ސިނަމާލެ ބްރިޖާއި، ހައިވޭގައި ސީސީޓީވީ ސަރވައިލަންސް ކެމެރާ ބޭނުންކުރަން ފަށައިފިއެވެ.
މިކަން ހާމަކުރައްވާ ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓުވީޓެއްގައި ވިދާޅުވެފައިވަނީ ބްރިޖާއި ހައިވޭގައި ސީސީޓީވީ ސަރވައިލަންސް ކެމެރާ ހަރުކުރުމުގެ މަސައްކަތް ކުރިއަށްދާކަމަށާ، ބައެއް ކެމެރާތައް މިހާރުވެސް ބޭނުންކުރަން ފަށާފައިވާކަމަށެވެ. އަދި ސްޕީޑް ޑިޓެކްޝަން ކެމެރާތައްވެސް ބްރިޖާއި ހައިވޭގައި ހަރުކުރުމަށް މިހާރު ތައްޔާރުވަމުންދާކަމަށާއި، މި ކެމެރާތަކަކީ ވެހިކަލްތަކުގެ ނަންބަރު ޕްލޭޓް ފަސޭހައިން ދެނެގަތުމުގެ ޤާބިލުކަން ލިބިފައިވާ ކެމެރާތަކެއްކަމަށްވެސް ސީޕީ ހަމީދު ވިދާޅުވެފައިވެއެވެ.
ސިނަމާލެ ބްރިޖު އާއްމު ބޭނުންތަކަށް ހުޅުވާލުމާއެކު ބްރިޖާއި ހައިވޭގައިވެސް ދޭތެރެދޭތެރެއިން ނުރައްކާތެރި އެކްސިޑެންޓްތައް ދަނީ ހިނގަމުންނެވެ.
މިފަދަ އެކްސިޑެންޓުތައް މަދުކޮށް، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ފުލުހުން ދާދިފަހުން ވަނީ އެންމެފަހުގެ ސްޕީޑްގަންވެސް ބޭނުންކުރަންފަށާފައެވެ. މި ގަންތަކަކީ ބާރު ސްޕީޑުގައި ދުއްވާ އުޅަނދާއި އުޅަނދު ދުއްވަން އިންނަ މީހާގެ ފޮޓޯ ނަގައި ވަގުތުން ވީޑިއޯ ރެކޯޑްކުރެވޭ ގޮތަށް ފަހުގެ ޓެކްނޮލޮޖީއާއެކު އުފައްދާފައިވާ ސްޕީޑް ގަންތަކެކެވެ.