ގދ.ތިނަދޫގައި ދުއްވާފައި ދިޔަ ސައިކަލަކުން ޖެހި 4 އަހަރުގެ ކުއްޖަކަށް އަނިޔާވެއްޖެއެވެ.
ފުލުހުން ވިދާޅުވީ އެ ކުއްޖާގެ ގައިގައި ސައިކަލުން ޖެހިފައިވަނީ އެ ކުއްޖާ ގެއަކުން ނިކުތް ވަގުތު، އެރަށު ރޯޝަނީ މަގުން އުތުރުން ދެކުނަށް ދުއްވާފައިދިޔަ ސައިކަލެއްގައި ޖެހިގެން ކަމަށެވެ.
އެކްސިޑެންޓްވި ކުއްޖާގެ މޫނުމައްޗަށް އެކިވަރުގެ ގެއްލުންވެފައިވާކަމަށް ތިނަދޫ ހޮސްޕިޓަލާއި ހަވާލާދީ ފުލުހުންވަނީ ވިދާޅުވެފައެވެ. އެ ކުއްޖާއަށް ހޮސްޕިޓަލްގައިދަނީ ފަރުވާދެމުންނެވެ.
މި ޙާދިސާ ހިންގައިގެން ފުލުހުންނަށް ރިޕޯޓްކޮށްފައިވަނީ މިއަދު ހަވީރު 17:15 ހާއިރުއެވެ.
ފުލުހުން ވިދާޅުވީ އެކްސިޑެންޓުވިއިރު ސައިކަލު ދުއްވަން އިނީ 28 އަހަރުގެ ފިރިހެނެއްކަމަށެވެ. އެކްސިޑެންޓާއި ގުޅިގެން ފުލުހުން ވަނީ އޭނާގެ ލައިސަންސް ހިފަހައްޓާފައެވެ. މި މައްސަލަ ފުލުހުންދަނީ އިތުރަށް ތަޙްޤީގު ކުރަމުންނެވެ.