މަސްތުވާތަކެތީގެ މައްސަލައެއްގައި ލަންކާއިން ދިވެހިންގެ ބަޔަކު ހައްޔަރުކޮށްފައިވާކަމުގެ މަޢުލޫމާތު ލިބިފައިވާކަމަށް މިނިސްޓްރީ އޮފް ފޮރިން އެފެއަރސްއިން ބުނެފިއެވެ.
މިކަމާއި ގުޅިގެން މިނިސްޓްރީއިން އިތުރު މަޢުލޫމާތު ޙާމަނުކުރިނަމަވެސް، މިނިސްޓްރީއިން ބުނެފައިވަނީ މި މައްސަލަ މިނިސްޓްރީއިން މިހާރު ބަލަމުންދާކަމަށެވެ.
ބައެއް ނޫސްތަކުގައި ރިޕޯޓްކޮށްފައިވާގޮތުން 4 ކިލޯގެ މަސްތުވާތަކެއްޗާއިއެކު 3 ދިވެހިން އަތުލައިގެންފައިވަނީ ލަންކާގެ ދެހިވަލާއިންނެވެ. އަތުލައިގަތް މަސްތުވާތަކެތީގެ މަގުމަތީއަގު 40 މިލިއަން ރުޕީސްއަށް ވުރެ މަތިވާނެ ކަމަށް ވެސް ރިޕޯޓްކޮށްފައި ވެއެވެ.
ލަންކާގެ ފުލުހުން ހިންގި އޮޕަރޭޝަންގައި މި މައްސަލައާއި ގުޅިގެން ޖުމްލަ 6މީހުން ފުލުހުންގެ ބެލުމުގެދަށަށް ގެންދިޔަކަށް ބުނެފައިވެއެވެ. އަދި އެމީހުން ބޭނުންކުރި 2 އުޅަނދެއްވެސް ވަނީ ހިފަހައްޓާފައެވެ.
މި މައްސަލައިގައި ހިމެނޭ މީހުންގެ ބަންދާއި މެދު ގޮތެއް ނިންމުމަށް މިއަދު ކޯޓަށް ގެންދިއުމަށްވަނީ ހަމަޖެހިފައެވެ.
ލަންކާއަކީ ދިރިއުޅުމަށާއި، އަދި ތަޢުލީމް ޙާސިލްކުރުމަށް ގިނަ އަދަދެއްގެ ދިވެހިން ގޮސްއުޅޭ ޤައުމެކެވެ. މީގެކުރިންވެސް މިފަދަ ބައެއް ކުށްތަކުގައި ލަންކާގައި ދިވެހިން ހައްޔަރުކޮށްފައި ވެއެވެ.