ވިއްސާރަވެ ދެކުނުގެ ބައެއް އަތޮޅުތަކުގެ ރަށްތަކުގައި ފެން ބޮޑުވުމާގުޅިގެން އެމްއެންޑީއެފުން އެހީތެރިކަން ފޯރުވައިދެމުން އެބަދެއެވެ. ބޯކޮށް ވާރެވެހުމާއި ގުޅިގެން ފެން ބޮޑުވެ، ފެން ހިންދުމުގައި އެހީތެރިވަމުންދަނީ ގއ.ތިނަދުއާއި، ގދ.ގައްދުއަށެވެ.
ދެ ރަށުގައިވެސް ފެންބޮޑުވެފައިވަނީ ރަށުގަ އަޑިއަށްވާގޮތަށް ހުރި މަގުތަކުގައެވެ. އެމްއެންޑީއެފާއި ރަށްރަށުގެ ފުލުހުންނާއި ރަށު ކައުންސިލް ގުޅިގެން ދަނީ ޕަންޕު ބަހައްޓައިގެން މަގުތަކުން ފެންހިންދުމުގެ މަސައްކަތް ކުރަމުންނެވެ.
ވިއްސާރައިގައި ފެންބޮޑުވެ އެއްވެސް ގެއަކަށް ފެން ވަދެ ގެއްލުންވިކަމުގެ މަޢުލޫމާތު މިހާތަނަށް ލިބިފައެއް ނުވެއެެވެ. ފެންބޮޑުވެ ގެތަކަށް ފެން ވަދެފާނެތީ، އެމްއެންޑީއެފާއި މި ރަށްތަކުގެ ރައްޔިތުން ގުޅިގެންދަނީ ތިރިކޮށް ފެންވަންނާނެހެން ހުރި ގެތަކުގައި ވެލި ބަސްތާ ޖެހުމުގެ މަސައްކަތް ކުރަމުންނެވެ.
މޫސުމާއި ބެހޭ ޤައުމީ އިދާރާއިން ބުނެފައިވަނި ކުރިއަށް އޮތް 12 ގަޑިއިރުވެސް ދެކުނުގެ އަތޮޅުތަކަށް ގުގުރުމާއެކު ބޯކޮށް ވާރޭވެހޭނެކަމަށެވެ. އަދި އެހެން އަތޮޅުތަކަށް ކެރީގެ އަސަރު ފޯރިނަމަވެސް، އާއްމުގޮތެއްގައި މޫސުން ރަނގަޅުވާނެކަމަށްވަނީ ލަފާކޮށްފައެވެ.
މެޓުން ބުނެފައިވަނީ މެދުތެރޭގެ އަތޮޅުތަކުގެ ކަނޑުތައް ގަދަވާނެކަމަށާއި، ނަމަވެސް އެހެން ސަރަޙައްދުތަކުގެ ކަނޑުތައް އާދައިގެ ވަރަކަށް މަޑުވާނެކަމަށެވެ. ރާޅުގެ އުސްމިން އުޅޭނެކަމަށް ލަފާކޮށްފައިވަނީ 3 ފޫޓާއި 6 ފޫޓާއި ދެމެދުގެ އުސްމިނުގައެވެ.
މެދުތެރޭގެ އަތޮޅުުތަކުގެ ކަނޑުތައް ގަދަވާނެކަމަށް ލަފާކޮށްފައިވާތީ މި ސަރަޙައްދުތަކުގައި ކަނޑު ދަތުރުކުރާ ފަރާތްތަކުން ސަމާލުވުމަށްވަނީ އިލްތިމާސްކޮށްފައެވެ.
އަދި ދިޔަވަރު ބޮޑުވާ ގަޑިތަކުގައި އުދަ އަރާނެކަމަށް ލަފާކޮށްފައިވާތީ، އެކަމަށް ސަމާލުވުމަށްވެސް މެޓް އޮފީހުންވަނީ އިލްތިމާސްކޮށްފައެވެ.