ވިސާއާއި ނުލައި ދިވެހިންނަށް މޮރޮކޯއަށް ދަތުރުކުރެވޭނެގޮތް ހަމަޖެއްސުމުގެ އެއްބަސްވުމުގައި ރާއްޖެއާއި މޮރޮކޯއިން ސޮއިކޮށްފިއެވެ.
މޮރޮކޯއަށް އެތެރެވުމަށް 90 ދުވަހުގެ އޮން އެރައިވަލް ވިސާ ދިވެހިންނަށް ލިބޭގޮތް ހަމަޖެއްސުމުގެ އެއްބަސްވުމުގައި ސޮއިކޮށްފައިވަނީ ރާއްޖޭގެ ޚާރިޖީ ވަޒީރު ޢަބްދުﷲ ޝާހިދު، މޮރޮކޯއަށް މިހާރު ކުރައްވަމުންގެންދަވާ ރަސްމީ ދަތުރުފުޅުގެ ތެރެއިންނެވެ. މި އެއްބަސްވުމުގައި މޮރޮކޯގެ ފަރާތުން ސޮއިކުރައްވާފައިވަނީ އެ ޤައުމުގެ ޚާރިޖީ ވަޒީރު ނަސީރު ބޮރީޓާއާއެވެ.
މޮރޮކޯ ސަރުކާރާއެކު މިވެވުނު އެއްބަސްވުމުގެ ދަށުން 31 ޖެނުއަރީ 2020 ފެށިގެން ދިވެހިންނަށް ވިސާއާއި ނުލާ މޮރޮކޯއަށް ދަތުރުކުރެވޭނެކަމަށާއި، މިއީ ދެ ޤައުމުގެ ގުޅުން އިތުރަށް ހަރުދަނާކުރުމަށް އެޅިގެންދިޔަ މުހިއްމު ފިޔަވަޅެއްކަމަށް ފޮރިން މިނިސްޓަަރ ޢަބްދުﷲ ޝާހިދު ވަނީ ވިދާޅުވެފައިވެއެވެ.
މިނިސްޓަަރ ޝާހިދުގެ ދަތުރުފުޅުގައި މޮރޮކޯގެ ޚާރިޖީ ވަޒީރު ނަސީރު ބޮރީޓާއާއި ބައްދަލުކުރައްވާ ދެ ޤައުމުގެ ދެމެދު އެކި ދާއިރާތަކުން ގުޅުން ބަދަހިކުރުމާއި ގުޅޭގޮތުން މަޝްވަރާ ކުރައްވާފައިވެއެވެ. އެގޮތުން ފަތުރުވެރިކަމާއި ދަނޑުވެރިކަމުގެ ދާއިރާއިން އިންސާނީ ވަސީލަތްތައް ތަރައްޤީކުރުމާއި، އިމާމުން ތަމްރީންކުރުމާއި، ހަރުކަށި ފިކުރުތަކާއި ދެކޮޅަށް މަސައްކަތްކުރުމުގެ އިތުރުން ކުޅިވަރުގެ ދާއިރާއިން ގުޅުން ބަދަހިކުރުމާއި ގުޅޭގޮތުން ފުޅާ ދާއިރާއެއްގައި މަޝްވަރާކޮށްފައިވާކަމަށް ފޮރިން މިނިސްޓަރ ވިދާޅުވެފައިވެއެވެ.
ދިވެހިރާއްޖެއާއި މޮރޮކޯއާއި ދެމެދު ސިޔާސީ ގުޅުން ޤާއިމްކޮށްފައިވަނީ 4 ފެބްރުއަރީ 1988 ގައެވެ.