ކައުންޓަރ ޓެރަރިޒަމާއި، އޭވިއޭޝަން ސެކިއުރިޓީއަށް ބޭނުންވާ ބައެއް ސާމާނު ޖަޕާނުން ރާއްޖެއަށް ހަދިޔާކޮށްފި

ކައުންޓަރ ޓެރަރިޒަމާއި، އޭވިއޭޝަން ސެކިއުރިޓީގެ ދާއިރާ ހަރުދަނާކުރުމަށް ބޭނުންވާ ބައެއް އިކުއިޕްމަންޓްތަކާއި ވެހިކަލް ޖަޕާން ސަރުކާރުން ރާއްޖެއަށް ހަދިޔާކޮށްފިއެވެ.

ފޮރިން މިނިސްޓްރީގައި އެކަމަށްޓަކއި ބޭއްވި ޙާއްސަ ރަސްމިއްޔާތެއްގައި ޖަޕާން ސަރުކާރުގެ ފަރާތުން، މިތަކެތި ދިވެހި ސަރުކާރާއި ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއީއެވެ. އަދި ދިވެހި ސަރުކާރުގެ ފަރާތުން މިތަކެއްޗާއި ހަވާލުވެވަޑައިގަތީ ފޮރިން މިނިސްޓަރ ޢަބްދުﷲ ޝާހިދެވެ.

ޖަޕާން ސަރުކާރުން ރާއްޖެއަށް ހަދިޔާކުރި ތަކެއްޗަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލީހު ޖަޕާނަށް ކުރެއްވި ރަސްމީ ދަތުރުފުޅުގެ ތެރެއިން ރާއްޖެއާއި ޖަޕާނާދެމެދު ވެވުނު އެއްބަސްވުމުގެ ދަށުން ހަދިޔާކޮށްފައިވާ ތަކެއްޗެވެ. ކައުންޓަރ ޓެރަރިޒަމްގެ ދާއިރާއާއި އޭވިއޭޝަން ދާއިރާ ހަރުދަނާކުރުމަށް ޖަޕާނުން ހަދިޔާކުރި ތަކެތީގެ ޖުމްލަ އަގު 4.5 މިލިއަން އެމެރިކާ ޑޮލަރަށް އަރައެވެ. އަދި މިއީ ރާއްޖޭގެ އިޖްތިމާޢީ އިޤްތިޞާދީ ހާލަތު ރަނގަޅުކުރުމުގެ ގޮތުން ޖަޕާނުން ދީފައިވާ އެހީއެއްކަމަށް ފޮރިން މިނިސްޓްރީން ވިދާޅުވެއެވެ.

މި އެހީއާއި ގުޅޭގޮތުން މީޑިއާއަށް މަޢުލޫމާތުދެއްވަމުން ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއީ ވިދާޅުވީ، ރާއްޖެއާއި ޖަޕާން ސަރުކާރާދެމެދު ވެވުނު އެއްބަސްވުމުގެ ދަށުން ރާއްޖެއަށް ހަދިޔާކުރުމަށް ނިންމާފައިވާ ތަކެތީގެ ތެރޭގައި މައިގަނޑު 13 އައިޓަމެއް ހިމެނޭކަމަށެވެ. މީގެ ތެރޭގައި އޭވިއޭޝަން ސެކިއުރިޓީއަށް ބޭނުންވާ އެކިކަހަލަ އިކުއިޕްމަންޓްސްތަކާއި، އެކި ބަވާތުގެ ކެމެރާއާއި ވެހިކަލް ހިމެނޭކަމަށް ޖަޕާން ސަފީރު ވިދާޅުވިއެވެ.

"ޖަޕާން ސަރުކާރުން ހަދިޔާކުރުމަށް ނިންމާފައިވާ ތަކެތީގެ ލިސްޓު އިއްޔެ މިވަނީ ފައިނަލްކުރެވިފައި. މީގެތެރޭ އެބަ ހިމެނޭ މައިގަނޑު 13 ބާވަތެއް. އެގޮތުން ލިކުއިޑް ސްކޭނަރސްތަކާއި، މޯބައިލް އެކްސްރޭ ސްކޭނަރސްތަކާއި، ހޭންޑް ހެލްޑް މެޓަލް ޑިޓެކްޓަރސްތަކާއި، ރޭޑިއޯ، އެކި ބާވަތުގެ ކެމެރާ، އެކި ވައްތަރުގެ 44 ވެހިކަލް ހިމެނޭ. މިއީ ސަލާމަތީ ޚިދުމަތްތައް ފޯރުކޮށްދިނުމާއި، ރާއްޖޭގެ ބައިނަލްއަޤްވާމީ އެއަރޕޯޓްތަކާއި ޑޮމެސްޓިކް އެއަރޕޯޓުތަކުގެ އޮޕަރޭޝަންތަކުގައި ބޭނުންކުރެވޭނެ ވަސީލަތްތަކެއް" ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއީ ވިދާޅުވިއެވެ.


މި ރަސްމިއްޔާތުގައި ވާހަކަފުޅުދައްކަވަމުން ދިވެހިރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރު އިބްރާހީމް އުވައިސް ވިދާޅުވީ، ރާއްޖޭގެ އިޤްތިޞާދީ ހާލަތު ރަނގަޅުކޮށް، އާއްމުންގެ ދިރިއުޅުމުގެ ފެންވަރު މަތިކުރުމަށް ސަރުކާރުން ކުރާ މަސައްކަތުގައި ޖަޕާނަކީ މުހިއްމު ދައުރެއް އަދާކުރާ ޤައުމެއްކަމަށެވެ. އަދި ރާއްޖެ ތަރައްޤީކުރުމުގައި ސަރުކާރުން ގެންގުޅުއްވާ ޕްލޭންގެ ތެރެއިން ޖަޕާނާއެކު ގުޅުން ބަދަހިކުރެވޭނެ ދާއިރާތަކަކީ ކޮބާތޯ ބަލައި، މި ގުޅުން އިތުރަށް ފުޅާކުރުމަށް މަސައްކަތްކުރަމުންދާކަން ސަފީރު ފާހަގަކުރެއްވިއެވެ.


"ރާއްޖޭގެ ތަރައްޤީގެ ލަނޑުދަނޑިތައް ޙާސިލުކުރުމުގައި ޖަޕާން ސަރުކާރާއި އެ ޤައުމުގެ ރައްޔިތުންގެ ބައިވެރިވުން ރާއްޖެއަށް މުހިއްމު. ރާއްޖެއާއި ޖަޕާންގެ ގުޅުން އިތުރަށް ހަރުދަނާކޮށް، އިތުރު ދާއިރާތަކުން ގުޅުންބަދަހިކުރުމަށް މިދަނީ މަސައްކަތްކުރަމުން. ޖަޕާން ރައްޔިތުންގެ ފަރާތުން ދިވެހިންނާމެދު ދައްކަމުންދާ ލޯތްބާއި އިޙްތިރާމް މިފުރުޞަތުގައި އަޅުގަނޑު ފާހަގަކުރަން. އަދި ރާއްޖޭގެ ތަރައްޤީއަށް ވެދެމުންދާ އެހީތެރިކަން ފާހަގަކޮށް އެކަމަށް ޝުކުރު އަދާކުރަން" ދިވެހިރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރު އިބްރާހީމް އުވައިސްއެވެ.

ޖަޕާން ސަރުކާރުން ރާއްޖޭގެ ކައުންޓަރ ޓެރަރިޒަމްގެ ދާއިރާއާއި އޭވިއޭޝަން ސެކިއުރިޓީގެ ދާއިރާ ހަރުދަނާކުރުމަށް ބޭނުންވާ ސާމަނު ރާއްޖެއަށް ހަދިޔާކޮށްފައިވާއިރު، އެ ޤައުމުން އަންނަނީ ރާއްޖޭގެ ތަޢުލީމީ، ޞިއްޙީ ހަމައެހެންމެ ހަކަތައިގެ ދާއިރާއިން އެހީތެރިކަން ފޯރުކޮށްދެމުންނެވެ.