އަންނަ އަހަރުގެ ބިޒްނަސް އެކްސްޕޯގައި ބައިވެރިވުމުގެ ފުރުޞަތު ހުޅުވާލައިފި

ކޯޕަރޭޓް މޯލްޑިވްސްގެ ބިޒްނަސް އެކްސްޕޯގެ 2 ވަނަ އެޑިޝަންގައި ބައިވެރިވާން ބޭނުންވާ ފަރާތްތަކަށް އެ ފުރުޞަތު ހުޅުވާލައިފިއެވެ.

ކޯޕަރޭޓް މޯލްޑިވްސްއިން ބުނީ 2020 ވަނަ އަހަރު ބޭއްވުމަށް ހަމަޖެހިފައިވާ ބިޒްނަސް އެކްސްޕޯގައި މިހާރު ބައިވެރިވެވޭނެކަމަށެވެ. އަންނަ އަހަރުގެ ބިޒްނަސް އެކްސްޕޯ ބޭއްވުމަށް ހަމަޖެހިފައިވަނީ ފެބްރުއަރީ މަހުގެ 23 އިން 24 އަށެވެ. އެކްސްޕޯގައި ބައިވެރިވުމުގެ ފުރުޞަތު މިއަހަރުގެ ނިޔަލަށް ވަނީ ހުޅުވާލާފައެވެ.

އޯރކާ މީޑިއާ ގްރޫޕުން އިންތިޒާމްކޮށްގެން ބާއްވާ މި އެކްސްޕޯއަކީ ކުދި އަދި މެދު ފަންތީގެ ވިޔަފާރިތަކަށް ޚާއްސަކޮށްގެން، މިވިޔަފާރިތައް ކުރިއެރުވުމަށްޓަކައި ގުޅުން ބަދަހިކުރަންޖެހޭ ފަރާތްތަކާއި ގުޅުން ބަދަހިކުރެވި، ފޯރުކޮށްދޭ ޚިދުމަތްތަކާއި އުފެއްދުންތައް އާންމުންނަށް ދައްކާލުމުގެ ފުރުޞަތު ހުޅުވާލުމަށްޓަކައި ބާއްވާ ޙަރަކާތެކެވެ. މި އެކްސްޕޯ އެންމެ ފުރަތަމަ ބާއްވާފައިވަނީ މިއަހަރުއެވެ.

މިއަހަރުގެ އެކްސްޕޯއަށް 2000 އަށްވުރެ ގިނަ މީހުން ވަނީ ޒިޔާރަތްކޮށްފައެވެ. ސެޕްޓެމްބަރ މަހުގެ 29 އިން 30 އަށް ކުރިއަށްގެންދިޔަ މި އެކްސްޕޯގެ ތެރެއިން 4 ސަމިޓެއް ވަނީ ބާއްވާފައެވެ. އެއީ މޯލްޑިވްސް ޔަންގް އެންޓަރޕްރެނުއަރސް ސަމިޓް، މޯލްޑިވްސް ވުމަން އެންޓަރޕްރެނުއަރސް ސަމިޓް، މޯލްޑިވްސް ޓެކް ސަމިޓް އަދި މޯލްޑިވްސް ފައިނޭންސް ޕްރޮފެޝަނަލްސް ސަމިޓެވެ.