މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ސީއެންއެންއާ ގުޅިގެން ދިވެހިރާއްޖޭގެ ފަތުރުވެރިކަން އިޝްތިހާރުކުރުމަށް ކެމްޕެއިނެއް ފަށައިފިއެވެ.
ދިވެހިރާއްޖޭގެ ފަތުރުވެރިކަން އިޝްތިހާރުކުރުމަށް އެމްއެމްޕީއާރުސީން ސީއެންއެންއާއެކު އެއްބަސްވުމެއްގައި ސޮއިކޮށްފައިވާއިރު މިކެމްޕެއިން ކުރިޔަށް ގެންދިއުމަށް ހަމަޖެހިފައިވަނީ މާރޗް މަހުން ފެށިގެން ތިން މަސްދުވަހުގެ މުއްދަތަކަށް ކަމަށް އެމްއެމްޕީއާރުސީން މައުލޫމާތުދެއެވެ.
އެމްއެމްޕީއާރުސީއިން ބުނީ މި ކެމްޕެއިންގެ މަޤްސަދަކީ ސީއެންއެންއާ ގުޅިގެން ދިވެހިރާއްޖޭގެ ފަތުރުވެރިކަން ދުނިޔޭގެ އެކި ކަންކޮޅުތަކުގައި އިޝްތިހާރުކުރުންކަމަށެވެ. އަދި ކެމްޕެއިންގެ ތެރެއިން ސީއެންއެންގެ ހަބަރު ޗެނަލްތަކާއި، ވެބްސައިޓްގެ އިތުރުން މީސްމީޑިއާގައިވެސް ރާއްޖެ ފޮޓޯ އަދި ވީޑިއޯތައް ޝާއިރުކުރެވިގެންދާނެކަމަށް އެމްއެމްޕީއާރުސީން ބުނެއެވެ.
ސީއެންއެންއާއި އެކު އެމްއެމްޕީއާރުސީން ރާއްޖެ އިޝްތިހާރުކުރުމަށް ކުރިޔަށްގެންދާ ހަރަކާތް އަމާޒުކުރެވިފައިވާނީ ދެކުނު އޭޝިއާ، އޭޝިއާ ޕެސިފިކް، މެދުއިރުމަތި، އެފްރިކާ އަދި ޔޫރަޕްގެ މާކެޓަށެވެ.
އެމްއެމްޕީއާރުސީން ބުނީ މިއީ ރާއްޖެއިޝްތިހާރުކުރުމަށް މިއަހަރު ކުރިޔަށްގެންދާ އެންމެ މުހިންމު އެއް ހަރަކާތްކަމަށެވެ. މީގެއިތުރުންވެސް މިއަހަރު ދިވެހިރާއްޖެ މަޤުބޫލު ފަތުރުވެރި މަންޒިލެއްގެ ގޮތުގައި ޕްރޮމޯޓްކުރުމަށް 23 މާކެޓަކަށް އަމާޒުކޮށްގެން ގިނަ ހަރަކާތްތަކެއް ހިންގުމަށް ރާވާފައިވާކަމަށް އެމްއެމްޕީއާރުސީން މައުލޫމާތުދެއެވެ.
އަނެއްކޮޅުން ދުނިޔޭގައި ފެތުރެމުންދާ ކޮވިޑް-19 ގެ ސަބަބުން ފަތުރުވެރިކަމުގެ ދާއިރާއަށް ކުރިމަތިވަމުންދާ ގޮންޖެހުންތަކުން އަރައިގަތުމަށްވެސް އެމްއެމްޕީއާރުސީން ދަނީ ހާއްސަ މަސައްކަތްތަކެއް ކުރަމުންނެވެ.