މިރޭވެސް ދިޔަވަރު ބޮޑުވާ ވަގުތުތަކުގައި އުދައަރާނެކަމަށް ލަފާކުރެވޭކަމަށް މޫސުމާއިބެހޭ ޤައުމީ އިދާރާއިން ވިދާޅުވެއްޖެއެވެ.
ވޭތުވެދިޔަ 2 ދުވަހު ވެސް ވަނީ ގިނަ ރަށްތަކަކަށް އުދަ އަރައި، ބައެއް ގެތަކަށް ލޮނުވަދެ ގެއްލުންވެފައެވެ.
މިގޮތުން އުދައިގެ އަސަރު އެންމެ ބޮޑަށް ކޮށްފައި ވަނީ ނ.ހޮޅުދޫއަށެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވީ އުދައެރުމުގެ ހާދިސާގައި އެރަށުގެ 15 ވަރަކަށް ގެއަށް ލޮނުވަދެފައި ވާކަމަށެވެ. އަދި ކައުންސިލާއި ގުޅިގެން ގެތަކަށް ލިބުނު ގެއްލުންތައް ދެނެގަތުމުގެ މަސައްކަތް ކުރަމުންދާކަމަށް މެޓު އޮފީހުން ވިދާޅުވެއެވެ. މީގެއިތުރުންވެސް ގދ.ތިނަދޫ، މ.މަޑުއްވަރީ، މ.ދިއްގަރު، ރ.ކިނޮޅަސް އަދި ގއ.ދެއްވަދޫއަށްވެސް އުދަ އަރައިގެން ރިޕޯޓްކުރިކަމަށް އެންޑީއެމްއޭއިން ވިދާޅުވިއެވެ.
މިރޭވެސް ދިޔަވަރު އެންމެ ބޮޑުވާނެކަމަށް ލަފާކުރެވެނީ މިރޭ ދަންވަރު 3:00 އާއި 4:50އާއި ދެމެދުގައިކަމަށް މެޓު އޮފީހުން ވިދާޅުވެއެެވެ.
މޫސުމާއި ބެހޭ ޤާއުމީ އިދާރާއިން ވިދާޅުވީ އުތުރުގެ އަތޮޅުތަކަށް ދިޔަވަރު އެންމެ ބޮޑުވާނެކަމަށް ލަފާކުރެވެނީ ދަންވަރު 3 ޖަހާކަށްހާއިރުކަމަށެވެ. އަދި މެދުރާއްޖޭގެއަތޮޅުތަކަށް ދަންވަރު 3:50 ހާއިރު ދިޔަވަރު ބޮޑުވާއިރު، ދެކުނުގެ އަތޮޅުތަކަށް ދިޔަވަރު އެންމެ ބޮޑުވާނީ ފަތިހު 4:50ހާއިރުގައި ކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއެވެ.
މެޓް އޮފީހުންވަނީ ވައިގަދަވެ ކަނޑުގަދަވާނެތީ އެކަމަށް ސަމާލުވުމަށްވެސް އިލްތިމާސްކޮށްފައެވެ. މެޓް އޮފީހުން ވިދާޅުވާ ގޮތުގައި މެދުރާއްޖެތެރެއާއި އުތުރުގެ އަތޮޅުތަކަށް 13މޭލާއި 23 މޭލާއި ދެމެދުގެ ބާރުމިނުގައި އަދި ދެކުނުގެ އަތޮޅުތަކަށް ގަޑިއަކު 8 މޭލާއި 18މޭލާއި ދެމެދުގެ ބާރުމިނުގައި ވައިޖެހޭނެއެވެ. އަދި މިވަގުތުތަކުގައި ކަނޑުގެ ބާނީގެ އުސްމިން ހުންނާނީ 3ފޫޓާއި 6ފޫޓާއި ދެމެދުގައެވެ.
މެޓް އޮފީހުން ލަފާކުރައްވާ ގޮތުގައި ކުރިއަށް އޮތް 2 ދުވަހުވެސް މުޅި ރާއްޖެއަށް ވިއްސާރަ ކުރާނެއެވެ.