އަންނަ އަހަރުން ފެށިގެން ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލުން ފޯރުކޮށްދިނުމަށް އެކައުންސިލުން ތައްޔާރުވަމުންދާކަމަށް މާލޭ ސިޓީގެ މޭޔަރ ސިފާ މުޙައްމަދު ވިދާޅުވެއްޖެއެވެ.
ހުޅުމާލޭގެ މުނިސިޕަލް ޚިދުމަތްތައް ސިޓީ ކައުންސިލުގެ ދަށަށް، ބަދަލުކުރުމަށް ކުރަމުންދާ މަސައްކަތްތަކާގުޅޭ ގޮތުން ރައްޔިތުންގެ މަޖިލީހުގެ ލާމަރުކަޒީ ކޮމެޓީގައި ވާހަކަފުޅު ދައްކަވަމުން މޭޔަރ ސިފާ ވިދާޅުވީ އެކަމުގެ މަޝްވަރާތައް ސިޓީ ކައުންސިލާއި ހައުސިންގ ޑިވެލޮޕްމަންޓް ކޯރޕަރޭޝަން އެޗްޑީސީއާއި ރައީސުލްޖުމްހޫރިއްޔާގެ އޮފީހާއެކު މިހާރު ކުރަމުންދާކަމާށެވެ. ހުޅުމާލޭގައި މުނިސިޕަލް ކަންކަން މިހާތަނަށް ބަލަމުންދަނީ އެޗްޑީސީގެ ފަރާތުންނެވެ. އެ މަސައްކަތްތައް ސިޓީ ކައުންސިލުގެ ބެލުމުގެ ދަށުން މިހާރުން މިހާރަށް އެކަން ކުރުމުގައި ގޮންޖެހުންތަކެއް ހުރިކަން މޭޔަރ ވަނީ ފާހަގަކުރައްވާފައެވެ. އެގޮތުން ބަޖެޓުގެ ދަތިކަމާއި، ސްޓާފުންގެ ޝޯޓޭޖާއެކު މިއަހަރު އެކަން ކުރުމުގެ ވިސްނުމެއް ނެތްކަމަށް ކަމަށް މޭޔަރ ވިދާޅުވިއެވެ.
މާލޭ ސިޓީގެ މޭޔަރ ސިފާ މުޙައްމަދު ވިދާޅުވީ ހުޅުމާލޭގައި މުނިސިޕަލް ޚިދުމަތްތައް ފޯރުކޮށްދިނުމުގައި ކައުންސިލުގެ މައިގަނޑު ވިސްނުމަކީ އެޗްޑީސީ މެދުވެރިކޮށް ހުރިހާ ޚިދުމަތްތަކެއް ފޯރުކޮށްދިނުމުގެ ބަދަލުގައި، އައުޓްސޯސްކޮށްގެން ކުރެވެހެން ހުރި މަސައްކަތްތައް އެހެން ކުންފުނިތަކަށް އައުޓްސޯސްކޮށްގެން ފޯރުކޮށްދިނުންކަމަށާއި، އެކަމުގެ މަޝްވަރާތައް އެޗްޑީސީއާއެކު ކުރަމުންދާކަމަށް މޭޔަރ ވިދާޅުވިއެވެ.
ހުޅުމާލޭގެ މުނިސިޕަލް ކަންކަން މާލޭ ސިޓީ ކައުންސިލުގެ ބެލުމުގެ ދަށަށް ގެނެއުމަށް ސަރުކާރުން ނިންމާފައިވާއިރު، އެކަމަށް ބޭނުންވާ ބިންވެސް އެޗްޑީސީގެ ފަރާތުން ވަނީ މާލޭ ސިޓީ ކައުންސިލަށް ހަމަޖައްސައިދީފައެވެ. ހުޅުމާލޭގެ އާބާދީ ދުވަހުން ދުވަހަށް އިތުރުވަމުންދާއިރު، ރައްޔިތުންނަށް ބޭނުންވާ މުނިސިޕަލް ޚިދުމަތްތައް އެންމެ އެދެވޭގޮތެއްގައި ފޯރުކޮށްނުދެވޭކަމުގެ ޝަކުވާ ބައެއް އާއްމުންވެސް ކުރަމުންދެއެވެ.