އދ.ގެ ޗާޓަރުގައިވާ ކަންކަމަށް ދިވެހިރާއްޖެއިން ފުރިހަމައަށް އިޖާބަދެއްވާނެކަމަށާއި، ދުނިޔޭގެގައި ސުލްޙަ މަސަލަސްކަން ދަމަހައްޓައި ކުރިއެރުވުމުގައި ބައިނަލްއަޤްވާމީ މުޖުތަމަޢާއި ގުޅިގެން ދިވެހިރާއްޖެއިން މަސައްކަތްކުރަމުންދާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރައްވާފައިވަނީ 74 ވަނަ އ.ދ. ދުވަހުގެ މުނާސަބަތުގައި ފޮނުއްވި މެސެޖުގައެވެ.
ރައީސުލްޖުމްހޫރިއްޔާގެ މެސެޖުގައި އ.ދ. ދުވަހެއް ފާހަގަކުރަނީ ސިޔާސަތު ކަނޑައެޅުމާއި ގޮތް ނިންމުމުގެ ތެރެއިން ހަމަޖެހުމާއި ސުލްޙައަށް މަގުފަހިކުރުމުގެ އަޒުމް ވަރުގަދަކުރުމަށްކަން ބަޔާންކުރައްވަމުން ރައީސުލްޖުމްހޫރިއްޔާ ވަނީ އ.ދ. އުފެއްދުމުގެ މަޤްޞަދުތައް ހާޞިލްކުރުމުގައި ސާބިތުކަމާއެކު މިހާތަނަށް ދެމިއޮތްކަން ފާހަގަ ކުރައްވާފައެވެ. އެމަނިކުފާނު ވަނީ ރާއްޖެއިން އ.ދ. ގެ ޗާޓަރުގައިވާ ކަންކަމަށް އިޖާބަދޭނެކަން ހާމަކުރައްވައި އ.ދ.ގެ ޗާޓަރުގެ ރޫޙާއި އެއްގޮތްވާ ގޮތުގެ މަތީން މަސައްކަތްކުރުމަކީ އެޖަމާޢަތުގައި ހިމެނޭ ޤައުމުތަކަށް ލާބައާއި މަންފާ ލިބޭނެ ކަމެއްކަން ޤަބޫލުކުރައްވާކަންވެސް ފާހަގަކުރައްވާފައެވެ.
ރައީސުލްޖުމްހޫރިއްޔާގެ މެސެޖުގައި 2030 ވަނަ އަހަރުގެ ނިޔަލަށް ހާޞިލްކުރުމަށް ކަނޑައަޅާފައިވާ ދެމެހެއްޓެނިވި ތަރައްޤީގެ ލަނޑުދަނޑިތަކަކީ އެކަންކަމުގެ ސަބަބުން ޤައުމުތަކުގެ ރައްޔިތުންނަށް ހަރުދަނާ، ރައްކާތެރި، ދުޅަހެޔޮ، ސުލްޙަވެރި އަދި އަބުރުވެރި ދިރިއުޅުމެއް ހޯދައިދިނުމަށް ބައްޓަންކުރެވިފައިވާ ފުރިހަމަ އޮނިގަނޑެއްކަމަށްވެސް ވަނީ ވިދާޅުވެފައެވެ. ދެމެހެއްޓެނިވި ތަރައްޤީގެ ލަނޑުދަނޑިތައް ހާޞިލްކުރުމުގައި ރާއްޖެއިން ބައިވެރިވެފައިވާ މުއާހަދާތަކާއި އެއްބަސްވުންތަކާއި އެއްގޮތަށް ޢަމަލުކުރުންމަތީ ދެމިއޮންނާނެކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ދެއްވާފައިވެއެވެ. އަދި މިކަންކަން ހާޞިލްކުރުމުގައި މި ޖީލަށް ހުރި ގޮންޖެހުންތަކާއި އެކުގައިވެސް ބައިނަލްއަޤްވާމީ މުޖުތަމަޢާއި ގުޅިގެން، މަޢުލޫމާތު ހިއްޞާކުރެވޭ މާހައުލެއްގެ ތެރެއިން ޙައްލުހޯދުމުގައި ރާއްޖެ ދެމިއޮންނާނެކަމަށްވެސް މި މެސެޖުގައި ރައީސުލްޖުމްހޫރިއްޔާ ވިދާޅުވެފައިވެއެވެ.
ބައިނަލްއަޤްވާމީ މައިދާނުގައި ރާއްޖެ އެކަހެރިވެފައި އޮތުމަށްފަހު، އ.ދ. ގެ 74 ވަނަ އާއްމު މަޖިލީހުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިދިޔަ ސެޕްޓެމްބަރ މަހު ވަނީ ވަރަށް ތާރީޚީ ތަޤްރީރެއް ކުރައްވާފައެވެ. މި ތަޤްރީރުގައި ދިވެހިރާއްޖޭގެ ޚާރިޖީ ސިޔާސަތު ހާމަކުރެއްވުމުގެ އިތުރުން ރާއްޖެ އަލުން ބައިނަލްއަޤްވާމީ އިސް ސަފުގައި ހަރަކާތްތެރިވާން ފަށާނެކަމުގެ ހެޔޮ ޚަބަރުވެސް ރައީސުލްޖުމްހޫރިއްޔާ ވަނީ ދެއްވާފައެވެ.
އ.ދ. ދުވަހުގެ ގޮތުގައި 1948 ވަނަ އަހަރުން ފެށިގެން ފާހަގަކުރާ ދުވަހަކީ އޮކްޓޫބަރު މަހުގެ 24 ވަނަ ދުވަހެވެ.