެސް މި އުސޫލުގައިވަނީ އިރުޝާދުދީފައެވެ.
މި އުސޫލުގައިވަނީ ބަލި މީހާ ދިރުއުޅޭ ތަން ރަނގަޅަށް ސާފުކޮށް ޑިސްއިންފެންކްޓް ކުރުމަށްވެސް އިރުޝާދު ދީފައެވެ. އެގޮތުން ބަލި މީހާ ރީތިވުމަށް ބޭނުންކުރާ ސާމާނު ވަކިން ގެންގުޅުމާއި، އަދި އަންނައުނު ދޮވުމުގައިވެސް އެންމީހުންގެ އަންނައުނާއި ވަކިން ދޮވުމާއި ބަލި މީހާއަށް އެހީވާއިރު ގޭގެ އެހެން މީހުން އަބަދުވެސް މާސްކް އެޅުމާއި، ސާފުތާހިރުކަމަށް ޚާއްސަ ސަމާލްކަމެއް ދިނުމަށްވެސް މި އުސޫލުގައި އިރުޝާދު ދީފައިވެއެވެ. އަދި ބަލި މީހާ އުފައްދާ ކުނި ރައްކާތެރިގޮތުގައި އުކާލުމަށްވެސް އެޗްޕީއޭއިންވަނީ އިރުޝާދު ދީފައެވެ.