ވެލާނާ އިންޓަރނެޝަނަލް އެއަރޕޯޓުގައި އިމާރާތްކުރާ އައު ސީޕްލޭން ޓަރމިނަލުން ޖާގަ ކުއްޔަށް ދިނަސް، އެތަން ހިންގާނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްއިންކަމަށް އެކުންފުނިން ބުނެފިއެވެ.
އެމް.އޭ.ސީ.އެލުން މިކަން ހާމަކޮށްފައިވަނީ އައު ސީޕްލޭން ޓަރމިނަލް ހިންގުން އެހެން ބަޔަކާއި ހަވާލުކުރަން އުޅޭކަމަށްބުނެ، އެކަމުގެ ކަންބޮޑުވުން ސޯޝަލް މީޑިއާގައި އުފުލަމުންދާ ދަނޑިވަޅެއްގައެވެ. އެމްއޭސީއެލްއިން ބުނީ އައު ސީޕްލޭން ޓަރމިނަލުން ޖާގަ ކުއްޔަށް ދިނުމާ ގުޅޭގޮތުން ސީޕްލޭން އޮޕަރޭޓަރުންނާއެކު ކުރިއަށްދާ މަޝްވަރާތައްވެސް މިވަގުތަށް މަޑުޖައްސާލާފައިވާކަމަށެވެ.
އެމް.އޭ.ސީ.އެލުން ބުނީ އައު ސީޕްލޭން ޓާރމިނަލުން ޖާގަ ކުއްޔަށް ދިނުމަށް މިހާތަނަށް އައިއިރު، އެއްވެސް އޮޕަރޭޓަރަކާއެކު އެއްބަސްވެވިފައިނުވާކަމަށެވެ. އަދި އެކުންފުންޏާ ސީޕްލޭން އޮޕަރޭޓަރުންނާއި ދެމެދު ކުރިއަށްގެންދިޔަ މަޝްވަރާތައް މަޑުޖައްސާލާފައިވަނީ ކަމާބެހޭ ފަރާތްތަކުގެ އިރުޝާދުގެ މަތިންކަމަށްވެސް އެކުންފުނިން ބުނެއެވެ.
އެމް.އޭ.ސީ.އެލުން ބުނީ އައު ސީޕްލޭން ޓަރމިނަލާއި ވީވީއައިޕީ އިމާރާތް ހިންގާ ބަލަހައްޓާނީ އެކުންފުނިންކަމަށެވެ. ނަމަވެސް އެކި އެކި ސީޕްލޭން އޮޕަރޭޓަރުންގެ އޮޕަރޭޝަން ހިންގާނީ، އޮޕަރޭޝަނަށް ބޭނުންވާ ޖާގަ އެ ޓާރމިނަލުން ކުއްޔަށްދީގެންކަމަށްވެސް އެމް.އޭ.ސީ.އެލުން ބުނެއެވެ.
އެމްއޭސީއެލްއިން ބުނީ އެއަރޕޯޓުގެ އައު ރަންވޭ އޮޕަރޭޓްކުރެވެން އޮތީ މިވަގުތު އެ ރަންވޭއާ އިންވެގެން ހުރި ޓްރާންސް މޯލްޑިވިއަން އެއާރވޭސް، ޓީ.އެމް.އޭގެ ވަސީލަތްތަކާއި، އެ ސަރަޙައްދުގައިވާ އެހެނިހެން އިމާރާތްތައް ހުސްކުރެވިގެންކަމަށެވެ. އަދި ޓީ.އެމް.އޭ.ގެ އިމާރާތްތައް ފިޔަވައި އެހެނިހެން އިމާރާތްތައް ކުރިއަށް އޮތް 2 މަސް ދުވަހުގެ ތެރޭގައި ހުސްކުރުމަށް ހަމަޖެހިފައިވާ ކަމަށާއި، ޓީ.އެމް.އޭގެ އިމާރާތްތައް ހުސްކުރެވެން އަންނަނީ މިވަގުތު މަޑު ޖައްސާލާފައިވާ މަޝްވަރާތަކަށް ޙައްލެއް ލިބި، ޓީ.އެމް.އޭގެ ފެސިލިޓީސްތައް ރިލޮކޭޓް ކުރެވިގެން ކަމަށް އެމް.އޭ.ސީ.އެލުން ބުނެއެވެ.
އަލަށް އިމާރާތްކުރަމުންދާ ސީޕްލޭން ޓާރމިނަލަކީ ސީޕްލޭން އޮޕަރޭޓް ކުރާ ފަރާތްތަކާއި، ޓާރމިނަލް މެނޭޖްކުރާ ފަރާތްތަކުގެ އިދާރީ މަސައްކަތް ކުރާނެ ޖާގަ ހިމެނޭހެން ޒަމާނާ އެއްގޮތަށް ފަރުމާ ކޮށްފައިވާ ތަނެކެވެ. އަދި އެތަނަކީ ވީ.ވީ.އައި.ޕީ ލައުންޖާއި ޕެސެންޖަރ އަދި ބެގޭޖް ހެންޑްލިން ފެސިލިޓީގެ އިތުރުން ރީޓޭލް ވިޔަފާރިއާއި އެފް.އެންޑްބީގެ ޚިދުމަތް ފަސޭހަ ކަމާއެކުލިބޭ ގޮތަށް ތައްޔާރު ކޮށްފައިވާ ތަނެކެވެ.
26 މިލިއަން ޑޮލަރު ޚަރަދު ކޮށްގެން އިމާރާތް ކުރާ މިކޮމްޕްލެކްސްގައި 4 ފަންގިފިލާގެ ސީޕްލޭން ޓާރމިނަލަކާއި އެއް ފަންގިފިލާގެ ވީ.ވީ.އައި.ޕީ އިމާރާތެއް ހިމެނެއެވެ. އައު ސީޕްލޭން ޓާރމިނަލް ފަރުމާ ކޮށްފައިވަނީ މަލްޓި އޮޕަރޭޓަރުންނަށް މަސައްކަތްކުރެވޭ ގޮތަށެވެ. މިހާރު މަސައްކަތް ކުރިއަށްދާ ސްޕީޑަށް ބަލާނަމަ، މިއަހަރުގެ މޭމަހުގެ ތެރޭގައި ޓަރމިނަލްގެ މަސައްކަތް ނިންމާ، އެތަން ހުޅުވޭނެކަމަށްވެސް އެމް.އޭ.ސީ.އެލްއިން ބުނެއެވެ.