ހުޅުމާލޭ ޖެޓީގައި މުދާ ބަރުކުރަމުންދަނިކޮށް އަރިއަޅާލި ލޭންޑިންގ ކްރާފްޓުން ދިޔަ ހިއްކުމުގެ މަސައްކަތް ކުރަމުންދާކަމަށް ޤައުމީ ދިފާޢީ ބާރުން ވިދާޅުވެއްޖެއެވެ.
އެމް.އެން.ޑީ.އެފުން ވިދާޅުވީ، ހުޅުމާލޭ ޖެޓީގައި މުދާ ބަރުކުރަމުންދިޔަ ލޭންޑިންގް ކްރާފްޓެއް އަރި އަޅާލައިގެން އުޅޭކަމުގެ ރިޕޯޓް ރޭ މެންދަމުގެ ވަގުތެއްގައި ލިބުމާއެކު، ކޯސްޓްގާޑުން އަންނަނީ އެ އުޅަނދު ތެދުކުރުމުގެ މަސައްކަތް ކުރަމުންނެވެ. އަދި ޕަމްޕް ބޭނުންކޮށްގެން ލޭންޑިންގް ކްރާފްޓުން ދިޔަ ހިއްކުމުގެ މަސައްކަތް މިހާރުވެސް ކުރަމުންދާކަމަށާއި، ލޭންޑިންގ ކްރާފްޓް އަދިވެސް ތެދު ނުކުރެވޭ ކަމަށް އެމް.އެން.ޑީ.އެފުން ވިދާޅުވެއެވެ.
ހުޅުމާލޭ ޖެޓީގައި މުދާ ބަރުކުރަމުންދަނިކޮށް އަރިއަޅާލާފައިވަނީ "އަމިން ކެރިއަރ - 2" ނަމަކަށްކިޔާ ލޭންޑިންގ ކްރާފްޓެކެވެ. އެއުޅަނދުން މުދާ ހުސްކޮށްފައިވާކަމަށް އެމް.އެން.ޑީ.އެފުން ވިދާޅުވެއެވެ.