އާއްމު ސާފުތާހިރުކަމަށް ހޭލުންތެރިކުރުވާ، ކޮންސްޓްރަކްޝަން ސައިޓުތަކާއި ކެފޭ ހޮޓާތައް ބަލައި ފާސްކުރަނީ

އާއްމު ސާފުތާހިރުކަމާގުޅޭގޮތުން ހޭލުންތެރިކޮށް، ކޮންސްޓްރަކްޝަން ސައިޓުތަކާއި، މާލޭގައި ހިންގާ ކެފޭ ރެސްޓޯރެންޓްތައް ބަލާފާސްކުރުމަށް ނިންމާފައިވާކަމަށް މާލޭ ސިޓީގެ މޭޔަރ ސިފާ މުޙައްމަދު ވިދާޅުވެއްޖެއެވެ.

މޭޔަރ މިހެން ވިދާޅުވެފައިވަނީ މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮރޯނާ ވައިރަސް ނުވަތަ ކޯވިޑް-19 އިން ރައްކާތެރިވުމަށްޓަކާ ސަރުކާރުން ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން މާލޭ ސިޓީ ކައުންސިލުން އިސްނަގައިގެން ކުރުމަށް ނިންމާފައިވާ ކަންކަމާގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައެވެ. މި ބައްދަލުވުމުގައި ވާހަކަދައްކަވަމުން މޭޔަރ ސިފާ ވިދާޅުވީ، މިފަދަ ދަނޑިވަޅެއްގައި އާއްމު ރައްޔިތުންވެސް އެންމެ ބޮޑު ސަމާލުކަމެއްދޭންޖެހޭނީ އާއްމު ސާފުތާހިރުކަން އިސްކޮށް، ފަރުދީ ފެންވަރުގައި މިފަދަ ކަންކަމަށް އެއްބާރުލުން ދިނުންކަމަށެވެ. އަދި މިކަންކަމަށް އާއްމުން ހޭލުންތެރިކުރުވާ މި ބައްޔާގުޅޭގޮތުން އާއްމުންނަށް ކޮންމެހެން އެނގެންޖެހޭ މަޢުލޫމާތުތައް ފޯރުކޮށްދިނުމަށް ސިޓީ ކައުންސިލުން މަސައްކަތްކުރާނެކަމަށް ސިފާ ވިދާޅުވިއެވެ.

އެގޮތުން މި މަސައްކަތުގެ ތެރެއިން ކޮންސްޓްރަކްޝަން ސައިޓުތަކާއި މާލޭގައި ހިންގާ ބައެއް ކެފޭ ރެސްޓޯރެންޓްތަކަށް ސިޓީ ކައުންސިލްގެ ޓީމުތައްގޮސް އެތަންތަނުގެ ސާފުތާހިރުކަން ހުރިނެތްގޮތް ބަލާ، ސެނިޓައިޒަރފަދަ ތަކެތި ބޭނުންކުރުމަށް ބާރު އެޅުމަށް ހަމަޖެހިފައިވާކަމަށް މޭޔަރ ސިފާ ވިދާޅުވިއެވެ. އަދި މިކަން ކުރުމުގައި ސްޓާފުންގެ ދަތިކަން ހުރި ނަމަވެސް، މިވަގުތު އެންމެ ބޮޑު އިސްކަމެއްދީގެން ސިޓީ ކައުންސިލުގެ ފަރާތުން މި މަސައްކަތް ކުރިއަށްގެންދާނެކަން މޭޔަރ ފާހަގަކުރެއްވިއެވެ.

"ލޭންޑް އެންޑް ބިލްޑިންގ ސެކްޝަނުން އަންނަ ހަފްތާގައި ދެ ދުވަހެއްގައި އަޅުގަނޑުމެން ތަނުގައި ތިބެގެން ކުރާ މަސައްކަތް ހުއްޓާލާފައި ސަރވޭތަކަށް ނުވަތަ މި ދާ ޓީމުތަކާއެކު ހޮޓާތަކާ ކެފޭތައް ޗެކްކުރުމަށްޓަކާދާނެ. މިތަނުގައި މިހާރުވެސް ކޮންސްޓްރަކްޝަން ސައިޓްތައް ޗެކްކުރާ 10 ވަރަކަށް މުވައްޒަފުން އެބަތިބި. އެފަރާތްތައްވެސް މި މަސައްކަތުގައި އަޅުގަނޑުމެން ބޭނުންކުރާނަން. އެހެންކަމުން ބައެއް ޚިދުމަތްތައް މަޑުޖައްސާލާފައިވިޔަސް މިކަމަށް ޚާއްސަ އިސްކަމެއްދޭނަން" ސިފާ ވިދާޅުވިއެވެ.

މޭޔަރ ސިފާ ވިދާޅުވީ، ރާއްޖޭގައި މަސައްކަތްތެރިންގެ އާބާދީގެ ބޮޑުބައެއް ބިދޭސީން ހިއްސާކުރާއިރު، މާލޭގައި މަސައްކަތްކުރާ ބިދޭސީންނަށް ޚާއްސަކޮށްގެންވެސް ހޭލުންތެރިކުރުވުމުގެ މަސައްކަތްތަކެއް ކުރުމަށް ނިންމާފައިވާކަމަށެވެ. އެގޮތުން ބިދޭސީން ގެންގުޅޭ ތަންތަނާއި އެމީހުންގެ ކެއުންބުއިމުގެ އިންތިޒާމްތައް ހަމަޖައްސާތަންތަނުގެ ސާފުތާހިރުކަން ހުރިނެތްގޮތް ބަލާ، ބޭނުންވާ މަޢުލޫމާތުތައް އެފަރާތްތަކަށް ފޯރުކޮށްދެމުންދާނެކަމަށް މޭޔަރ ވިދާޅުވިއެވެ.

"ޚާއްސަކޮށް ބިދޭސީން އުޅޭތަންތަނާއި، އެމީހުން ކައްކާތަންތަނުގެ ސާފުތާހިރުކަންވެސް ބަލާނަން. އަދި ބިދޭސީންނަށްވެސް އެނގޭނެހެން އެކި ބަސްބަހުން މި ބައްޔާ ގުޅުންހުރި މަޢުލޫމާތުތައް ހިއްސާކުރުމަށް މަސައްކަތްކުރާނަން. މިބަލި އެންމެ ފަސޭހައިން މި ފެތުރެނީ ކުޅުގެ ޒަރިއްޔާއިން. އެހެންކަމުން މިފަދަ ކަންކަމުން ދުރުވުމަށް އަޅުގަނޑުމެން ޚާއްސަކޮށް އިރުޝާދުދޭނަން" ސިފާ ވިދާޅުވިއެވެ.

މީގެ އިތުރުން މިސްކިތްތަކަކީވެސް ގިނަ އަދަދަކަށް މީހުން އެއްވާ ތަންތަންކަމުން މާލޭގެ މިސްކިތްތަކުގެ ސާފުތާހިރުކަން މިހާރަށްވުރެ ހަރުދަނާކޮށް، ބެލެހެއްޓޭނެ އިންތިޒާމް ޤާއިމުކުރަމުންދާކަމަށްވެސް ސިޓީ ކައުންސިލުން ވިދާޅުވެއެވެ. އަދި ކޯވިޑް-19އާއި ބަލިން ރައްކާތެރިވުމަށް އެޅޭނެ ފިޔަވަޅުތަކާގުޅޭ ގޮތުން ސިޓީ ކައުންސިލުގެ މެންބަރުންނާއި އެތަނުގައި މަސައްކަތްކުރާ މުވައްޒަފުންނަށް މަޢުލޫމާތު ހިއްސާކޮށްފައިވާކަމަށްވެސް ސިޓީ ކައުންސިލުން ވަނީ ވިދާޅުވެފައެވެ.