ތިލަފުށީގައި ކެމިކަލް ގުދަން ކުރުމަށް ބޭނުންވާ ފަރާތްތަކަށް އެކަމަށް އެދި ފޯމު ހުށައެޅުމުގެ ފުރުޞަތު ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުން ހުޅުވާލައިފިއެވެ.
މިކަމާއި ގުޅިގެން އެ އޮފީހުން ނެރެފައިވާ އިޢުލާންގައި ބުފައިވަނީ ވެއަރ ހައުސް ޔުނިޓްތައް ދޫކުރުމުގައި އެންމެ ބޮޑު އިސްކަމެއް ދޭނީ މިވަގުތު ކެމިކަލް ގުދަންކުރަމުންދާ ފަރާތްތަކުގެ ތެރެއިން އެންމެ ނުރައްކާތެރި މުދާ ގެންގުޅޭ ފަރާތްތަކަށް ކަމަށެވެ. އަދި އެފަރާތްތަކަށް ބިމުގެ ބަދަލުގައި ތިލަފުށިން ދޫކުރުމަށް ހަމަޖެހިފައިވަނީ ގުދަން ޕްލޮޓްތައް ހެދުމަށްފަހު ކަމަށްވެސް ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުން ބުނެއެވެ. އަދި މިތަންތަން ފަރުމާކުރަނީ ސަލާމަތާއި ރައްކާތެރިކަމުގެ މިންގަނޑުތަކަށް ރިއާޔަތްކޮށްގެންކަމަށްވެސް ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑުންވަނީ ބުނެފައެވެ.
އެ ކުންފުންނިން ބުނެފައިވަނީ 200 އެއްހާ ޕްލޮޓް ދޫކުރުމަށް މަސައްކަތްކުރަމުންދާކަމަށެވެ. މިކަމަށް އެދޭ ފަރާތްތަކަށް ފޯމް ހުށައެޅުމުގެ ފުރުޞަތު މިހާރުވަނީ ހުޅުވާލާފައެވެ. އަދި ފޯމު އެ ކުންފުނީގެ ވެބްސައިޓުންނާއި، ރިސެޕްޝަނުންވެސް ލިބެން ހުނާނެކަމަށް އެކުންފުނިން ބުނެއެވެ.
މިގޮތަށް ގުދަންތައް ބަދަލުކުރުމުގެ މަސައްކަތް އަވަސް ކުރުމަށް ނިންމާފައިވަނީ މިދިޔަ ހުކުރު ދުވަހު ހެންވޭރުގައި ހިނގި ނުރައްކާތެރި އަލިފާނުގެ ޙާއްދިސާއަށް ފަހުގައިއެވެ. މިކަމާއި ގުޅިގެން އެމްއެންޑީއެފުން ވިދާޅުވީ މާލޭގައި މިފަދަ މުދާ ގުދަންކުރާ 126 ގުދަން ހުރިކަން ފާހަގަވެފައިވާ ކަމަށާއި، މީގެތެރެއިން 83 ގުދަން ހުރީ މީހުން އުޅޭ ސަރަޙައްދުގައިކަމަށެވެ. އެމެއެންޑީއެފުން ވަނީ މިފަދަ ގުދަންތަކުގެ ސަލާމަތާއި ރައްކާތެރިކަން ކަށަވަރު ކުރުމަށް އިންސްޕެކްޝަނެއްވެސް ފަށާފައެވެ.