އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ވެފައިވާ ވަޢުދުގެ ދަށުން 10،000 ހައުސިންގ ޔުނިޓް ޢިމާރާތްކުރުމުގެ މަސައްކަތް އަންނަ އަހަރު ފަށްޓަވާނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ. މި ދައުރުގެ ތެރޭގައި 20،000 ހައުސިންގ ޔުނިޓް ޢިމާރާތްކުރުމަކީ ސަރުކާރުގެ ސްޓްރެޓެޖިކް އެކްޝަން ޕްލޭންގައި ހިމެނޭ އެންމެ މުހިންމު އެއް މަޝްރޫޢެވެ.
2020ވަނަ އަހަރަށް ލަފާކޮށް ދަޢުލަތުން ހުށަހަޅާފައިވާ ބަޖެޓް ބަޔާން ރައްޔިތުންގެ މަޖިލީހުގައި އިއްވަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ، 20,000 ސޯޝަލް ހައުސިންގ ޔުނިޓުގެ ޕްރޮގްރާމަކީ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލެއް ގެނެސްދޭނެ މަޝްރޫޢެއްކަމަށެވެ. އަދި މިއީ މިހާތަނަށް ރާއްޖޭގައި ހިންގޭ ބޯހިޔާވަހިކަމުގެ އެންމެ ބިޔަ ބޮޑު މަޝްރޫޢުކަން ފާހަގަކުރައްވައި މި މަޝްރޫޢު ފެށުމަށް ބޭނުންވާ ފައިސާ އަންނަ އަހަރުގެ ބަޖެޓުގައި ހިމަނާފައިވާކަމަށް މިނިސްޓަރ ވިދާޅުވިއެވެ.
ފިނޭންސް މިނިސްޓަރ އަމީރު ވިދާޅުވީ، ދިވެހި ކޮންމެ ރައްޔިތަކީ ފަޚުރުވެރި ޢާއިލާއަކަށް ނިސްބަތްވާ، ޤަދަރުވެރި ދިރިއުޅުމެއް އުޅެވޭ ރައްޔިތެއްކަން ކަށަވަރުކޮށްދިނުމަށް، ރައްޔިތުންނަށް ދިމާވެފައިވާ ގެދޮރުގެ ދަތިކަމަށް ޙައްލު ހޯދައިދީ، އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަކީ ސަރުކާރުގެ އެންމެ އިސް އެއް އަމާޒުކަމަށެވެ. އެގޮތުން، މި ދައުރުގެ ތެރޭގައި ރާއްޖޭގެ އެކި ކަންކޮޅުތަކުގައި 20،000 ސޯޝަލް ހައުސިންގ ޔުނިޓް ޢިމާރާތްކޮށް، ރައްޔިތުންނާ ހަމައަށް ފޯރުކޮށްދެވޭނެކަމަށް ވިދާޅުވިއެވެ. އަދި މީގެތެރެއިން 10،000 ހައުސިންގ ޔުނިޓުގެ މަސައްކަތް މިއަންނައަހަރު ފެށުމަކީ ސަރުކާރުގެ އަމާޒެއްކަމަށާ، ހައުސިންގ މަޝްރޫޢުތަކަށް ބޭނުންވާ އިކުއިޓީގެ ގޮތުގައި 600 މިލިއަން ރުފިޔާ ބަޖެޓްކޮށްފައިވާކަމަށްވެސް މިނިސްޓަރ ވިދާޅުވިއެވެ.
"ދިވެހި ކޮންމެ ރައްޔިތަކީ ފަޚުރުވެރި ޢާއިލާއަކަށް ނިސްބަތްވާ، ގަދަރުވެރި ދިރިއުޅުމެއް އުޅެވޭ ރައްޔިތެއްކަން ކަށަވަރުކޮށްދިނުމަށް، ރައްޔިތުންނަށް ދިމާވެފައިވާ ގެދޮރުގެ ދަތިކަމަށް ހައްލު ހޯދައިދީ، އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަކީ ސަރުކާރުގެ އެންމެ އިސް އެއް އަމާޒު. މިގޮތުން، މި ދައުރުގެ ތެރޭގައި ރާއްޖޭގެ އެކި ކަންކޮޅުތަކުގައި 20،000 ސޯޝަލް ހައުސިންގ ޔުނިޓް ޢިމާރާތްކޮށް ރައްޔިތުންނާ ހަމައަށް ފޯރުކޮށްދެވޭނެ. ސަރުކާރުން ރާވާފައިވަނީ މީގެތެރެއިން 10،000 ހައުސިންގ ޔުނިޓުގެ މަސައްކަތް މިއަންނަ އަހަރު ފަށަން. އަންނަ އަހަރު ފަށަން ގަސްތުކުރާ ހައުސިންގ މަޝްރޫޢުތަކަށް ބޭނުންވާ އިކުއިޓީ ގޮތުގައި 600 މިލިއަން ރުފިޔާ ބަޖެޓު ކުރެވިފައިވާނެ" މިނިސްޓަރ އަމީރު ވިދާޅުވިއެވެ.
ފިނޭންސް މިނިސްޓަރ އަމީރު ވިދާޅުވީ، ގެދޮރު ޢިމާރާތްކުރުމަށް ބޭނުންވާ ފައިސާއާއި ހައުސިންގ ފައިނޭންސް ކުޑަ ރޭޓެއްގައި ފޯރުކޮށްދެވޭނެ މަގުތަނަވަސް ކުރުމަށް ސަރުކާރުން މަސައްކަތް ކުރަމުންދާކަމަށެވެ.
2020ވަނަ އަހަރަށް ލަފާކޮށް 37.5 ބިލިއަން ރުފިޔާގެ ބަޖެޓެއް ހުށަހަޅާފައިވާއިރު، ގެދޮރު ޢިމާރާތްކުރުމާއި ޖަމަޢާތުގެ ފައިދާއަށް ދެވޭ ޚިދުމަތްތައް ފޯރުކޮށްދިނުމަށް 3.1 ބިލިއަން ރުފިޔާ ވަނީ ބަޖެޓުގައި ހިމަނާފައެވެ. މީގެތެރޭގައި 20،000 ހައުސިންގ ޔުނިޓްގެ މަޝްރޫޢުގެ އިކުއިޓީގެ ގޮތުގައި 600 މިލިއަން ރުފިޔާ ހިމަނާފައިވެއެވެ. އަދި އެކި ރަށްތަކުގައި ތަރައްޤީކުރުމަށް ހަމަޖެހިފައިވާ ހައުސިންގ ޔުނިޓްތަކަށް 359 މިލިއަން ރުފިޔާ ބަޖެޓުކޮށްފައިވެއެވެ.