ސަރުކާރުން ރައްޔިތުންގެ މަޖިލީހަށް ހުށައަޅުއްވާފައިވާ ފޮރިންގ ސާރވިސް ބިލަކީ ދިވެހި ޚާރިޖިއްޔާއަށް ވަރަށް ބޮޑު ކުރިއެރުމެއް ލިބިގެންދާނެ ބިލެއްކަމަށް ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.ނޫސްވެރިންނަށް މައުލޫމާތުދެއްވަމުން އެކަމަނާ ވިދާޅުވީ މި ބިލަކީ ޚާރިޖީ ދާއިރާއިން ރާއްޖެއިން އެޅި ވަރަށް މުހިއްމު ފިޔަވަޅެއްކަމަށެވެ. އަދި މިއީ ވަރަށް ގިނަ ބައެއްގެ ގިނަ ދުވަހުގެ މަސައްކަތްކަން ފާހަގަކުރައްވާ މިނިސްޓަރ ދުންޔާ ވިދާޅުވީ، ބައިނަލް އަޤްވާމީ މަސްރަހުގައި ރާއްޖެއަށް ލިބެންހުރި ފުރުސަތުތައް ހޯދައި ޤައުމީ މަސްލަޙަތު ކުރިއަރުވައި ގޮތްތަށް ހޯދައި ބެލުމަށް މި ގާނޫނުގެ ސަބަބުން ފަސޭހަވެގެންދާނެކަމަށެވެ.ޚާއްސަކޮށް ތަމްރީނާއި، ހުނަރާއި ތަޖުރިބާ ފޮއިންގ ސާވިސް މުވައްޒަފުންނަށްދީ، ޕްރޮފެޝަނަލްކޮށް ފޮރިންގ ސާވިސް ކޭޑަރެއް އުފައްދައި ދަމަހައްޓައި ކުރިއެރުވޭނެކަމަށް ވިދާޅުވިއެވެ.ސަރުކާރުން މަޖިލިހަށް ހުށައަޅަފައިވާ މިބިލްގެ ސަބަބުން ގައުމުތަކަށް އައްޔަންކުރާ ސަފީރުންގެ ހުންނަންޖެހޭ ޝަރުތުތައް ކަނޑައަޅައި، ސަފިރުން ފޮނުވުމާއި، އަނބުރާ ގެނައުމާ ބެހޭ އުސޫލުތައްވެސް ޤާނޫނުގެ ތެރެއިން ހަމަޖެހިގެންދާނެއެވެ.