ބަންގީގެ އަޑުމަޑުކުރުމަށް އެއްވެސް މިސްކިތެއްގެ އިމާމަކަށް އަންގާފައިނުވާނެކަމަށް މާލޭ ސިޓީގެ މޭޔަރ ސިފާ މުޙައްމަދު ވިދާޅުވެއްޖެއެވެ.
އާއްމު މަސްހަލަތަށްކަމަށްބުނެ ބަންގީގެ އަޑު މަޑުކުރުމަށާއި، ނަމާދުކުރާ ވަގުތުތަކުގައި އަޑު މަޑުކުރަން މާލޭގެ އެއްވެސް މިސްކިތެއްގެ އިމާމަކަށް އަންގާފައިވާނެތޯ އާއްމު ފަރާތަކުން ޓުވިޓަރގައި އުފައްދާފައިވާ ސުވާލަކަށް ރައްދުދެއްވަމުން މޭޔަރ ސިފާ ވިދާޅުވީ، އެފަދަކަމެއް ކުރުމަށް މާލޭ ސިޓީ ކައުންސިލުން އަންގާފައިނުވާނެކަމަށާއި، އެފަދަ އެންގުމެއް ކައުންސިލުން އަންގާފައިވާކަމަށް ބުނެ ދެކެވޭ ވާހަކަތަކަކީ ކަނޑައެޅިގެން ދޮގެއްކަމަށެވެ.
މޭޔަރ ވިދާޅުވީ، މާލޭގެ މިސްކިތްތަކުގެ ކަންތައްތައް ބެލެހެއްޓުމަށް ސިޓީކައުންސިލްގެ ތެރެއިން ވަކި ކޮމެޓީއެއް އުފައްދަވާފައިވާކަމަށާއި، އެ ކޮމެޓީގައި ސިޓީ ކައުންސިލްގެ މާފަންނު އުތުރު ދާއިރާގެ މެމްބަރު މުޙައްމަދު ފަޒީނާއި، މައްޗަންގޮޅި ދެކުނު ދާއިރާގެ މެމްބަރު އަޙްމަދު ޒަމީރު ހިމެނިވަޑައިގަންނަވާކަމަށެވެ. އަދި ބަންގީގެ އަޑުމަޑުކުރުމަށާއި، ނަމާދުކުރާ ވަގުތު އަޑު މަޑުކުރުމާއިގުޅޭގޮތުން ކައުންސިލްގެ ތެރޭގައި އެއްވެސް މަޝްވަރާއެއްކޮށްފައިނުވާކަމަށްވެސް މޭޔަރ ވިދާޅުވިއެވެ.