އެމް.ޕީ.އެލުން ބަހުގެ ޚިދުމަތްދިނުމަށް ބޭނުންކުރާ ބަސްތަކުގެ ސްޕީޑް، މޯބައިލް އެޕްލިކޭޝަނެއް މެދުވެރިކޮށް މޮނިޓަރކުރެވޭނެ އިންތިޒާމް މިހާރު ޤާއިމުކޮށްފައިވާކަމަށް އެކުންފުނިން ވިދާޅުވެއްޖެއެވެ. ދުވާލެއްގެ މައްޗަށް ފަސްހާހާއި ހަހާހާއި ދެމެދުގެ މީހުން އެމް.ޕީ.އެލްގެ ބަހުގެ ޚިދުމަތް ބޭނުންކުރާއިރު، ފަސިންޖަރުންގެ ސަލާމަތާއި ރައްކާތެރިކަން ކަށަވަރުކުރުމަށް ޚާއްސަ ސަމާލުކަމެއްދެމުންދާކަމަށް އެކުންފުނިން ވިދާޅުވެއެވެ.
ސިނަމާލެ ބްރިޖު ޢާއްމުދަތުރުތަކަށް ހުޅުވާލުމާއެކު، އެމް.ޕީ.އެލްއިން އަންނަނީ މާލެއާއި ހުޅުލެއާއި ހުޅުމާލެއާ ދެމެދު ބަހުގެ ޚިދުމަތް ދެމުންނެވެ. ގްރޭޓަރ މާލެ ޓްރާންސްޕޯޓް ލިންކުގެ ނަމުގައި މިޚިދުމަތްދޭތާ މިހާރު އަހަރަކަށްވުރެ ގިނަ ދުވަސްވެފައިވާއިރު، ބަހުގެ ޚިދުމަތް ފުޅާކުރުމަށް އެކުންފުނިން ދަނީ މަސައްކަތްކުރަމުންނެވެ. މި ޚިދުމަތް ދިނުމުގައި އެންމެބޮޑު ސަމާލުކަމެއްދެނީ ފަސިންޖަރުންގެ ސަލާމަތާއި ރައްކާތެރިކަން ކަށަވަރުކުރުމަށްކަމަށް އެމް.ޕީ.އެލުން ބުނެއެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން ގްރޭޓަރ މާލެ ޓްރާންސްޕޯޓު ލިންކުގެ މެނޭޖަރ އިބްރާހީމް މައުމޫން ވިދާޅުވީ، އެންމެ ބާރަށް ބަސް ދުއްވޭނެ ސްޕީޑް ލިމިޓެއްގެ ގޮތުގައި 50 މީޓަރު ކަނޑައަޅައި ބަސް ދުއްވާ ސްޕީޑް ލައިވްކޮށް މޮނިޓަރކުރެވޭނެ ނިޒާމެއް މިހާރު ޤާއިމުކޮށްފައިވާކަމަށެވެ. އެގޮތުން މޯބައިލް އެޕްލިކޭޝަނެއް މެދުވެރިކޮށް ބަސް ދަތުރުކުރާ ރޫޓާއި، ބަހުގެ ސްޕީޑް ސުޕަވައިޒަރަށް މިހާރު ވަގުތުން ބަލާލެވޭނެކަމަށާއި، ކަނޑައަޅާފައިވާ ލިމިޓަށްވުރެ ބާރަށް ބަސް ދުއްވާނަމަ އެކަން ޑްރައިވަރަށާއި ސުޕަވައިޒަރުގެ ސަމާލުކަމަށް މި އެޕް މެދުވެރިކޮށް ގެނެވޭނެކަމަށް މަޢުމޫން ވިދާޅުވިއެވެ.
މާލެއާއި ހުޅުމާލެއާ ދެމެދު އެންމެ ފުރަތަމަ އެމް.ޕީ.އެލުން ބަހުގެ ޚިދުމަތް ދޭން ފެށިއިރު ބަސް ސްޓޮޕްތަކުގެ ގޮތުގައި ބޭނުންކޮށްފައިވަނީ މާލެއާއި ހުޅުމާލޭގައި އެކުންފުނިން ހަދާފައިވާ 2 ޓަރމިނަލް އެކަންޏެވެ. ނަމަވެސް މިހާރު މާލެއާއި ހުޅުމާލޭގެ ޖުމްލަ 16 ތަނަކަށް ބަސް މަޑުކުރެއެވެ.
ޚިދުމަތަށް އޮންނަ ޑިމާންޑަށް ބަލާ ބަސް ދަތުރުކުރާ ރޫޓްތައް އިތުރު ކުރުމުގެ މަސައްކަތް އެމް.ޕީ.އެލުން ދަނީ ކުރަމުންނެވެ. އެގޮތުން ކާނިވާ ސަރަޙައްދުގައި އިތުރު ބަސް ސްޓޮޕެއް ހެދުމުގެ މަސައްކަތް ކުރަމުންދާއިރު، ޖެނުއަރީމަހުގެ ތެރޭގައި އެތަން ބޭނުންކުރަން ފަށާނެކަމަށް ގްރޭޓަރ މާލެ ޓްރާންސްޕޯޓް ލިންކުގެ އެސިސްޓެންޓް މެނޭޖަރ މުޙައްމަދު ޝާމް ވިދާޅުވިއެވެ.
ޢާއްމު ރައްޔިތުންނަށް ވީހާވެސް ފަސޭހައިން ބަހުގެ ޚިދުމަތް ދިނުމުގެ ގޮތުން އެމް.ޕީ.އެލުން ދާދިފަހުން ވަނީ ޚާއްސަ މޯބައިލް އެޕްލިކޭޝަނެއްވެސް ތަޢާރަފުކޮށްފައެވެ. މި އެޕްލިކޭޝަން މެދުވެރިކޮށް ބަހުގެ ޝެޑިއުލާއި، ބަސް ސްޓޮޕްތަކާއި، ދަތުރުކުރާ ރޫޓްތައް ފަސޭހައިން ބަލާލެވޭނެއެވެ. އަދި ދަތުރުކުރުމަށް ބޭނުންކުރާ ޓަޗްލިންކް ކާޑުގެ ބެލެންސް ބަލާލުމުގެ އިތުރުން، ޓޮޕް-އަޕް ނުވަތަ ކާޑު ރީޗާރޖްކުރެވޭނެ ތަންތަންވެސް މި އެޕްލިކޭޝަން މެދުވެރިކޮށް ބެލޭނެކަމަށް އެމް.ޕީ.އެލުން ބުނެއެވެ. މާލެ، ހުޅުލެ އަދި ހުޅުމާލެއާއި ދެމެދު ބަހުގެ ޚިދުމަތް ދިނުމަށް 22 ބަހެއް އެމް.ޕީ.އެލްއިން ބޭނުންކުރެއެވެ.