ފުރަބަންދުގެ ހާލަތުގައި ފަސޭހަކާމާއިއެކު އާންމުންނަށް ބޭސްލިބޭނެ އިންތިޒާމްތަކެއް އެސްޓީއޯ މެޑިކަލްސްއިން ހަމަޖައްސައިފިއެވެ. އެ ކުންފުނިން ބުނީ ބޭސް ސިޓީ އާއިއެކު ބަލިމީހާގެ އައިޑީކާޑުގެ ފޮޓޯއެއް ވައިބަރ ކުރުމުން ބޭސް ޑެލިވަރ ކޮށްދޭނެކަމަށެވެ.
މާލެއިންނަމަ ބޭސް ސިޓީއާއި އައިޑީކާޑުގެ ފޮޓޯއަކާއި އަދި ބޭސް ފޮނުވަންވީ އެޑްރެހާއި ގުޅޭނެ މަޢުލޫމާތު އެސްޓީއޯ މެޑިކަލްސްގެ ނަންބަރު 7922035 އަށް ވައިބަރ މެދުވެރިކޮށް ފޮނުވުމުން އެސްޓީއޯގެ ބޭސްފިހާރަތައް މެދުވެރިކޮށް ބޭސް ގޭގެއަށް ފޮނުވުމުގެ މަސައްކަތްކުރަމުންދާ ކަމަށް އެސްޓީއޯ މެޑިކަލްސްއިން ބުނެއެވެ.
މީގެ އިތުރުން ހުޅުމާލޭގައި ދިރިއުޅޭ ފަރާތްތަކުން ބޭސް ސިޓީގެ މައުލޫމާތު 7291120 ނަންބަރަށް ފޮނުވުން އެފަރާތްތަކަށްވެސް އިންތިޒާމުތައް ހަމަޖެހޭނެކަމަށް އެސްޓީއޯ މެޑިކަލްސްއިން ބުނެއެވެ.
އެސްޓީއޯއިން ބޭސް ޑެލިވަރ ކޮށްދެނީ 3 މަސް ހަމަނުވާ ބޭސްސިޓީތަކަށެވެ. އަދި ޑެލިވަރ ކޮށްދޭނީ ހަމައެކަނި ބޭސް ސިޓީއަށް ނަގާ ބޭސްތައް ކަމަށްވެސް އެ ކުންފުނިން ބުނެއެވެ.
މާލެ ލޮކްޑައުން ކުރުމާއި ގުޅިގެން އާންމުންނަށް ބޭނުންވާ އަސާސީތަކެތި އާންމުންނަށް ފަސޭހައިން ލިބޭނެގޮތް ހެދުމަށް ސަރުކާރުން އަންނަނީ މަސައްކަތް ކުރަމުންނެވެ.