ހުޅުމާލޭގައި އެންމެ ފަހުން މީހުން ދިރިއުޅެންފެށި ހައުސިންގ ޔުނިޓްތަކުގައި ހުރި މައްސަލަތައް ދެނެގަތުމަށް ހުޅުވާލި ފުރުސަތުގައި މި 704 ހައުސިންގ ޔުނިޓްގެ 9 އިމާރަތެއްގެ 14 ޔުނިޓަކުންވަނީ އެ ޔުނިޓްތަކުގައި ކަތުރުފަނި އަޅައިގެން މިނިސްޓްރީއަށް ރިޕޯޓްކޮށްފައެވެ.
މި ހުށައެޅުންތަކާއި ގުޅިގެން ޕެސްޓް ކޮންޓްރޯލް އެކްސްޕަރޓުން ހިމެނޭހެންވަނީ މި ފްލެޓްތައް ސަރވޭކޮށް ބަލާފައެވެ. ކަތުރުފަނި ނައްތާލުމަށް ކުރިއަށް ގެންދާ މަސައްކަތާއި ގުޅޭގޮތުން ހައުސިންގ މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ ދާޢޫދު އިބްރާޙިމް ވިދާޅުވީ ކަތުރުފަނި އަޅަން މެދުވެރިވި ސަބަބުތައް ސަރވޭކޮށް، އެކަން ކޮންޓްރޯލްކުރަން އެޅޭނެ ފިޔަވަޅުތަކާއި ގުޅޭގޮތުން މަޝްވަރާކޮށްފައިވާކަމަށެވެ.
"އަޅުގަނޑުމެން ކުރި ސަރވޭގައި ވަރަށް ބޮޑަށް ފާހަގަވީ ނޭގިވެސް މި ބެހެއްޓިގައި ހުންނަ އެކިއެކި ލަކުޑީގެ ބާވަތްތަކުގައި ކަތުރުފަނި އަށަގަންނަކަށް. ގޭގެ ބޭރުގައި މި ބަހައްޓާފައި ހުންނަ ޕެލެޓްތައް ދަށުގައިވެސް ވަރަށް ގިނައިން އެބަހުރި. އަދި ހަމަ މި ހުންނަ ލަކުޑިކޮޅުކޮޅަކީވެސް މި ފަނި ފަސޭހައިން އަށަގަންނަ ތަންތަން. މިފަދަ ގޮތްތަކުން ފްލެޓްތަކަށް އަސަރުކުރަނީ." ދާޢޫދް ވިދާޅުވިއެވެ.
ދާޢުދް ވިދާޅުވީ ގޭގޭގެ ވެރިންނާއި ހައުސިންގ މިނިސްޓްރީއާއި ވެފައިވާ އެއްބަސްވުމުގައ ގޭގެ އެތެރެއަށް ދިމާވާ މިފަދަ މައްސަލަތައް ޙައްލުކުރަންޖެހެނީ ގޭގެ ވެރިންކަމަށެވެ. ނަމަވެސް އާއްމުންގެ ޝަކުވާ ގިނަވަމުންދާތީ، މިކަމަށް ސަރވޭކޮށް މިނިސްޓްރީން ކަތުރުފަނި ނައްތާލަން ނިންމީ ބައެއް އެޕާޓްމަންޓް ތަކުގައި ވަރަށް ބޮޑަށް ކަތުރުފަނި އަޅާފައިވާތީކަމުގައި. ކަތުރުފަނި ގިނައިން ފެނިފައިވަނީ ބޭރުގައި ބަހައްޓާފައި ހުންނަ ލަކުޑިންކަމުން، ބޭރު ވެލިގަނޑަށް ކެމިކަލް އަޅައި ފަނިތައް ނައްތާލުމަށް ތައްޔާރުވަމުންދާކަމަށް ދާޢޫދް ވިދާޅުވިއެވެ.
"ކުރިއަށް އޮތް 15 ދުވައެއްހާ ދުވަހުގެ ތެރޭގައި އަޅުގަނޑުމެން ބިމަށް ކެމިކަލް އަޅައި މި ފަނިތައް ނައްތާލުމަށް މަސައްކަތް ފަށާނަން. އަދި ގެތަކުގައިވެސް ގޭގެ ވެރިން އެއްބަސްވާ އުސޫލަކުން ބޭސް ޖަހައި ކޮންޓްރޯލްކުރާނަން." ދަޢޫދް ވިދާޅުވިއެވެ.
ހުޅުމާލެ ފްލެޓްތަކުގެ ބޭރަކީ ގިނަ އަދަދަކަށް ފަތްޕިލާވެލީގެ ބާވަތްތައްވެސް ހައްދާފައި ހުންނަ ތަނެކެވެ. ކެމިކަލް އެޅުމަށްފަހު މި ތަކެތި ބޭނުން ނުކުރުމަށް މިނިސްޓްރީންވަނީ އިލްތިމާސްކޮށްފައެވެ. ކެމިކަލް ޖެހުމުގެ ކުރިން މިކަމާއި ގުޅޭ މަޢުލޫމާތު އާއްމުންނާއި ޙިއްސާކުރާނެއެވެ.
ހައުސިންގ މިނިސްޓްރީން ވިދާޅުވީ މިފަދަ ކަންކަމުން ރައްކާތެރިވުމަށް އާއްމުންގެ އަމިއްލަ އިސްނެގުމުގެ މަތިން މަސައްކަތް ކުރުން މުހިންމުކަމަށެވެ. އެގޮތުން ބޭރުގައި ލަކުޑިފަދަ ތަކެއްޗާއި، އަދި ކުނިފަދަ ތަކެތި ނުބެއްހެޓުމަށް ވަނީ އެދިފައެވެ.
ފްލެޓްތަކުގައި ހުރި މައްސަލަތައް ދެނެގަތުމަށް ކުރަމުންދާ މަސައްކަތުގެ ދަށުން، ޝަކުވާއަށް ހުޅުވާލުމުން 35 ފްލެޓަކުން 90 މައްސަލަވަނީ ހުށައަޅާފައެވެ. ކަތުރުފަނީގެ އިތުރުން އެހެން މައްސަލަތައް ޙައްލުކުރުމުގެ މަސައްކަތްވެސް ހައުސިންގ މިނިސްޓްރީއިން ވަނީ ފަށާފައެވެ.