މޯލްޑިވްސް ޙައްޖު ކޯރޕަރޭޝަން ލިމިޑެޓުގެ މާރިޗުމަހުގެ ޢުމްރާ ދަތުރު ކެންސަލްކޮށްފިއެވެ.
ޙައްޖު ކޯޕަރޭޝަންގެ މާރިޗުމަހުގެ ޢުމްރާ ދަތުރު ކެންސަލްކޮށްފައިވަނީ ކޮރޯނާ ވައިރަސް ނުވަތަ ކޯވިޑް-19 ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާތީ، އެކަމުގެ ސަބަބުން ފެތުރިދާނެ ބޮޑު ޞިއްޙީ ބަލި މަޑުކަމަކުން ސަލާމަތްވުމަށްޓަކާ އުމުރާގެ އަޅުކަމަށް އެހެން ޤައުމުތަކުގެ މީހުން ސަޢުދީ ޢަރަބިއްޔާއަށް އެތެރެވުން އެޤައުމުގެ ސަރުކާރުން ވަގުތީ ގޮތުން މަނާކޮށްފައި ވާތީކަމަށް އެކުންފުނިން ބުނެއެވެ.
މިކަމާގުޅިގެން ޙައްޖު ކޯޕަރޭޝަނުން ޢުމްރާ ދަތުރު ކެންސަލްކޮށްފައި ވާއިރު، މި ދަތުރާގުޅިގެން މާދަމާ ބޭއްވުމަށް ހަމަޖެހިފައިވާ ތަމްރީން ބައްދަލުވުންވެސް ވަނީ ކެންސަލްކޮށްފައެވެ. އަދި މާރިޗްމަހުގެ ޢުމްރާއާއި ގުޅިގެން ޢުމްރާވެރިން ޢަމަލުކުރަންވީގޮތް އެ ކޯޕަރޭޝަންގެ ފަރާތުން ޢުމްރާވެރިންނަށް އަންގަމުންދާނެކަމަށްވެސް ޙައްޖު ކޯރޕަރޭޝަނުން ބުނެފައިވެއެވެ.
އުމުރާގެ އަޅުކަމަށް މީހުން ސައޫދީ އަރަބިއްޔާއަށް އެތެރެވުމާއި، މައްކާ އާއި މަދީނާއަށް ޒިޔާރަތްކުރުން މަނާކުރުމުގެ އިތުރުން، ޓޫރިސްޓުންގެ ގޮތުގައިވެސް ބައެއް ޤައުމުތަކުން މީހުން އެތެރެވުން ސަޢޫދީ އަރަބިއްޔާއިން މިހާރު ވަނީ މަނާކޮށްފައެވެ.