ކުޑަ ދޯންޏެއްގައި ބ. ކެންދޫން ކަނޑަށް ނުކުމެ އުޅެނިކޮށް ގެއްލިގެން ހޯދި މީހާ ފެނިއްޖެއެވެ.
ގެއްލިގެން ހޯދަމުންދިޔައީ ކެންދޫ އެއްގަމުގޭ، އުމުރުން 39 އަހަރުގެ ޢަބްދުﷲ ޢަލީ ނަމަކަށް ކިޔާ މީހެކެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން ކެންދޫ ކައުންސިލުގެ ރައީސް އަޙުމަދު ސަލީމް ވިދާޅުވީ، ޢަބްދުﷲ ޢަލީ ފެނިފައިވަނީ އެރަށާއި ކައިރީގައި އޮންނަ ފަޅުރަށެއްކަމަށްވާ ކެޔޮދޫންކަމަށެވެ. އަދި އޭނާގެ ހާލު ރަނގަޅުކަމަށްވެސް ސަލީމް ވިދާޅުވިއެވެ. ޢަބްދުﷲ ޢަލީ ހޯދުމުގެ މަސައްކަތުގައި އެރަށުގެ 12 ދޯންޏަކާއި، ކައިރީ ރިސޯޓުތަކާއި ފުލުހުންގެ އެހީތެރިކަން ލިބިފައިވާކަމަށް ސަލީމް ވިދާޅުވިއެވެ.
ޢަބްދުﷲ ޢަލީ ގެއްލިފައިވަނީ އަލަށް ބަނދެފައިވާ ދޯންޏެއް ޓެސްޓުކުރުމަށް ކަނޑަށް ނުކުތުމުގެ ތެރެއިނެވެ. ގާތްގަނޑަކަށް 6 ފޫޓުގެ މި ދޯނި ޓެސްޓުކުރުމަށް ކަނޑަށް ނުކުމެފައިވަނީ މިއަދު ހަވީރުގެ ވަގުތެއްގައިކަމަށާއި، އޭނާ ގެއްލިގެން ޢާއިލާއިން ކަންބޮޑުވެ، ހޯދަން ފަށާފައިވަނީ މިރޭ 8 ޖަހަނިކޮށް ކަމަށް ކައުންސިލުން މަޢުލޫމާތުދިނެވެ.
ޢަބްދުﷲ ޢަލީއަކީ ޤާނޫނީ ވަކީލެއްކަމަށާއި، އޭނާއަކީ އާއްމުކޮށް މަސްވެރިކަމަށް ގޮސްއުޅޭ މީހެއްނޫންކަމަށް ކެންދޫ ކައުންސިލުން މަޢުލޫމާތުދެއެވެ. އަދި އޭނާ ގެއްލެން މެދުވެރިވީ އޮއިގަދަވުމުންކަމަށް ބެލެވޭކަމަށްވެސް އެރަށު ކައުންސިލުން ވިދާޅުވެފައިވެއެވެ.