މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްއަށް އައު ސީޕްލޭން ޓަރމިނަލް ނުހިންގޭންވީ އެއްވެސް ސަބަބެއް ނެތްކަމަށް އިކޮނޮމިކް މިނިސްޓަރ އަލްއުސްތާޛު ފައްޔާޟް އިސްމާޢީލް ވިދާޅުވެއްޖެއެވެ.
އިކޮނޮމިކް މިނިސްޓަރ މިހެން ވިދާޅުވެފައިވަނީ އައު ސީޕްލޭން ޓަރމިނަލް ހިންގުން އެހެން ބަޔަކާ ހަވާލުކުރަން އުޅޭކަމަށްބުނެ އެކަމުގެ ކަންބޮޑުވުން ބައެއް ފަރާތްތަކުން ސޯޝަލް މީޑިއާގައި ފާޅުކުރަމުންދާ ދަނޑިވަޅެއްގައެވެ. އައު ސީޕްލޭން ޓަރމިނަލް ހިންގުން އެމް.އޭ.ސީ.އެލާއި ހަވާލުކުރުމަށް އެއްބަޔަކު ތާއީދުކުރާއިރު، އަނެއްބަޔަކު ދަނީ އެކަމާ ދެކޮޅަށްވެސް ޝުޢޫރު ފާޅުކުރަމުންނެވެ.
އިކޮނޮމިކް މިނިސްޓަރ ފައްޔާޟް ކުރެއްވި ޓުވީޓެއްގައި ވިދާޅުވީ، ވެލާނާ އިންޓަރނޭޝަނަލް އެއަރޕޯޓް ތަރައްޤީކޮށް ހިންގުން، އިންޑިއާގެ ޖީ.އެމް.އާރ ކުންފުނީގެ އަތުން ނެގުނީ، އެކަން ކުރުމުގެ ޤާބިލުކަން އެމް.އޭ.ސީ.އެލްގައި ހުރުމުންކަމަށެވެ. އަދި ސީޕްލޭން ޓަރމިނަލް ހިންގުމުގެ ފުރިހަމަ ޤާބިލުކަން އެމް.އޭ.ސީ.އެލްގައި އެބަހުރިކަމަށާއި، އެކަން އެގޮތަށް ކުރާނެކަމާމެދު ޝައްކެއްނެތްކަމަށެވެ. ދުނިޔޭގެ އެންމެ ބޮޑު ސީޕްލޭން އޮޕަރޭޝަން އޮޕަރޭޓްކުރަން ހަވާލުކުރަންވާނީ އެކަމުގެ ތަޖުރިބާއާއި ޤާބިލުކަން ހުރި ބަޔަކާއި ކަމަށާއި، އެވަރުގެ ކެޕޭސިޓީއެއް އެމް.އޭ.ސީ.އެލްގެ ކިބައިގައި ހުރިތޯ ބައެއް ފަރާތްތަކުން ސުވާލު އުފައްދާފައިވާއިރު، މިނިސްޓަރ ފައްޔާޟް ވަނީ އެކަމަށްވެސް ރައްދުދެއްވާފައެވެ.
މިނިސްޓަރ ފައްޔާޟް ވިދާޅުވީ، ވީ.އައި.އޭ އޮޕަރޭޓްކޮށް މެނޭޖްކުރުމަށް އެމް.އޭ.ސީ.އެލުން ކުރާ މަސައްކަތާއި އަޅާބަލާއިރު ސީޕްލޭން ޓަރމިނަލަކީ ވަރަށް "ކުޑަ"ތަނެއްކަމަށެވެ. އަދި ސީޕްލޭން ޓަރމިނަލް އެމް.އޭ.ސީ.އެލްއަށް ނުހިންގޭންވީ އެއްވެސް ސަބަބެއް ނެތްކަމަށްވެސް އިކޮނޮމިކް މިނިސްޓަރ ވިދާޅުވެފައިވެއެވެ. ސީޕްލޭން ޓަރމިނަލް އޮޕަރޭޓްކުރެވޭ ފެންވަރުގެ ޤާބިލު މުވައްޒަފުން ހޯދުމަކީވެސް އެމް.އޭ.ސީ.އެލްއަށް ކުރެވޭނެ މަސައްކަތެއްކަންވެސް މިނިސްޓަރ ފާހަގަކުރައްވާފައިވެއެވެ.
އައު ސީޕްލޭން ޓަރމިނަލް ހިންގުން ބަޔަކާއި ހަވާލުކުރުމާގުޅޭގޮތުން އެންޓި ކޮރަޕްޝަން ކޮމިޝަން އޭ.ސީ.ސީއަށްވެސް މައްސަލައެއް ހުށަހެޅިފައިވާކަމަށާއި، އެކަން ބަލަމުންދާކަމަށް އެކޮމިޝަނުން ވަނީ ވިދާޅުވެފައެވެ. އައު ސީޕްލޭން ޓަރމިނަލްގެ މަސައްކަތް އެއްކޮށް ނިންމާ، އަންނަ މޭމަހުގެ ތެރޭގައި އެތަން އޮޕަރޭޝަނަށް ގެނެވޭވަރު ވާނެކަމަށް އެމް.އޭ.ސީ.އެލުން ބުނެފައިވާއިރު، އެތަން ހިންގާނީ އެމް.އޭ.ސީ.އެލުން ކަމަށް އެކުންފުނީގެ އެކްޓިންގ މެނޭޖިންގ ޑިރެކްޓަރ މޫސާ ޞާލިޙު ވަނީ މިމަހުގެ 18ވަނަ ދުވަހު ވިދާޅުވެފައެވެ. އަދި އައު ސީޕްލޭން ޓަރމިނަލަށް މިހާރު ސީޕްލޭންގެ ޚިދުމަތްދެމުންދާ ކުންފުނިތަކުގެ އޮޕަރޭޝަންސްތައް ވީހާވެސް އަމާންކަމާއެކު ބަދަލުކުރުމުގެ މަސައްކަތް އެކުންފުނިން ކުރާނެކަމަށްވެސް މޫސާ ޞާލިޙު ވިދާޅުވެފައިވެއެވެ.
އައު ސީޕްލޭން ޓަރމިނަލް ހިންގަން ބޭރުގެ ކުންފުންޏަކަށް ދޭން އުޅޭކަމަށްބުނެ މީިގެ ކުރިންވެސް އަޑުތަކެއް ފެތުރިފައިވާއިރު، ސަރުކާރުން ވަނީ އެކަން ދޮގުކުރައްވާފައެވެ. އަދި ދައުލަތުގެ ޢާމްދަނީއަށް އަސަރުކުރާގޮތަށް ސީޕްލޭން ޓަރމިނަލް ކުއްޔަށް ދޫކުރަން އުޅޭކަމަށް ކުރެވޭ ތުހުމަތުތަކާގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީން ވަނީ ޚާއްޞަ އޮޑިޓެއްވެސް ހަދާފައެވެ.