މޯލްޑިވްސް ޕޯޓްސް ލިމިޓެޑް އެމްޕީއެލްއިން ޢިމާރާތްކުރާ ހިޔާ ޓަވަރުގެ އެޕާޓްމަންޓްތައް ލިބުނު މީހުންގެ ވަގުތީ ލިސްޓް ބާޠިލުކޮށްފިއެވެ.
އެމްޕީއެލް ހިޔާ އެޕަރޓްމަންޓް ލިބޭ މުވައްޒަފުންގެ ވަގުތީ ލިސްޓް އިޢުލާންކޮށްފައިވަނީ 2018ވަނަ އަހަރުގެ އޮކްޓޯބަރު މަހުއެވެ. ޕީއެސްއެމް ނިއުސްއާ ވާހަކަދައްކަވަމުން އެމްޕީއެލްގެ މީޑިއާ އޮފިޝަލް ވިދާޅުވީ ވަގުތީ ލިސްޓް ބާޠިލުކުރަން ނިންމެވީ އެމްޕީއެލްގެ ބޯޑުންކަމަށެވެ. އަދި ބޯޑުން އެގޮތަށް ނިންމެވީ ފްލެޓް ލިބޭ މީހުން ހޮވުމުގައި ބަލާފައިވާ ޝަރުތުތަކުގައި މައްސަލަ އުޅޭކަމަށް ފާހަގަކުރެވޭތީކަމަށާ ލިސްޓް އަލުން ރިވިއުކުރުމަށް ބޯޑުން ނިންމާފައިވާކަމަށްވެސް އޭނާ ވިދާޅުވިއެވެ.
ހިޔާ މަޝްރޫޢުގެ ދަށުން ކުންފުނިތަކަށް އަމާޒުކޮށްގެން ހަދާ ފްލެޓްގައި ހިމަނައިގެން އެމްޕީއެލްއިން ޢިމާރާތްކުރަން ނިންމާފައިވަނީ 14 ފަންގިފިލާގެ 3 ޓަވަރެވެ. މި ޓަވަރުތަކުގައި ހިމެނެނީ 3 ކޮޓަރީގެ އެޕާޓްމަންޓްތަކާއި 1 ކޮޓަރީގެ އެޕާޓްމަންޓްތަކެވެ.
އެމްޕީއެލްއިން ހިޔާ މަޝްރޫޢުގެ މަސައްކަތް ފަށާފައިވަނީ 2018ވަނަ އަހަރުއެވެ. ހުޅުމާލޭ 2ވަނަ ފިޔަވަހީގައި ޢިމާރާތްކުރާ މި ޓަވަރުތަކުގެ ޢަމަލީ މަސައްކަތް މިހާރުވެސް ކުރިއަށް އެބަދެއެވެ.