ރާއްޖޭގައި އިންކިއުބޭޝަން ސެންޓަރުތައް ހިންގާނެގޮތުގެ ފްރޭމްވޯކް ހަދައިދޭނެ ކޮންސަލްޓަންޓެއް ހޯދަނީ
ޒުވާނުންނަށް މަސައްކަތްތެރިކަމުގެ ހުނަރުތައް ދަސްކޮށްދިނުމަށް ޤާއިމުކުރާ އިންކިއުބޭޝަން ސެންޓަރުތައް ހިންގާނެގޮތުގެ ފްރޭމްވޯކް ތައްޔާރުކޮށްދޭނެ ކޮންސަލްޓެންސީ ފާރމެއް ހޯދުމަށް އިޢުލާންކޮށްފައެވެ.
މި މަޝްރޫޢަކީ ދިވެހި ސަރުކާރުން ވަރލްޑް ބޭންކުގެ އެހީއާއެކު ތަންފީޒުކުރަން ހަމަޖެހިފައިވާ "މޯލްޑިވްސް އެންހޭންސިންގ އެމްޕްލޯއިބިލިޓީ އެންޑް ރެޒިލިއަންސް އޮފް ޔޫތު" ޕްރޮގްރާމުގެ ދަށުން ހިންގާ މަޝްރޫއެކެވެ. މިއީ އެކި ދާއިރާތަކުން ކުރިއަށް ދިއުމަށް ޒުވާނުންނަށް ބޭނުންވާ ތަފާތު ޓެކްނިކަލް އަދި ވޮކޭޝަނަލް ހުނަރުތައް ދަސްކޮށްދީ، ވަޒީފާގެ ބާޒާރަށް ޒުވާނުން ތައްޔާރުކުރުމުގެ މަޤްޞަދުގައި ހިންގާ މަޝްރޫޢެކެވެ. މި މަޝްރޫޢުގެ ދަށުން ޒަމާނީ ފެންވަރުގެ މަސައްކަތްތެރިކަމުގެ ހުނަރު ދަސްކޮށްދިނުމުގެ ތަމްރީން ފޯރުކޮށްދޭ 5 މަރުކަޒެއް ޤާއިމުކުރުމަށް ވަނީ ހަމަޖެހިފައެވެ.
މިއީ ވަރލްޑް ބޭންކުގެ އެހީގައި ހަޔަރ އެޑިއުކޭޝަން މިނިސްޓްރީއާއި އިކޮނޮމިކް މިނިސްޓްރީ ގުޅިގެން ހިންގުމަށް ހަމަޖެހިފައިވާ މަޝްރޫޢެކެވެ.
މަސައްކަތްތެރިކަމުގެ ހުނަރު ދަސްކޮށްދިނުމަށް ޤާއިމުކުރާ މި އިންކިއުބޭޝަން ސެންޓަރުތަކުން ވަޒީފާގެ ބާޒާރަށް އެންމެ ބޭނުންވާ ދާއިރާތަކުން ޒުވާނުން ތަމްރީން ކުރެވިގެންދާނެއެވެ. އެގޮތުން ފަތުރުވެރިކަމާއި، އިމާރާތްކުރުމުގެ ސިނާޢަތުގެ އިތުރުން އިންފޮމޭޝަން އެންޑް ކޮމިއުނިކޭޝަންސް ޓެކްނޮލޮޖީ، އައި.ސީ.ޓީ ދާއިރާއިން މީހުން ބިނާކުރުމަށް ޚާއްސަ އަޙައްމިއްޔަތުކަމެއް ދޭނެކަމަށް ހަޔަރ އެޑިއުކޭޝަން މިނިސްޓްރީން ވިދާޅުވެއެވެ.
ރާއްޖޭގެ 5 ސަރަޙައްދެއްގައި އިންކިއުބޭޝަން ސެންޓަރުތަކެއް ޤާއިމުކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ ސިޔާސަތުގެ ދަށުން މަތީ ތަޢުލީމުގެ ދާއިރާއިން ކުރުމަށް ކަނޑައަޅާފައިވާ ކަމެކެވެ. އެގޮތުން 2023 ވަނަ އަހަރުގެ ނިޔަލަށް މި އިންކިއުބޭޝަން ސެންޓަރުތައް ޤާއިމުކުރުމަށް ސަރުކާރުގެ ސްޓްރެޓިޖިކް އެކްޝަން ޕްލޭންގައިވެސް ވަނީ ހިމަނާފައެވެ.