މާލޭގައި އެއްގަމު އުޅަނދުތައް ޕާކުކުރުމުގައި ދިމާވެފައިވާ ދަތިތައް ޙައްލުކުރުމަށް ކުރީގެ ސަރުކާރުން މާލޭގެ އެކި ސަރަޙައްދުތަކުގައި މެކޭނިކަލް ޕާކިންގ ސިސްޓަމް ސިސްޓަމްތަކެއް ހަރުކުރަން ފެށިއެވެ. މި ސިސްޓަމްތައް ހަރުކުރުމަށް ޖުމުލަ 58 މިލިއަން ރުފިޔާގެ ހޭދަވާނެކަން ކުރީގެ ސަރުކާރުން ޢިއުލާންކުރައްވާފައިވެއެވެ. އެހެންނަމަވެސް މިއިން އެއްވެސް ސިސްޓަމެއް ބޭނުންނުކުރެވި ވަނީ ބޭކާރުވެފައެވެ.
މާލޭގައި ދުއްވުމަށް 70000 އެއްހައި އެއްގަމު އުޅަނދު ރެޖިސްޓްރީކޮށްފައިވެއެވެ. މި ހުރިހާ އުޅަނދުތައް ޕާކުކުރުމުގެ ޖާގަ މާލޭގައި ނެތެވެ. މިއީ ދުއްވާ މީހުންގެވެސް އެންމެބޮޑު ޝަކުވާއެވެ.
މިކަމަށް ޙައްލު ގެނެވޭނެކަމަށް ކުރީ ސަރުކާރުން ޤަބޫލުކުރީ ޕާކު ކުރުމަށް ޒަމާނީ ނިޒާމެއް ތަޢާރަފްކުރުމެވެ. އެއީ އިލެކްޓްރޯނިކަލް ޕާކިން ސިސްޓަމްތައް މާލޭގައި ބެހެއްޓުމެވެ. މިއީ ވަރޓިކަލް ސިސްޓަމްތަކެއްގައި، ކުޑަ ޖާގައެއްގައި ގިނަ އުޅަނދު ޕާކު ކުރެވޭ ނިޒާމެކެވެ.
އެގޮތުން މީގެ، ކާރު ޕާކުކުރެވޭނެ 10 ސިސްޓަމާއި، ސައިކަލު ޕާކުކުރެވޭނެ 10 ސިސްޓަމް މާލެ ގެނެސް އެކި ސަރަޙައްދުތަކުގައި ބެހެއްޓުމުގެ މަަސައްކަތްވެސް ފެށިއެވެ. މިއިން ކާރު ސިސްޓަމެއްގައި 10 ކާރު ޕާކުކުރެވޭއިރު، ސައިކަލު ސިސްޓަމެއްގައި 100 ސައިކަލު ޕާކު ކުރެވެއެވެ. ޕްލޭނިންގ މިނިސްޓްރީން ބުނެފައިވަނީ މި ސިސްޓަމްތަކަށް 58މިލިއަން ރުފިޔާ އަރާކަމަށެވެ.
މި ސިސްޓަމްތައް މާލެ ގެނެސް، އެންމެ ފުރަތަމަ ކާރު ސިސްޓަމް ބަހައްޓައި ޓެކްސްޓު ކުރީ ވެލާނާގެ ކައިރީގައެވެ. އަދި ހީނާމާގެއާއި، މާލޭ ސްކޮޔަރއާއި، ހައުސިންގ މިނިސްޓްރީ ކައިރީގައިވެސް ސިސްޓަމްތައް ބެހެއްޓިއެވެ. ނަމަވެސް ގިނަ ސިސްޓަމްތަކުގެ މަސައްކަތް ނުނިމި އެތައް ދުވަހެއް ވެގެން ދިޔައެވެ. އަދި އެއިން އެއްވެސް ސިސްޓަމެއް ބޭނުންކުރަން ފަށާފައެއްވެސް ނުވެއެވެ. މި ސިސްޓަމްތައް ވީ، ދިވެހިންނާ ބީރައްޓެހި ސިސްޓަމްތަކަކަށެވެ. އަދި މިއީ މާލެއަށް އެންމެ ބޭނުންތެރި ސިސްޓަމްތަކަށްވެސް ނުވިއެވެ.
އާ ސަރުކާރުންވަނީ ސިސްޓަމްތައް ބޭކާރުވެފައިވާތީ ހަރުކޮށްފައިވާ ތަކެތި ނެގުމުގެ މަސައްކަތް ފަށާފައެވެ. މިފަދަ ބައެއް ސިސްޓަމްތައް ހަރުނުކޮށް މާލޭ އިންޑަސްޓްރިއަލް ވިލެޖު ސަރަޙައްދުގައި ފުނިޖެހިފައިވެސް ހުއްޓެވެ.
ޕްލޭނިންގ މިނިސްޓްރީގެ މަސައްކަތްތަކާ ގުޅޭގޮތުން މަޢުލޫމާތު ދިނުމަށް ބޭއްވި "ނުވަގަޑި" ޕްރޮގްރާމްގައި މިނިސްޓްރީގެ ޕްލޭނިން ޑިޕާޓްމަންޓުން ވިދާޅުވެފައިވަނީ ވެލާނާގެ ކައިރީގައިހުރި ކާރު ޕާކިން ސިސްޓަމް ފިޔަވައި ހުރިހައި ސިސްޓަމްތައް މިހާރު ނަގައި، ސިސްޓަމް ބެހެއްޓި ބިންތައް ސާފުކޮށްފައިވާކަމަށެވެ.
މިނިސްޓްރީން ވިދާޅުވެފައިވަނީ ސިސްޓަމްތައް ނަގާފައިވަނީ ސިސްޓަމްތަކުގެ ބޭނުން ނުހިފޭތީ، މި ތަންތަނަކީ ބޭނުން ހިފޭ ތަންތަނަށް ހެދުމަށްކަމަށެވެ. އަދި ސިސްޓަމްތައް ނެގި ތަންތަން އަލުން ތަރައްޤީކުރާނީ ޕާކުކުރެވޭ އޭރިއާތަކެއް ގޮތުގައިކަމަށް މިނިސްޓްރީންވަނީ ވިދާޅުވެފައެވެ.
މިނިސްޓްރީން ވިދާޅުވެފައިވަނީ ވެލާނާގެ ކައިރީގައި ހުރި ސިސްޓަމް އަދި ނުނަގައި ބަހައްޓާފައިވަނީ އެއީ ޓެސްޓް ކޮށްފައިވާ ސިސްޓަމްއަކަށްވާތީ އެއާއިމެދު އަދި ވަކިގޮތެއް ނުނިންމޭތީކަމަށެވެ.
މަގުތަކާގުޅޭ އެންމެ ބޮޑު ޝަކުވާއެއްގެ ގޮތުގައިވެސް އާއްމުން ހުށައަޅާފައިވަނީ މާލޭ މަގުތަކުގައި ޕާކިންގއަށް ޖާގަ ނެތުމުގެ މައްސަލައެވެ. މިކަން ޙައްލުކުރުމަށް ސަރުކާރުންދަނީ މާލޭގައި ހުސްކޮށް ހުރި ގިނަ ބިންތަކުގައި ޕާކިންގ ޒޯމްތައް ހެދުމުގެ މަސައްކަތް ކުރަމުންނެވެ.
އެގޮތުން ޕާކިންގ ޒޯން ހެދޭގޮތަށް ހުރި 25ތަނެއް ސާފުކޮށް ޕާކުކުރެވޭގޮތަށް މިހާރުވަނީ ހަމަޖެއްސާފައެވެ. މީގެތެރޭގައި ހީނާމާގެއާއި، ވެލާނގެ ކައިރިއާއި، ފިނޭންސް މިނިސްޓްރީ ކައިރިއާއި، މަޖީދިއްޔާ ކުރިމަތިން އޮތް ބިމުގައިވެސް ވަނީ ޕާކިން ޒޯން ހަދާފައެވެ. އަދި 4 ފުރޮޅުލީ އުޅަނދަށް ޚާއްސަ ޕާކިންގ އޭރިއާތައްވެސް ދަނީ ހަދަމުންނެވެ.
އިންޑަސްޓްރިއަލް ވިލެޖުގައި 4 ފުރޮޅުލީ އުޅަނދަށް ޚާއްސަ ޕާކިންގ އޭރިއާއެއް ހެދުމަށް އެތަން ސާފުކުރުމުގެ މަސައްކަތްވެސް ދަނީ ކުރަމުންނެވެ.
ޕާކިންގ މައްސަަލައަށް ދާއިމީ ޙައްލެއް ހޯދުމަށް މާލޭގައި ޕާކިން އިމާރާތްތައް އެޅުމަށް، ޕްލޭނިންގ މިނިސްޓްރީއިންން ގެންދަނީ އެކަމަށް ބޭނުންވާ ޕްލޭންތައް ހަދަމުންނެވެ.