އިންޑިއާ ސަރުކާރުގެ އެހީގައި ރާއްޖޭގައި ކުރިއަށްގެންދާ 4 މަޝްރޫޢެއް އިފްތިތާޙްކޮށްފިއެވެ. މި މަޝްރޫޢުތައް އިފްތިތާޙްކޮށް އެކަމުގެ ލިޔުންތައް ދެ ޤައުމުގެ ދެމެދު ބަދަލުކޮށްފައިވަނީ ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްސަ ރަސްމިއްޔާތެއްގައެވެ. ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ބައިވެރިވެވަޑައިގެންނެވި މި ރަސްމިއްޔާތުގައި އިންޑިއާގެ ބޮޑުވަޒީރު ނަރެންދުރަ މޯދީ ވަނީ ލައިވް ވީޑިއޯ ކޮންފަރެންސް މެދުވެރިކޮށް ބައިވެރިވެވަޑައިގެންފައެވެ.
އިންޑިއާ ސަރުކާރުގެ އެހީގައި ރާއްޖޭގައި ކުރިއަށްގެންދާ 4 މަޝްރޫޢެއް އިފްތިތާޙުކުރުމަށް ބޭއްވި ރަސްމިއްޔާތުގައި އެންމެ ފުރަތަމަ ކުރިއަށްގެންގޮސްފައިވަނީ އިންޑިޔާއިން ރާއްޖޭގެ ކޯސްޓްގާޑަށް ހަދިޔާކޮށްފައިވާ ކަނޑުއުޅަނދު ރާއްޖެއާ ރަސްމީގޮތުން ހަވާލުކުރުމެވެ. އިންޑިއާ ސަރުކާރުގެ ފަރާތުން މި އުޅަނދު ރާއްޖެއަށް ހަވާލުކޮށްދެއްވީ އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރެވެ. އަދި ރާއްޖޭގެ ފަރާތުން އުޅަނދާއި ހަވާލުވެވަޑައިގަތީ ޑިފެންސް މިނިސްޓަރ މާރިޔާ އަޙްމަދު ދީދީއެވެ.
"ކާމިޔާބު" މި ނަންދީފައިވާ ފާސްޓް އިންޓަރސެޕްޓަރ އުޅަނދަކީ 28 މީޓަރު ދިގު އުޅަނދެކެވެ. މިއީ ކަނޑުމަތީގެ ތަފާތު ޙާދިސާތަކުގައި އެހީތެރިކަން ފޯރުވައިދިނުމަށް ބޭނުންވާ އެންމެފަހުގެ ޒަމާނީ އާލާތްތަކާއެކު އުފައްދާފައިވާ އުޅަނދެކެވެ. މި އުޅަނދު ރާއްޖެގެނައުމުގެ ކުރިން، އެމް.އެން.ޑީ.އެފްގެ 8 މީހަކަށް އުޅަނދު ބޭނުންކުރުމާއި ގުޅޭގޮތުން އިންޑިއާގައި ވަނީ ޚާއްސަ ތަމްރީންތަކެއްދީފައެވެ. މި އުޅަނދާއެކު ރާއްޖޭގެ ކަނޑުގެ ސަރަޙައްދު ބެލެހެއްޓުމަށް ސަލާމަތީ ބާރުތަކުން ކުރަމުންދާ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެކަމަށް ސަރުކާރުން ވިދާޅުވެއެވެ.
ދެވަނަ މަޝްރޫޢެއްގެ ގޮތުގައި އިފްތިތާޙްކޮށްފައިވަނީ ސަރުކާރުގެ ޖަޒީރާ ކޮންސެޕްޓްގެ ދަށުން ރާއްޖޭގެ އެކި ސަރަޙައްދުތަކުގައި ތަރައްޤީކުރުމަށް ހަމަޖެހިފައިވާ ގޭދޮށު މަސް ޕްލާންޓްތަކުގެ ތެރެއިން އައްޑޫސިޓީގެ 3 ސަރަޙައްދެއްގައި މަސް ޕްލާންޓްތައް ޤާއިމުކުރުމުގެ މަޝްރޫޢެވެ. މިކަމުގެ ލިޔުން ބަދަލުކޮށްފައިވަނީ ރާއްޖޭގެ ފޮރިން މިނިސްޓަރ ޢަބްދުﷲ ޝާހިދާއި، އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރެވެ. މިއީ ރާއްޖޭގެ މަސްވެރިކަމުގެ ސިނާޢަތަކީވެސް ލާމަރުކަޒު ކުރެވި، އެ ސިނާޢަތުން ލިބޭ މަންފާ ސީދާ ރައްޔިތުންގެ ޖީބަށް ލިބޭނެ މަގު ފަހިކޮށްދިނުމަށް ސަރުކާރުން ކުރިއަށްގެންދިއުމަށް ނިންމާފައިވާ މަޝްރޫޢެކެވެ.
މި ރަސްމިއްޔާތުގައި އިންޑިއާގެ މަޝްހޫރު ޕޭމަންޓް ކާޑެއްކަމަށްވާ "ރުޕޭ ކާޑު"ވެސް ވަނީ ރާއްޖެއަށް ތަޢާރަފުކޮށްފައެވެ. ބޭންކިންގ ދާއިރާ ވީހާވެސް ބޮޑަށް ޑިޖިޓަލައިޒްކޮށް ރާއްޖޭގެ ފަތުރުވެރިކަން އިޝްތިހާރުކުރުމުގެ މަޤްޞަދުގައި މި ކާޑު ރާއްޖެއަށް ތަޢާރަފުކޮށް އެކަމުގެ ލިޔުން ބަދަލުކޮށްފައިވަނީ ބޭންކް އޮފް މޯލްޑިވްސް، ބީ.އެމް.އެލްގެ މެނޭޖިންގ ޑިރެކްޓަރ އަދި ސީ.އީ.އޯ ތިމޯތީ ސޯޔަރއާއި، ނެޝަނަލް ޕޭމަންޓްސް ކޯރޕަރޭޝަން އޮފް އިންޑިއާ، އެން.ޕީ.ސީ.އައިގެ ލީޑް އޮފް އިންޓަރނޭޝަނަލް އެލަޔަސް ހަރީޝް ޝަންކަރެވެ.
މި ކާޑު މެދުވެރިކޮށް އިންޑިއާގެ ރައްޔިތުންނަށް ބީ.އެމް.އެލްގެ މާޖެންޓްތަކުންނާއި އޭޓީއެމްތަކުން ފަސޭހަކަމާއެކު ފައިސާގެ މުޢާމަލާތްކުރެވިގެންދާނެއެވެ. އަދި މިއީ އިންޑިއާއިން ރާއްޖެއަންނަ ފަތުރުވެރިންގެ ނިސްބަތް އިތުރުކުރުމަށްވެސް ހުޅުވިގެންދާ ދޮރެއްކަމަށް ސަރުކާރުން ވިދާޅުވެއެވެ.
އެންމެ ފަހު މަޝްރޫޢެއްގެ ގޮތުގައި އިފްތިތާޙްކޮށްފައިވަނީ އިންޑިއާ ސަރުކާރުގެ އެހީގައި މާލޭގެ މަގުތަކުގައި އެލް.އީ.ޑީ ލައިޓް ހަރުކުރުމުގެ މަޝްރޫޢެވެ. މިއީ މާލޭ ސިޓީ ކައުންސިލާއި އިންޑިއާގެ މިނިސްޓްރީ އޮފް ޕަވަރގެ ބެލުމުގެ ދަށުން އުފައްދާފައިވާ ޖޮއިންޓްވެންޗަރ ކުންފުންޏެއްކަމަށްވާ އެނަރޖީ އެފިޝެންސީ ސަރވިސަސް ލިމިޓެޑާއި ދެމެދު ވެފައިވާ އެއްބަސްވުމުގެ ދަށުން ކުރިއަށްގެންދާ މަޝްރޫޢެކެވެ. މިހާރުވެސް އަމަލީ މަސައްކަތް ފަށާފައިވާ މި މަޝްރޫޢުގެ ދަށުން މިހާތަނަށް މާލޭގެ މަގުތަކުގައި ޖަހާފައިވާ 2500 މަގުބައްތި، އެލް.އީ.ޑީ ލައިޓަށް ވަނީ ބަދަލުކޮށްފައެވެ. މިއާއެކު ކަރަންޓަށް ކުރާ ހޭދަ އެތައް ގުނައެއް ކުޑަކުރެވި، އަހަރަކު 0.8 މިލިއަން ރުފިޔާ ސަލާމަތްކުރެވިގެންދާނެކަން ސަރުކާރުން ފާހަގަކުރެއެވެ. މިއީ ހަކަތައިގެ ދާއިރާއިން ކުރާ އިސްރާފު ވީހާވެސް ކުޑަކޮށް، އިއާދަކުރަނިިވި ހަކަތައިގެ ދާއިރާ ފުޅާކުރުމަށް ހިންގާ މަޝްރޫއެއްކަމަށް ސަރުކާރުން ވިދާޅުވެއެވެ.