ހައުންސިންގ ނީޑް އެސެސްމަންޓުގައި 170 ކައުންސިލަކުން ވަނީ މަޢުލޫމާތު އެއްކުރެވިފައި - ހައުސިން މިނިސްޓްރީ

ސަރުކާރުން ކުރިއަށްގެންދިޔަ ހައުންސިންގ ނީޑް އެސެސްމަންޓުގައި ސަތޭކަ ހަތްދިހަ ކައުންސިލަކުން ފުރިހަމަ މަޢުލޫމާތު އެއްކުރެވިފައިވާކަމަށް މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓުން ވިދާޅުވެއްޖެއެވެ.

ހައުސިންގ މިނިސްޓްރީން ވިދާޅުވީ، ރާއްޖޭގެ ބޯހިޔާވަހިކަމުގެ ހާލަތު ދެނެގަތުމަށް ކޮންމެ އަހަރަކުވެސް ހައުސިންގ ނީޑް އެސެސްމަންޓް ހެދުމަށް ނިންމާފައިވާކަމަށެވެ.

ރައްޔިތުންނަށް އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަކީ ސަރުކާރުގެ އަމާޒެއްކަމަށްވާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އިސްނެންގެވުމަށް ރާއްޖޭގައި ބޯހިޔާވަހިކަމުގެ ޙާލަތު އޮތް މިންވަރު ދެނެގަތުމުގެ މަސައްކަތް ހައުސިންގ މިނިސްޓްރީން ދަނީ ކުރަމުންނެވެ. އެގޮތުން މުޅި ރާއްޖެ ހިމެނޭހެން ހައުންސިންގ ނީޑް އެސެސްމަންޓެއް މިއަހަރުގެ ތެރޭގައި ހަދާފައިވާއިރު، މިއީ ހަމަހަމަކަމާއި އިންސާފުވެރިކަމާއެކު ބޯހިޔާވަހިކަން ފޯރުވައިދިނުމަށް ކުރާ މަސައްކަތަށް ލިބިގެންދާ ބޮޑު ކުރިއެރުމެއްގެ ގޮތުގައި ހައުންސިންގ މިނިސްޓްރީން ސިފަކުރައްވައެވެ.

ހައުސިންގ މިނިސްޓްރީގެ ސްޓޭޓް މިނިސްޓަރ އަޙްމަދު ނަޝީދު ވިދާޅުވީ، މި އެސެސްމަންޓަކީ ކޮންމެ އަހަރަކުވެސް ސަރުކާރުން ކުރިއަށްގެންދިއުމަށް ނިންމާފައިވާ އެސެސްމަންޓެއްކަމަށެވެ. އެގޮތުން މިއަހަރު ކުރިއަށްގެންދިޔަ ހައުސިންގ ނީޑް އެސެސްމަންޓް ރިޕޯޓަށް 170 ކައުންސިލަކުން ފުރިހަމަ މަޢުލޫމާތު އެއްކުރެވިފައިވާކަމަށް ސްޓޭޓް މިނިސްޓަރ ވިދާޅުވިއެވެ. އަދި 11 ކައުންސިލަކުން އެންމެ ބޭނުންވި މިންވަރަށް މަޢުލޫމާތު ނުލިބުން ނަމަވެސް ހުރިހާ ކައުންސިލެއް ހިމެނޭހެން ރިޕޯޓަށް ބޭނުންވާ މަޢުލޫމާތު އެއްކުރެވިފައިވާކަމަށް ނަޝީދު ވިދާޅުވިއެވެ.

"ލިޔެކިޔުމުން އަޅުގަނޑުމެން އެންމެ ބޭނުންވި މިންވަރަށް މަޢުލޫމާތު ނުލިބުންނަމަވެސް ހުރިހާ ކައުންސިލަކުންވެސް އަޅުގަނޑުމެން މަޢުލޫމާތު އެއްކޮށްފައި ފުރަތަމަ އަހަރަށް ބޭނުންވާ ހައުސިންގ ނީޑް އެސެސްމެންޓް މިހާރު ވަނީ އެއްކޮށް ނިންމާފައި. މި އެސެސްމަންޓް ކޮންމެ އަހަރަކުވެސް ހަދާނަން. މަޢުލޫމާތު އެއްކޮށް އަޕްޑޭޓްކުރުމުގެ ކަންކަން ކުރަމުންދާނަން" ހައުސިންގ ސްޓޭޓް މިނިސްޓަރ އަޙްމަދު ނަޝީދު ވިދާޅުވިއެވެ.

ހައުސިންގ މިނިސްޓްރީގެ ސްޓޭޓް މިނިސްޓަރ ނަޝީދު ވިދާޅުވީ، ހައުސިންގ ނީޑް އެސެސްމަންޓް ހެދުމުގައި ރަށުގެ އާބާދީގެ ނިސްބަތާއި، އެރަށެއްގައި ގޯތިގެދޮރު ބެހިފައިވާގޮތާއި، ފަޅުގޯތި ހުރި މިންވަރަށް ބަލާފައިވާކަމަށެވެ. އަދި މިފަދަ އެސެސްމަންޓެއްގެ ސަބަބުން، ރާއްޖޭގެ ބޯހިޔާވަހިކަމުގެ ހާލަތު އޮތް މިންވަރު ދެނެގަނެ، ބޯހިޔާވަހިކަން އެންމެ ބޮޑަށް ބޭނުންވެފައިވާ ސަރަޙައްދުތައް ކަނޑައެޅުމުގައި ފަސޭހަތަކެއް ލިބިގެންދާނެކަން އޭނާ ފާހަގަކުރެއްވިއެވެ.

"މީހުން ދިރިއުޅޭ ގެތަކުގެ ވެރިންގެ ނަމާއި، އައިޑީ ކާޑު ނަންބަރާއި، ދާއިމީ އެޑްރެހާއި، އެރަށެއްގައި ގޯތިބެހިފައިވާގޮތުގެ ތަފްޞީލު އެބަ އެއްކުރަން. ގޯތިތަކުގެ ސައިޒުވެސް އަޅުގަނޑުމެން ބަލަން. އޭރުން އެނގޭނެ ރަށްރަށުގައި ގޯތިތައް ބެހިފައިމިވާގޮތާއި، ކޮންބަޔަކަށްކަން އެންމެ ބޮޑަށް ބޯހިޔާވަހިކަން މިހާރު ބޭނުންވެފައިވަނީ. ހާލަތު ދެނެގަތުމަށް ފަސޭހަވެގެންދާނެ" އަޙްމަދު ނަޝީދު ވިދާޅުވިއެވެ.

މުޅި ރާއްޖެ ހިމެނޭހެން ހަދާފައިވާ ހައުސިންގ ނީޑް އެސެސްމަންޓުގެ އަލީގައި އަންނަ އަހަރަށް ކުރިއަށްގެންދިއުމަށް ހަމަޖެހިފައިވާ ބޯހިޔާވަހިކަމުގެ މަޝްރޫޢުތައް މިހާރު ޕްލޭން ކުރަމުންދާކަމަށް ހައުސިންގ މިނިސްޓްރީން ވިދާޅުވެއެވެ. އެގޮތުން އަތޮޅު ތެރޭގައި 20000 ހައުސިންގ ޔުނިޓް އެޅުމަށް ވެފައިވާ ފްރޭމްވޯރކް އެގްރީމެންޓުގެ ދަށުން، ފްލެޓްތައް އަޅާނެ ރަށްތައް ފައިނަލް ކުރުމުގެ މަސައްކަތް ކުރަމުންދާކަމަށް އެ މިނިސްޓްރީން ވަނީ ވިދާޅުވެފައެވެ.