ގެސްޓްހައުސް އެސޯސިއޭޝަނުގެ އިންޝުއަރެންސް ޕާޓްނަރަކަށް އެލައިޑް އިންޝުއަރެންސް ހަމަޖައްސައިފިއެވެ.
މި އެއްބަސްވުމުގައި އެލައިޑުގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ޝަފާޒުއެވެ. އަދި ގެސްޓް ހައުސް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ނައިބު ރައީސް މޫސާ ނާސިހުއެވެ.
މި އެއްބަސްވުމާއި ބެހޭގޮތުން ވާހަކަދައްކަވަމުން އެލައިޑްގެ މެނޭޖިން ޑިރެކްޓަރު މުހައްމަދު ޝަފާޒު ވިދާޅުވީ، ގެސްޓްހައުސް ސިނާއަތް ކުރިއަރަމުން އަންނައިރު ގެސްޓްހައުސްތަކަށް ލިބެންޖެހޭ ރައްކާތެރިކަން ދިނުމަކީ އެލައިޑްގެ އަމާޒެއްކަމަށެވެ. އަދި މިއެއްބަސްވުމުގެ ދަށުން ގެސްޓްހައުސްތަކަށް އިންޝުއަރެންސްގެ ޙާއްސަ ޕެކޭޖްތަކެއް އެ ކުންފުނިން ފޯރުކޮށްދޭނެކަމަށް އެލައިޑުން ބުނެއެވެ. އޭގެތެރޭގައި ބަޖެޓް ޕެކޭޖާއި، ބަޖެޓް ޕްލަސް ޕެކޭޖްގެ އިތުރުން ޕްރިމިއަމް ޕެކޭޖް ހިމެނޭކަމަށް ޝަފާޒް ވިދާޅުވިއެވެ.
އެލައިޑް އިންޝުއަރަންސް ކުންފުންޏަކީ ރާއްޖޭގައި އެންމެ ފުޅާ ދާއިރާއެއްގައި އިންޝުއަރަންސްގެ ހިދުމަތް ފޯރުކޮށްދޭ އެންމެ ބޮޑު އަމިއްލަ ކުންފުންޏެވެ. އެލައިޑުން އަންނަނީ ވިޔަފާރި ކުންފުނިތަކަށާއި، އެކިއެކި ދާއިރާތަކުގެ އިތުރުން އަމިއްލަ ފަރުދުންނަށްވެސް އިންޝުއަރަންސްގެ ޚިދުމަތް ފޯރުކޮށްދެމުންނެވެ.