އެންސިސް ފިޝަރީޒް ޕްރައިވެޓް ލިމިޓެޑުން ހުޅުމާލޭގައި ޤާއިމުކޮށްފައިވާ "އެންސިސް ދަޅުމަސް ފެކްޓްރީ"އަށް ބޭނުންވާ މުވައްޒަފުން ހޯދަން ޚާއްސަ އޯޕަންޑޭ އެއް ބާއްވައިފިއެވެ.
ހުޅުމާލޭ އިންޑަސްޓްރިއަލް ޒޯންގައި އެންސިސް ފިޝަރީޒް ޕްރައިވެޓް ލިމިޓެޑުން ޤާއިމުކޮށްފައިވާ "އެންސިސް ދަޅުމަސް ފެކްޓްރީ" ހުޅުވުމަށް މިހާރު ތައްޔާރުވެފައިވާއިރު، މި ކާރުޚާނާގެ މަސައްކަތްތައް ފެށުމަށް ތަފާތު އެކި ދާއިރާތަކުން 400 އަށްވުރެ ގިނަ ވަޒީފާގެ ފުރުޞަތު ހުޅުވިގެންދާނެކަމަށް އެކުންފުނިން ބުނެއެވެ.
މި ވަޒީފާތަކަށް މުވައްޒަފުން ނެގުމަށް ޚާއްސަ އޯޕަންޑޭއެއް ބާއްވާފައިވާއިރު، މި އިވެންޓަށް ޢާއްމުންގެ ފަރާތުން ބޮޑު ތަރުޙީބެއް ލިބިފައިވާކަމަށް އެންސިސްއިން ބުނެއެވެ. ޢާއިލީ މާހައުލެއްގައި ކުރިއަށްގެންދިޔަ މި ޙަރަކާތުގެ ތެރެއިން ފެކްޓްރީގެ މަސައްކަތްތައް ކުރިއަށްދާނެ ގޮތް ބަލާލުމަށް ބޭނުންވާ ފަރާތްތަކަށް އެ ފުރުޞަތުދީފައިވެއެވެ. އެންސިސްގެ އެކި ކަހަލަ އުފެއްދުންތަކާގުޅޭ މަޢުލޫމާތުވެސް ދީފައިވެއެވެ. އަދި ފެކްޓްރީގައި މިހާރު ހުރި ވަޒީފާގެ ފުރުޞަތުތަކާބެހޭ މަޢުލޫމާތުދީ، ވަޒީފާއަށް ކުރިމަތިލުމަށް ޝަޢުގުވެރިވާ ފަރާތްތަކަށް، އެކަމަށް އެދި ފޯމް ހުށަހެޅުން މި ޙަރަކާތުގެ ތެރޭގައި ކުރިއަށްގެންގޮސްފައިވެއެވެ.
މީގެ އިތުރުން ކުޑަކުދިންނަށް ޚާއްސަކޮށްގެން މެޖިކް ޝޯވއެއްވެސް ކުރިއަށްގެންގޮސްފައިވެއެވެ އަދި އޯޕަންޑޭއަށް ޒިޔާރަތްކުރި ފަރާތްތަކުގެ މެދުގައި ޚާއްސަ ލަކީޑްރޯއެއް ނެގުންވެސް ވަނީ ކުރިއަށްގެންގޮސްފައެވެ.
25 މިލިއަން ޑޮލަރު ޚަރަދުކޮށްގެން ހުޅުމާލޭގައި ޤާއިމުކޮށްފައިވާ "އެންސިސް ދަޅުމަސް ފެކްޓްރީ"އަކީ އެކުންފުނިން މިހާތަނަށް ކުރި އެންމެ ބޮޑު އިންވެސްޓްކަމަށް އެންސިސްއިން ބުނެއެވެ. މިއީ ގްރޭޓަރ މާލޭ ސަރަޙައްދުގައި ހުޅުވުމަށް ހަމަޖެހިފައިވާ ދަޅުމަސް ބަންދުކުރާ ފުރަތަމަ ފެކްޓްރީއެވެ.
ދުވާލަކު 25 ޓަނުގެ މަސް ދަޅުގައި ބަންދުކުރެވޭގޮތަށް ތަރައްޤީކޮށްފައިވާ މި ފެކްޓްރީއާއެކު ފިނިކުރި މަސް ރައްކާކުރުމަށް 1200 ޓަނުގެ "ކޯލްޑް ސްޓޯރޭޖް"އަކާއި، މަސްވެރިން ބާނާ މަސް ތާޒާކަންމަތީ ބެހެއްޓުމަށްޓަކާ މަސްވެރިންނަށް އައިސް ފޯރުކޮށްދިނުމަށް 100 ޓަނުގެ އައިސްޕްލާންޓެއް ވެސް ޤާއިމުކޮށްފައިވެއެވެ. އަދި މަހުން އުކާލެވޭ ބައިތައް ބޭނުންކުރުމަށް ފިޝްމީލް ޕްލާންޓެއް ޤާއިމުކުރުމަށްވެސް ހަމަޖެހިފައިވާކަމަށް އެކުންފުނިން މަޢުލޫމާތުދެއެވެ.