ޙާލުގައި ޖެހުނު ޢާއިލާތަކަށް ބޭނުންވާ ހުރިހާ އިންތިޒާމެއް ހަމަޖައްސައިދެވުމުން ނޫނީ ދޫކޮށެއްނުލާނަން - އެންޑީއެމްއޭ

އަލިފާނުގެ ޙާދިސާގައި ގެއްލުން ލިބުނު ފަރާތްތަކަށް ނޭޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން އެހީތެރިކަން ފޯރުކޮށްދޭނީ އަންނަ ހޮނިހިރު ދުވަހާއި ހަމައަށްކަމަށްބުނެ ދެކެވޭ ވާހަކަތައް އެ އޮތޯރިޓީން ދޮގުކުރައްވައިފިއެވެ. ޕީ.އެސް.އެމް ނިއުސްއަށް މަޢުލޫމާތުދެއްވަމުން އެން.ޑީ.އެމް.އޭގެ ޗީފް އެގްޒެކެޓިވް ހިސާން ޙަސަން ވިދާޅުވީ، މިޙާދިސާގައި ގެއްލުންވި ޢާއިލާތަކަށް ސަރުކާރުން ހަމަޖައްސައިދޭންޖެހޭ ހުރިހާ އިންތިޒާމްތަކެއް ހަމަޖައްސައިދެވުމުން ނޫނީ، އެ ޢާއިލާތައް އެން.ޑީ.އެމް.އޭގެ ބެލުމުގެ ދަށުން ދޫކޮށްނުލާނެކަމަށެވެ.

ހ.ތިލަފުށީ ގޭގައި ހުރި ކެމިކަލް ގުދަނުގައި ރޯވެ، ހިނގި ނުރައްކާތެރި އަލިފާނުގެ ޙާދިސާގައި ގެއްލުވި ފާރާތްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ނޭޝެނަލް ޑިޒާސްޓަރ މެނޭޖްމަންޓް އޮތޯރިޓީން ކުރަމުންދާއިރު، މިހާތަނަށް 700 އަށްވުރެ ގިނަ ފަރާތަށް މި ޙާދިސާއާއި ގުޅިގެން އެހީތެރިކަން ފޯރުކޮށްދީފައިވާކަމަށް އެ އޮތޯރިޓީން ވިދާޅުވެއެވެ.

އަލިފާނުގެ ހާދިސާއާއި ގުޅިގެން ހާލުގައި ޖެހުނު އާއިލާތަކަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތަކާ ގުޅޭގޮތުން މަޢުލޫމާތުދެއްވަމުން އެން.ޑީ.އެމް.އޭގެ ޗީފް އެގްޒެކެޓިވް ހިސާން ޙަސަން ވިދާޅުވީ، މި ޙާދިސާ ހިނގި ސަރަޙައްދުގައި ހުރި 26 އިމާރާތެއްގެ 87 ޢާއިލާއަކަށް އެކި ގޮތްގޮތުން އެހީތެރިކަން ފޯރުކޮށްދެމުންދާކަމަށެވެ. އެގޮތުން މި ވަގުތުވެސް 302 މީހަކަށް އެން.ޑީ.އެމް.އޭ މެދުވެރިކޮށް 104 ތަނަކުން ވަގުތީ ބޯހިޔާވަހިކަން ހަމަޖައްސައިދީފައިވާކަމަށް އޭނާ ވިދާޅުވިއެވެ. އަދި އެފަރާތްތަކަށް ބޭނުންވާ ކެއުންބުއިމުގެ ކަންކަން ހަމަޖެއްސުމަށް މިހާތަނަށް 4 ލައްކައަށްވުރެ ގިނަ ރުފިޔާ އާއިލާތަކަށް ދީފައިވާކަން އޭނާ ފާހަގަކުރެއްވިއެވެ.

"ބައެއް މީޑިއާތަކުގައި އެބަފެތުރޭ އަޅުގަނޑުމެން މި ޢާއިލާތައް ބަލަހައްޓަމުން ގެންދާނީ ވަކި މުއްދަތެއް ވަންދެނޭ.. ނުވަތަ އަންނަ ހޮނިހިރު ދުވަހާއި ހަމައަށޭ.. އަޅުގަނޑުމެން ހޮނިހިރު ދުވަހުގެ ނިޔަލަށް އެބޭފުޅުން ބައިތިއްބާފައި، އެއްގޮތަކަށްވެސް ދޫކޮށެއްނުލާނަން.. ނޫނީ ތަންތަނަށް ފޮނުވައެއް ނުލާނަން.. މިވަގުތަށް ބޭނުންވާ ހުރިހާ އެހީތެރިކަމަކާއި ފައިސާގެ އެހީތެރިކަންވެސް ހޮނިހިރު ދުވަހާއި ހަމައަށް ހަމަޖައްސާފައި މިވަނީ.. އަދި އިތުރަށްވެސް މި ޢާއިލާތަކަށް ސަރުކާރުން ހަމަޖައްސަންޖެހޭ ހުރިހާކަމެއް ހަމަޖައްސާފައިނޫނީ މިއިން އެއްވެސް ޢާއިލާއެއް އަޅުގަނޑުމެން ދޫކޮށެއްނުލާނަން.." ހިސާން ޙަސަން ވިދާޅުވިއެވެ.

ހިސާން ވިދާޅުވީ، މިޢާއިލާތަށް އެން.ޑީ.އެމް.އޭގެ ބެލުމުގެ ދަށުގައި ތިބޭއިރު، ޒަރޫރީ ބޭނުންތަކަށް ބޭނުންވާ ހުރިހާކަމެއް ހަމަޖައްސައިދިނުމުގެ އިތުރުން، ޢާއިލާތަކުގެ ޙާލަތު އެ އޮތޯރިޓީން ކޮންމެ ދުވަހަކުވެސް ވަރަށް ގާތުން ބަލަމުންދާކަމަށެވެ.

"އަޅުގަނޑުމެން މިހާރުވެސް މި ގެންދަނީ އެކި އެކި ހޮޓާތަކާއި ގެސްޓް ހައުސްތަކާއި ގާކޮށީގެ ފްލެޓްތަކުން ވަގުތީ ބޯހިޔާވަހިކަން ފޯރުކޮށްދީފައިވާ ޢާއިލާތަކަށް އެކި ގަޑިތަކުގައި އަޅުގަނޑުމެންގެ ޓީމްތައް ޒިޔާރަތްކޮށް، ބޭނުންވާ އެހީތެރިކަމަކީ ކޮބައިތޯ ބަލާ، އެފަރާތްތަކުގެ ހާލަތު ވަރަށް ގާތުން ބަލަމުން.. އަޅުގަނޑުމެން ބޭނުންވަނީ ވީހާވެސް އޯގާތެރިކަމާއެކު އެބޭފުޅުންނަށް ބޭނުންވާ ކަންކަން މެދުކެނޑުމެއްނެތި ފޯރުކޮށްދިނުން.." ޙިސާން ވިދާޅުވިއެވެ.

މި ޙާދިސާގައި ގިނަބައެއްގެ މުދަލަށާއި ގޯތިގެދޮރަށް ބޮޑެތި ގެއްލުންތަކެއް ލިބިފައިވާއިރު، އެފަރާތްތަކަށް ވަގުތީ ބޯހިޔާވަހިކަން ފޯރުކޮށްދިނުމުގެ އިތުރުން، އަންނައުނާއި، ކެއުންބުއިމަށް ބޭނުންވާ ސާމަނު ފޯރުކޮށްދިނުމަށް ދަރުބާރުގޭގައި ވަނީ ޙާއްސަ ރިލީފް ޑިސްޓްރިބިއުޝަން ސެންޓަރެއް ޤާއިމުކޮށްފައެވެ. މި ސެންޓަރުން ކޮންމެ ދުވަހެއްގެ ހެނދުނު 9 އިން ރޭގަނޑު 9:30 ހާއި ހަމައަށް އަންނަނީ އެން.ޑީއެމް.އޭގައި ރަޖިސްޓްރީކޮށްފައިވާ ފަރާތްތަކަށް ތަކެތި ދޫކުރަމުންނެވެ.

މި ސެންޓަރުގެ މަސައްކަތްތަކާ ގުޅޭގޮތުން ވާހަކަދައްކަވަމުން އެތަނުގެ އިންޗާރޖް އާމިނަތު އިޒްތިޙާ ރުޝްދީ ވިދާޅުވީ، ހާލުގައި ޖެހުނު އާއިލާތަކަށް އެހީތެރިކަން ފޯރުކޮށްދޭން ބޭނުންވެގެން ވަރަށް ގިނަ ފަރާތްތަކަކުން ތަކެތި ހަދިޔާކޮށްފައިވާކަމަށާއި، ތަކެތި ހަދިޔާކުރުމަށް ބޭނުންވެގެން އަދިވެސް ގިނަ ފަރާތްތަކަކުން އެދެމުންދާކަމަށެވެ. މިވަގުތަށް ބޭނުންވާވަރަށް އަންނަނައުނު ލިބިފައިހުރުމުން، އެފަދަތަކެތި ބަލައިގަތުން ހުއްޓާލާފައިވާކަމަށާއި، ނަމަވެސް އާއިލާތަކުން ލިބޭ ވަކިވަކި ރިކުއެސްޓްތަކަށްބަލާ، އެފަދަ ތަކެތި ހޯދައިދިނުމުގެ މަސައްކަތް ކުރަމުންދާކަމަށް އިޒްތިޙާ ވިދާޅުވިއެވެ.

"އަޅުގަނޑުމެންނަށް މަދުވާތަކެތީގެ ތެރޭގައި ޓޮއިލެޓްރީޒް، ރީތިވާ ސާމާނު، ކުޑަކުދިންނަށް ބޭނުންވާ ލުއިކާނާފަދަ ތަކެތި ހިމެނޭ.. ބާލީހާއި ގޮދަނޑިފަދަތަކެތި ބޭނުންވެގެންވެސް ބައެއް އާއިލާތަކުން ރިކުއެސްޓް އެބަ އާދޭ.. އެފަދަތަކެތި ހޯދައިދިނުމުގެ މަސައްކަތް އެންޑީއެމްއޭ ތެރެއިން މިދަނީ ކުރަމުން.." އާމިނަތު އިޒްތިޙާ ރުޝްދީ ވިދާޅުވިއެވެ.

ދަރުބާރުގޭގައި ޤާއިމުކޮށްފައިވާ ރިލީފް ޑިސްޓްރިބިއުޝަން ސެންޓަރުން އާއިލާތަކަށް ބޭނުންވާ ތަކެތި ދޫކުރުމުގެ އިތުރުން، ކެއުންބުއިމަށް ބޭނުންވާ ފައިސާ ދޫކުރުމުގެ މަސައްކަތް ރިހިޖެހިކޮށީގައި އެން.ޑީއެމް.އޭއިން ކޮންމެ ދުވަހަކުވެސް ދަނީ ކުރަމުންނެވެ.