ދިވެހިރާއްޖޭގެ އަޑުގެ މީޑިއަމްވޭވްގެ ޚިދުމަތް މުޅި ރާއްޖެއަށް އަވަސް މުސްތަޤުބަލެއްގައި ލިބޭނެ - ޕީ.އެސް.އެމް
ދިވެހިރާއްޖޭގެ އަޑުގެ މީޑިއަމްވޭވްގެ ޚިދުމަތް ގިނަ ދުވަސްތަކެއްވަންދެން މެދުކެނޑިފައިއޮތުމަށްފަހު، އަލުން ދޭންފެށުމަށްޓަކާ ޓެސްޓްކުރުމުގެ މަސައްކަތް ފަށައިފިއެވެ.
ދިވެހިރާއްޖޭގެ އަޑު ހިންގާ ކުންފުނި ޕީ.އެސް.އެމްގެ ޗީފް ޓެކްނިކަލް އޮފިސަރ ޙުސެއިން ޝުހާދު ވިދާޅުވީ، އަޑުގެ މީޑިއަމްވޭވްގެ ޚިދުމަތް މިހާރު ރާއްޖޭގެ ބޮޑު ސަރަޙައްދަށް ލިބޭނެކަމަށާ، މީޑިއަމްވޭވްގެ ކަވަރޭޖް ވަރުގަދަކުރުމަށްޓަކާ އިތުރަށް ޓެސްޓުކުރުމުގެ މަސައްކަތް ކުރަމުންދާކަމަށެވެ.
އަދި ރާއްޖޭގެ އެންމެ އުތުރާއި އެންމެ ދެކުނުގެ ބައެއްރަށްތައް ފިޔަވައި އެހެން ހުރިހައި ސަރަޙައްދުތަކަށްވެސް މީޑިއަމްވޭވް މެދުވެރިކޮށް ދިވެހިރާއްޖޭގެ އަޑު ސާފުކޮށް ލިބޭނެކަމަށާ، ސާފުކޮށް ނުލިބޭ ސަރަޙައްދުތަކަށްވެސް އަށްޑިހަ ނުވަ މެގަހާރޑްސް އެފް.އެމް ބޭންޑުމެދުވެރިކޮށް ދިވެހިރާއްޖޭގެ އަޑު ލިބޭނެކަމަށް ޝުހާދު ވިދާޅުވިއެވެ.
ދިވެހިރާއްޖޭގެ އަޑުގެ ޚިދުމަތް އެންމެ ޒަމާނީ ފެންވަރަށް ތަރައްޤީކޮށް، ޑިޖިޓަލައިޒްކުރުމަށް ޕަބްލިކް ސަރވިސް މީޑިއާއިން ކުރިއަށްގެންދާ މި މަޝްރުޢޫގެ މަސައްކަތް ކުރިއަށްއޮތް މަދު ދުވަސްކޮޅެއްގެ ތެރޭގައި އެއްކޮށް ނިންމާ، ދިވެހިރާއްޖޭގެ އަޑުގެ މީޑިއަމްވޭވްގެ ޚިދުމަތް މުޅި ރާއްޖެއަށް ލިބިގެންދާނެކަމަށް ޝުހާދު ވިދާޅުވިއެވެ.
1449 ކިލޯހާރޑްސް މީޑިއަމްވޭވްގެ ފްރިކުއެންސީ މެދުވެރިކޮށް ދިވެހިރާއްޖޭގެ އަޑުގެ ޓެސްޓް ސިގްނަލް މީހާރު ދޫކޮށްފައިވާއިރު، އަޑުގެ ސާފު ނުވަތަ ނުސާފު މިންވަރު 3000222 އަކަށް ގުޅުއްވައިގެން އެންގެވުމަށް އެހުންތެރިންނަށް ދިވެހިރާއްޖޭގެ އަޑުން ވަނީ އިލްތިމާސްކޮށްފައެވެ.
ދިވެހިރާއްޖޭގެ އަޑުގެ މީޑިއަމްވޭވްގެ ޚިދުމަތް މެދުކެނޑިފައިވަނީ ސިނަމާލެ ބްރިޖުގެ މަސައްކަތަށް ހެންވޭރު އަޑިޕާކް ސަރަހައްދުގައި ހުރި އެންޓަނާތައް ނެގުމުންނެވެ. އެތަނުން އެންޓަނާތައް ނެގުމަށްފަހު މިހާރު ވަނީ ތިލަފުށްޓަށް ބަދަލުކޮށްފައެވެ.